1 Pètrò 3 - Mokpwe: Bakwery (New Testament)

Ijòjìyɛ̀ na mèjòmɛ̀

¹ Molàndàko mɔ̀kɔ hvɛ mɛnɛ, inyɔ ijòjìyɛ̀, ya aŋgàmɛ̀nɛ̀yi o lì arzihwirzɛ inyɔ hwiti o rze ya mèjòmɛ̀ me anyu, aŋga nanù loŋgo la awu ema hwa rza lòkɛ̀yi eyà ya Lohwà, hwɛ̀ɛ̀mɛ̀ hwe anyu hwe gbamù hwe hwa gbeyà wɔ̀ hvɛ hwa timbeya Lohwɛ̀ na lì mo lòkɛ̀. Tɔ̀ e hwɛ nanù ema e rza hwa ohwèlì tɔ̀ eyà,

² wɔ̀ hwa o ɛnɛ ɛ̀ɛ̀mɛ̀ ya anyu ya gbamù ya Wòrzàŋgì.

³ È rzi ika mèèmà me anyu nanù ema mòlòŋgà mo anyu mo hwèlì ndi o momberza mo e nyàmà nyo, nàa lì rzɛlɛ la lìhvumbu, o lì wɔ̀tɔ̀ la iŋgɔ̀kɔ̀hwi ja gòòlù o mawɔ, meyɔ̀ndɔ̀ o mɔ̀ɔ̀, hwewàrzi hwe mato, tɔ̀ lìwɔti la bɔ̀ɔbɔ̀ɔ.

⁴ Ndi hwe e hwiye ndi o mòlòŋgà ema mo uwɛ̀lɛ̀lɛ̀yi ndi o tenì ya anyu moŋgo mòlòŋgà mo rza àyèŋgòwɛ̀ ehwànja mo uwɛ̀lɛ̀lɛ̀yi ndi o èlìŋgɛ̀ ema e arzihwirzɛ na lì hwɛ hviyayi. Moŋgo mòlòŋgà mɔ̀ ndi Lohwɛ̀ a ɛnɛ nanù ema mo hwèlì wòlìto.

⁵ Èhwànja nanù ndi hwalana hwa wòtani hwa kòòhwàà ema hwà mà ika màhvìtà mà awu na Lohwɛ̀ hwà mà hwɛ lì gbeyà o lì uŋmɛ̀lɛ meloŋga me awu. Hwà mà arzihwirzɛ wɔ̀ hwiti o mèjòmɛ̀ me awu.

⁶ Nànù ndi Rzela à mà hwɛ. A ma hweyàna Abràhamù rzìi a à mo hwɛlɛ ama, e rzàŋgo ya eni. Inyɔ e gbeyà tɛ hweyà hwe gbamù ema e rza oka tɔ̀ wɔ̀ŋgɔ̀, eŋge ŋgànà e hwèlì ndi nanù ema e hwèlì ndi hwàanà hwa ama Rzela.

⁷ Mèjòmɛ̀ kòkò, ŋgànà hvɔ̀kɔ hvɛ mɛnɛ, inyɔ hvɛ e wowe hvonda na oma e lìyana ijòjìyɛ̀ ja anyu. È uŋmɛ̀lɛ̀ ijòjìyɛ̀ ja anyu èluhwe o hwèlìyelì hwe anyu, ijòjìyɛ̀ i rzi imbami lì uka inyɔ, ndi inyɔ na wɔ̀ e o luwa nyayi hvɔ̀kɔ ya lòŋgɛ. Lìŋgi lòŋgɛ lɔ̀ ndi lì hwèlì e ndèli ema Lohwɛ̀ à mà e ŋgbɛ. Inyɔ e rza hwa ohvi tɛ na oma inyɔ e àŋgàmɛ̀nɛ̀yi lì hwa ohva nanù oma Lohwɛ̀ a rza e hweyàna màkanɛ̀ ma anyu.

Gbeya gbamù tɔ̀ o tenì ya mòtàkà

⁸ O lì umba ene mbɔrzi, inyɔ hwa arzɛ e hwɛni ndi lì hwɛ mòtò mɔ̀kɔ. Ya àwòhvànɛ mèèmà me ììlì. Ya alìŋgànɛ mɔ̀kɔ na ɔ̀nɛyi. È àyènjànɛ̀ na lì arzihwirzɛ.

⁹ È rzi timbirzɛlɛlɛ wòhwe o wòhwe. Mòtò a e ohwìrzɛ̀nɛ̀ tɛ eyà ya wòhwe inyɔ hvɛ e rzi mo òhwìrzɛ̀nɛ̀ eyà ya wòhwe, inyɔ e hwɛ ndi o lì kànɛ nanù ema Lohwɛ̀ a mo nàmìrzɛ̀, ehwànja mònàmɛ̀ ndi Lohwɛ̀ a mo òhwe nanù ema a e ŋgba e hvonda à mà e hvɔ̀rzè.

¹⁰ Nà oma e tìlahwì o kààti ya Lohwà nanù ema, “Tɔ̀ njɛnɛ ema arza lòŋgɛ là mɔ̀nyɛ̀ŋgi, na o lì ɛnɛ hvɛ mèènyà me gbamù, inyɛ a rza ohwa hweyà hwe wòhwe, ndèŋgànɛ̀lɛ̀ a rza ohwa hweyà hwe lì kɔ.

¹¹ Inyɛ̀ mɔ̀ à hwɛmɛ o lì gbeyà wòhwe a à gbeyà ndi hweyà hwe gbaamù. A àŋgàmɛ̀nɛ̀yi lì keka lì hwɛ o ɛ̀yɔ̀lɛ̀ na hwatò hwa arzɛ.

¹² Èhwànja e Rzàŋgo e rzòkɛyi ndi mììrzɔ̀ ma eni o hwaŋga hwatò ema hwa tɛmi ehve-ehve, ndeŋgànɛlɛ a hwa hweyàna màkanɛ̀ ma awu. Ndi e Rzàŋgo e kumbɛ e mburza ya eni o hwaŋga hwatò ema hwa gbeyà wòhwe.”

¹³ Njɛnɛ a tànɛyi o lì e hvàŋga e hwèlì tɛ nanù ema e hwɛni mèèmà me lì gbeyà hweyà hwe gbamù e?

¹⁴ Ndi tɔ̀ e hwɛ ndi nanù ema inyɔ e tàki tɛ ehwànja e gbèyi mamɛ ema e hvomɛ̀nɛ̀, nanù oma Lohwɛ̀ a e nàmìrzɛ̀. È rzi oka tɔ̀ mòtò wɔ̀ŋgɔ̀ ndèŋgànɛ̀lɛ̀ e rzi aahwɛ.

¹⁵ È ŋgbe Krirztò èluhwe nanù ema mɔ̀ ndi à hwèlì e Rzàŋgo ya mòŋgɛ ma anyu. È awoŋgirzɛnɛ o ihvonda ja arzɛ o lì alàhwɛ̀ tɔ̀ imà mòtò ema a e ijòwa o lì ohwa lì hvomɛ̀nɛ̀ lìhvìta ema e ohvani Krirztò.

¹⁶ Ndi e gbeye nanù na mèèmà ema me lìhvohwèlì. Inyɔ e gbeyà tɛ nanù, inyɔ e arzihwirzɛ na èluhwe ya arzɛ ndèŋgànɛ̀lɛ̀ inyɔ e lìhvowe mèèmà me anyu o hwatò ema hwa ohwa hweyà hwe wòhwe o lì e teŋgɛ̀nɛ̀ ehwànja e oŋgama Krirztò. Wɔ̀ hwa o òka ìrzɔnì hwa ɛni tɛ hwɛ̀ɛ̀mɛ̀ hwe anyu hwe gbamù.

¹⁷ O lɔ̀wu lì taka, ehwànja o gbeye eyà ya gbamù, e hwèlì tɛ nanù ema nanù ndi Lohwɛ̀ a tɛ̀yirzɛ lì aka lì taka ehwànja o gbeye mamɛ ema e hwèlì wòhwe.

¹⁸ Nà ohwi ene eyà nanù ehwànja Krirztò mɔ̀ hvɛ à mà taka na lì ŋwa o nyòla wòhwe wo arzu o ŋgèlì hvɔ̀kɔ o iŋgèlì ja arzɛ. A ma hwɛ ndi mòtò ema à mà hwɛ lì gbeyà hweyà ema Lohwɛ̀ a arza, ndi à mà ŋwa o nyòla hwatò hwa wòhwe. A ma gbeyà ndi nanù aŋga nanù irzɔ i uka o ma Lohwɛ̀. Hwàto hwà mà mo òŋwa ndi e nyàma nyo ya eni ya e mòtò wa hwènàmà ndi e ma ŋwa. Lohwɛ̀ à mà gbeyà èlìŋgɛ̀ ya eni o lì hwɛ lòŋgɛ.

¹⁹ Èŋge èlìŋgɛ̀ ndi mɔ̀ à mà ɛ̀ndɛ̀nɛ̀ o hwèwòwà o lì ɛndɛ lì ohweyà hwèlìŋgɛ̀ eyà ya Lohwà.

²⁰ Hweŋge hwèlìŋgɛ̀ hwe hwèlì ndi hwèlìŋgɛ̀ ema hwe rzi hweyàne Lohwɛ̀ natɛ̀ɛ na e kòòhwà. O e hvonda ema Lohwɛ̀ à mà hwa ŋgbe hvoka hvonda ema e wawi o lì hwɛmɛ wòhwe wo awu. O eŋge hvonda ema Nowà à mà hwɛ lì oŋga wɔ̀ɔ̀lɔ̀ wo ndɛnɛ. Hwàmbi ya hwatò mɛnɛ ndi hwà mà hwɛ o tenì ya woŋgo wɔ̀lɔ̀ wo ndɛnɛ. Hwà mà rzùŋgahwà ndi na malìhwa.

²¹ Ndeŋgànɛ̀lɛ̀ manù malìhwà mà tɛmelì ndi lìlùhwìrzɛ̀. O naŋgɛ, lìŋgi lìlùhwìrzɛ̀ lɔ ndi lì gbèyi ɔ̀ndeŋgàtɛ̀ hwatò hwa rzùŋgahwì o lì akeyà na e ŋginyà ya hwèhvùmuwèlì hwe ama Yerzù Krirztò. Lìlùhwìrzɛ̀ lì rza enje ndi o lì ulɛ la ŋmiŋgo ò nyo, ndi lì hwèlì ndi o lì emeyà o lì gbèeyà Lohwɛ̀ na ŋmèma mo rzàŋgi.

²² Krirztò ema mɔ̀ à mà ɛndɛ ò ŋmanyu yà lohwà ndèŋganɛlɛ à lìyàyi ò ehvàrzu yà lìya là momɛ̀ là ama Lohwɛ̀, à kànèyà i aŋgèlì jà arzɛ, hwàkànèlì hwa arzɛ nà iŋginyà ja arzɛ ja ŋmanyu.