1 Tɛ̀rzàlonìyà 5 - Mokpwe: Bakwery (New Testament)

È woŋgìrzɛ̀nɛ hwèjèelì hwe ama Rzàŋgo

¹ O nàŋgɛ rzɔ̀, ìi wònyàmòwe kòkò, o rza enje tɔ̀ lìtiŋgà o lì e tìleya lì hvomɛ̀nɛ̀ e hvonda na wùùnya ema hwene hweyà hwe o gbèyɛ̀nɛ.

² Èhwànja inyɔ hwiti è hwi gbamù nanù ema woŋgo wùnyà ema Rzàŋgo à ò jɛ̀ɛ̀, à ò jà ndi nàa ŋmìhwɛ̀, nyàyi hvɔ̀kɔ nà oma è ŋmìhwɛ̀ à jà wùùwù ema tɔ̀ mòtò à rza mò ambɛlɛlɛ.

³ Ò lìrzàkò ema hwatò hwa ohwa nanù ema, “Ò hwèlì ɛ̀yɔ̀lɛ̀ ndèŋgànɛ̀lɛ̀ ò rza enje tɔ̀ mòhvùŋgu,” lìwokimɛnɛ, wɔ̀ hwa ò hvàŋgahwà. È ò hwɛ ndi nyàyi hvɔ̀kɔ nàa mòrziyò mò lìyàlì mò lɛ̀mbɛɛ molàna ema à arza lì ŋya. Rzìi tɔ̀ mòtò à rza ò kàrzowà.

⁴ Ndi ìi wònyàmòwe kòkò, inyɔ hwitɛ-hwitɛ è rza enje ndi hwatò hwa wòhwe nàa hwatò ema hwa èlelì ò jìtìtì. Ò eŋgànɛlɛ rzɔ, wùùnya ema è Rzàŋgo è ò jɛ̀ɛ̀ à rza è uŋmànɛlɛ hvàkàlà nà oma è ŋmìhwɛ̀ à jà hvàkàlà.

⁵ Inyɔ hwa arzɛ è hwèlì ndi hwatò hwa ŋmàye, nà hwatò hwa ŋmèrze. Irzɔ i rza enje hwatò hwa wùù tɔ̀ hwatò hwa jìtìtì.

⁶ Ò eŋgànɛ̀lɛ rzɔ, inyɛ i rzi hwɛ nàa hwatò ema hwa gbèyi ndi nàa hwa hwèlì ò ijɔ. Ndi inyɛ i wòwe hvonda nà ò lì àwòhvɛ̀ irzɔ hwiti gbamù.

⁷ Wùùwù ndi hwatò hwa nàŋga, ndèŋgànɛ̀lɛ̀ hwatò hvɛ ema hwa wòmà mììmba, wùùwù ndi hwa nyɔ̀ɔ̀ mììmba rzìi mà hwa womìrzɛ.

⁸ Ndi kànàtɛ̀ irzɔ i hwèlì ndi hwatò hwa ŋmerze, inyɛ ja alɛ̀mbɛ. Inyɛ̀ lìlòkɛ̀ ema i hwɛnelì Yerzù na e ndìŋgɛ ema i hwɛnelì hwahvɛhvɛ hwatò, inyɛ hwe hwɛ ndi nàa lìwɔti la hwɛ̀ɛkɛ̀ ema mòtò a wɔ̀ti o nyo ya eni o lì iŋga e ŋgeŋge ya eni o e hvonda ya njuma. Lìhvìtà ema e hwɛni o nyòla hwèrzùŋgèlì ema e o luwɛ, inyɛ hwe hwɛ ndi nàa mòtò a wɔ̀ti tàmba ema hwa gbeyànì hwɛ̀ɛkɛ̀.

⁹ Lohwɛ̀ à mà tɛ̀yirzɛ nanù ema a jo rzùŋgà o lì akeyà na Rzàŋgo wa arzu Yerzù Krirztò. A rzi jo tɛ̀yirzɛ nanù ema hwètàtò wa eni hwe o jo rzihweyà.

¹⁰ Yerzù à mà jo ŋwèeyà aŋga nanù, i hwɛ lòŋgɛ tɔ̀ i ŋwa, e hvonda ema a o jɛ̀ɛ̀, irzɔ jo ò hwɛ na mɔ̀.

¹¹ O eŋgànɛlɛ e akɔ̀mɛ̀lɛ̀nɛ̀ mɔ̀kɔ na ɔ̀nɛyi rzìi e aòŋgowàne hvɛ mɔ̀kɔ na ɔ̀nɛyi na oma e gbeyà naŋgɛ̀.

Lì kòkòwɛ̀lɛ̀ na ìikɔ̀mi ja lìrzukù

¹² Ìmbunda ja arzu kòkò, je e rzorzomeya o lì ŋgba hwaŋga hwatò ema hwa e oŋgowàna èluhwe rzayi-rzayi. Wɔ̀ ndi hwa e timbaa, na o lì e okòlɛ nɛ mòŋgɛ ma anyu ma aŋgàmɛnɛ lì hwɛ nàa hwatò hwa ama Krirztò.

¹³ È hwa wòŋgohwàne na èluhwe ndɛnɛ ndèŋgànɛ̀lɛ̀ e hwa uŋmɛ̀lɛ̀ e ndìŋgɛ o nyòla èwòlò ema hwa e gbèeyà. È lìya na ɛ̀yɔ̀lɛ̀ mɔ̀kɔ na ɔ̀nɛyi.

¹⁴ Ìi wònyàmòwe kòkò, nà je e ohweyà hvɛ nanù ema e kòkòwɛ̀lɛ̀ hwatò ema hwa hwèlì rzìŋgà nanù ema hwa àŋgàmɛ̀nɛ̀yi lì gbeyà èwòlò, e embɛ̀ hwaŋga ema hwa oka wɔ̀ŋgɔ̀, e oŋgowane hwaŋga ema hwa rza ohvɛɛ ŋginyà, e a àjùlɛ̀nɛ̀ mɔ̀kɔ na ɔ̀nɛyi.

¹⁵ È ɛnɛ hvɛ nanù ema tɔ̀ mɔ̀kɔ wa anyu a rzi timbirzɛ wòhwe e hwèlì tɛ nanù ema mòtò a mo gbeyànì wòhwe. Ndi e keke o ihvonda ja arzɛ o lì ahwɛnɛnɛ ŋmèma mo gbamù mɔ̀kɔ na ɔ̀nɛyi na o hwahvɛhvɛ hwatò.

¹⁶ È lìŋge ihvonda ja arzɛ,

¹⁷ È kànɛ ihvonda ja arzɛ,

¹⁸ O tɔ̀ ima eyà ema ye e gbeeyɛnɛ, e ŋgbe Lohwɛ̀ jekà, ehwànja lì emeyà la ama Lohwɛ̀ lìini o inyɔ ema e hwèlì mɔ̀kɔ na Yerzù Krirztò.

¹⁹ È rzi tɛmirzɛ Èlìŋgɛ̀ yà Wòtani o nyòla èwòlò ema mɔ̀ à gbeyà.

²⁰ È rzi rzɔ̀njɛlɛ o lì ohwa ŋmɛ̀ndì ema Lohwɛ̀ a ohwi nanù ema e ohwe.

²¹ Ndi e kèkirzɛ hweyà hwe arzɛ ema wɔ̀ hwa ohwa. È lɛmbɛ hweyà ema hwe hvomɛ̀nɛ̀ ema hwa ohwa na ŋginyà.

²² È rzi hwɛnɛ eyà o lì gbèeyàna hweyà ema hwe rza hvomɛ̀nɛ̀ ema wɔ̀ hwa ohwa.

²³ Inyɛ̀ Lohwɛ̀ mɔ̀ ŋmìti ema a jo ŋgba ɛ̀yɔ̀lɛ̀ inyɛ a gbeeye inyɔ e hwɛ wòtani o hweyà hwe arzɛ. Inyɛ̀ e tɛ̀yirzɛ èlìŋgɛ̀ na inyɔ hwa arzɛ gbamù, ndèŋgànɛ̀lɛ̀ e rzi hwɛnɛ tɔ̀ lìtɔ̀tì tɔ̀ lɔ̀kɔ la màatò ma wòhwe o nyo ya anyu natɛ̀ɛ na e hvonda ema e Rzàŋgo ya arzu Yerzù Krirztò a o jɛ̀ɛ̀.

²⁴ Lohwɛ̀ ema à mà e hwɛlɛ à mà gbeyà na oma à mà ohwe, ndèŋgànɛ̀lɛ̀ mɔ̀ à mà e gbeyà nanù.

²⁵ Ìi wònyàmòwe kòkò, e jo kànɛ̀lɛlɛ irzɔ̀ hvɛ.

²⁶ È kɔ̀mè hwàlòkèlì hwa arzɛ nà lì arzàŋgànɛ̀lɛ̀ mɔ̀kɔ nà ɔ̀nɛyi ò lìnà là ama Yerzù.

²⁷ Nà è ohweyà ò lìnà là ama è Rzàŋgo Yerzù nanù ema, è làŋgeyà wònyànyàŋgo hwa arzu hwa arzɛ ene kààti.

²⁸ Inyɛ̀ è ndèli yà ama Rzàŋgo wà arzu Yerzù Krirztò è hwɛ nà inyɔ.