1 Tɛ̀rzàlonìyà 3 - Mokpwe: Bakwery (New Testament)

¹ O eŋgànɛ̀lɛ̀ rzɔ na oma irzɔ i rzi tànɛ lì lìya e rzi hwɛ nanù ema inyɔ e hwèlì na irzɔ, i ma kaka nanù ema i lìiya irzɔ hwiti o tenì ya e mbowà ndɛɛndɛ ya Àntɛ̀nrzì.

² I ma e omeya ŋmanyàŋgò wa arzu Tìmòtì. Irzɔ na mɔ̀ i gbèeyà èwòlò ya ama Lohwɛ̀ ema e hwèlì o lì ohwa ŋmɛ̀ndì mò gbamù mo ama Krirztò. I ma e omeya e mɔ̀, aŋga nanù a e embɛ na lì e kɔ̀mɛlɛ o lìlòkɛ̀ la anyu.

³ Irzɔ̀ ja arza nanù ema a e ètìrzɛ̀ aŋga nanù, metàkà me anyu me rzi gbeyà e tìmbeyà o mburza. Inyɔ hwiti e hwi nanù ema mànù màkèkìrzɛ̀nɛ̀ ma hwèlì ndi lì emeyà la ama Lohwɛ̀ lì jo hvomɛ̀nɛ.

⁴ Ò jɔ̀kɛ̀ e hvonda ema i ma hwɛ na inyɔ, i ma e ohweyà o worzo wo hvonda nanù ema o jɔ̀kɛ̀-jɔ̀kɛ̀ hwa o jo tàkìrzɛ̀. Ndeŋgànɛ̀lɛ̀ inyɔ e ma ɛnɛ kɔ̀yi-kɔ̀yi nanù ema eyà ene ema e ma e gbeeyɛnɛ.

⁵ Litiŋga lìiŋgi ema lì ma gbeyà ɔndèŋgàtɛ̀ nà mà oma Tìmòtì. Nà oma na rzi tanɛ hvɛ lì alɛ̀mbɛ nà mà mo òma o lì jà lì arzirzɛ nɛ lìlòkɛ̀ la anyu lì hwèlì. Nà ma gbeyà ndi ene eyà nanù ehwànja, nà mà oka wɔ̀ŋgɔ̀ nanù ema, e mɔ̀ ema a gbèeyà hwatò hwa unda o tenì ya màkèkìrzɛ̀nɛ̀, a tanɛ lì e gbèeyà inyɔ e unda o tenì ya màkèkìrzɛ̀nɛ̀. Ndeŋgànɛ̀lɛ̀ o nanù ema èwòlò ya arzɛ ya ŋginyà ema irzɔ i ma gbèèyɛ̀, e tanɛ e ma timba ndi èwòlò ya ŋgundu.

⁶ Ndi o nàŋgɛ nanù Tìmòtì ema à mà jà lì ehvɛhvɛ à mà jo timbeya, mɔ̀ à jo jànelì ŋmɛ̀ndì mò gbamù nanù ema, inyɔ e lòkɛ̀ Krirztò nanù mɛnɛ ndèŋgànɛ̀lɛ̀ inyɔ e alìŋgànɛ mɔ̀kɔ na ɔ̀nɛyi nanù mɛnɛ. A ma jo òhweyà hvɛ nanù ema e jo ohvanì mɔ̀ŋgɛ̀lɛ̀ ma gbamù, ndèŋgànɛ̀lɛ̀ e okelì hvɛ o lì jo ɛnɛ nyayi hvɔ̀kɔ mɛnɛ na oma irzɔ hvɛ ja okeya o lì e ɛnɛ.

⁷ O eŋgànɛ̀lɛ rzɔ, ìi wònyàmòwe kòkò, o ìtììtènì ya indùtù na mètàkà me arzu me arzɛ mèèmà me arzu me ma ètìrzɛ̀hwɛ o nyòla inyɔ. Lìlòkɛ̀ la anyu ndi lì jo ètìrzɛ̀ mèèmà me arzu.

⁸ O nàŋgɛ irzɔ i tɛ̀yirzɛ̀ o lì hwɛ o lòŋgɛ hvɛ, kànatɛ irzɔ i hwi nanù ema màtàŋgà mà anyu ma mà imbama o rze o nyòla lìlòkɛ̀ ema inyɔ e hwɛnelì Rzàŋgo Yerzù.

⁹ O nàŋgɛ i tànɛ lì eka Lohwɛ̀ o nyòla anyu. I ma eka ehwànja màlìŋgo ema je e hwɛnelì o worzo wo eni.

¹⁰ Ŋmerze na wuu irzɔ i kànɛ na ŋginyà nanù ema irzɔ i tànɛ o lì e jèeya hvɛ, aŋga nanù i tànɛ o lì a ɛnɛnɛ mɔ̀kɔ na ɔ̀nɛyi na o lì e oŋgowàna o lì ètìrzɛ̀ lìlòkɛ̀ la anyu.

¹¹ Nà arza nanù ema Lòohwà la arzu, e Tatɛ̀, na Rzàŋgo wa arzu Yerzù Krirztò, hwa jo rzèkeyà e hveyo ò lì e jèeya hvɛ.

¹² I kànɛ nanù ema, inyɛ e Rzàŋgo e gbeye e ndìŋgɛ ema e ahwɛnɛnɛ mɔ̀kɔ na ɔ̀nɛyi na o hwatò hwa arzɛ e ahwàtɛ na lì hvuhva nyayi hvɔ̀kɔ hvɛ na oma e ndìŋgɛ ya arzu ema je e hwɛnelì yɔ hvɛ e ahwàtɛ.

¹³ I kànɛ ndi nanù, aŋga nanù Rzàŋgo Yerzù a e ètìrzɛ̀ mèèmà me anyu aŋga nanù e rza hwɛnɛ tɔ̀ lìtɔ̀tì tɔ̀ lɔ̀kɔ la mààtòo ma wòhwe o inyo ja anyu, na lì hwɛ wòtani o worzo wo ama Lohwà la arzu na Tàtɛ, e hvonda ema Rzàŋgo ya arzu Yerzù Krirztò a o jɛ̀ɛ̀ na hwatò wa eni hwa arzɛ.