1 Kɔ̀rintìyà 3 - Mokpwe: Bakwery (New Testament)

Pàwolò à mà, wɔ̀ hwarzɛ hwa hwèlì ndi Hwàgbèèlì hwa ama Lohwɛ̀

¹ Ìi wònyànyàŋgo hwa ami na hwa ndomɛ hwa ami, na rzi tanɛ lì e ohwìrzɛ̀nɛ̀ na oma nà mà tànɛyi lì e ohwìrzɛ̀nɛ̀ hwatò ema hwa ohvi Èlìŋgɛ̀ yà Lohwà. Nà ma hwɛnɛ ndi lì e ohwìrzɛ̀nɛ̀ nàa hwatò ema e hwèlì o ene rze. Tɔ̀ na e hwèlì ndi jùma hwàna ema hwà mà wòteyà lì hwɛ mɔ̀kɔ nà Krirztò.

² Lìhwɛ ndi ŋmɛ̀ɛ̀ŋgɛ̀ mò nyɔ̀ŋgɔ̀, mɔ̀ mò rza làa mòlèlì ema mò eti. Ɔ̀ndeŋgàtɛ̀ nà mà wòteyà ndi lì okolɛ̀ nà hweyà hwe Lohwɛ̀ ema hwe rza imbàmɛ. Èhwanja ò èŋge hvonda inyɔ è rzi imbàme ò lì hwe wòwa. Tɔ̀ naŋgɛ hvɛ inyɔ e rzi oŋwi o lì hwe wòwa.

³ Èhwanja e hwèlì e nɔ̀ŋgɔ ndi hweyà hwe e nyàmà yà nyo. È a ohvanɛyi inona mɔ̀kɔ na ɔ̀nɛyi. È tɔ̀wɔ hvɛ metaŋgo mɔ̀kɔ na ɔ̀nɛyi. Rzeke hwenè hweyà hwe uŋmɛ̀lɛ̀ nanù ema hwègbèèlì hwe wòhwe hwe e nyàmà ya nyo hwe hwèlì hwe e kànèyà e? Rzekè inyɔ e hwèlì e lìya ndi nàa hwatò hwa ène rze.

⁴ Nà ohwa ndi nanù èhwanja, lòŋgo la anyu e ohwa nanù ema, “Nà oŋgamà ndi hwèyokòlelì hwe amà Pàwolò” rzi hwahvɛhvɛ wɔhvɛ hwa ohwa nanù ema, “Nà oŋgamà ndi hwèyokòlelì hwe ama Apòlòrzì,” rzeke oma inyɔ ya a gbeyà ndi nàa hwatò hwa ene rze e?

⁵ Nàŋgɛ rzɔ, njɛnɛ a hwèlì Apòlòrzì e? Njɛnɛ a hwèlì Pàwolò e? Irzɔ i hwèlì ndi hwàgbèèlì hwa ama Lohwɛ̀ ema i ma e òŋgòwàna o lì lòkɛ̀ Krirztò. Tɔ̀ ima mɔ̀ wa arzu à mà gbeyà ndi èwòlò ema Rzàŋgo à mà jo ŋgbe.

⁶ Imba nà mà ona ndi e hvɔ̀ŋgɔ̀. Apòlòrzì mɔhvɛ rzìi a hvahva èŋge hvɔ̀ŋgɔ̀ malìhwa. Ndi Lohwɛ̀ Mɔ̀ndi à mà hvùmùlɛ̀ èŋge hvɔ̀ŋgɔ̀.

⁷ È mɔ̀ ema a oni e hvɔ̀ŋgɔ̀, tɔ̀ e mɔ̀ hvɛ ema a e hvahvi malìhwa hwà rza ohvi wòlìtò. Lohwɛ̀ ndi à hwèlì wòlìtò, èhwanja Mɔ̀ ndi à gbeyà ema e hvɔ̀ŋgɔ̀ yo òŋge.

⁸ È mòtò ema a ona na e mɔ̀ ema a hvahva malìhwa hwà gbeyà ndi èwòlò yɔ̀kɔ mɛnɛ. Lohwɛ̀ a o hwa teŋgɛ̀nɛ̀ o èwòlò ya awu ema hwa gbèyi.

⁹ Èhwanja irzɔ hwahwàkɛ i hwèlì ndi hwàgbèèlì hwa ama Lohwɛ̀ ema i gbeyà ndi èwòlò yɔ̀kɔ. Inyɔhvɛ ema e lòkɛ̀yi, e hwèlì ndi nàa e hvaya ya ama Lohwɛ̀. Nà tànɛyi na e wowa ndi nàa wooŋgi ema Lohwɛ̀ a hwèlì a oŋga.

¹⁰ O tɛ̀ɛ̀tɛ̀ɛ Lohwɛ̀ a no ŋgbelì ììlì ja eni, o èŋgànɛ̀lɛ̀ nà mà kɔ̀kɔ̀ hvɛ mɔ̀nɔ̀ŋgɔ̀ nàa mòoŋgelì wa gbamù. Nàŋgɛ nanù, hwahvɛhvɛ hwa hwèlì hwa oŋga o mòŋgo mɔ̀nɔ̀ŋgɔ̀. Ndi tɔ̀ njɛnɛ ema a oŋga o ŋmanyu ya monò mɔ̀nɔ̀ŋgɔ̀, a hwɛnì lì aŋgòwa.

¹¹ Èhwanja o rza enje tɔ̀ mòtò tɔ̀ mɔ̀kɔ ema a tànɛyi lì kɔ̀kɔ̀ mohvɛhvɛ mɔ̀nɔ̀ŋgɔ̀, lì aka tɛ mɔ̀nɔ̀ŋgɔ̀ ema nà mà lomɛ lì kɔ̀kɔ̀. Mòŋgo mɔ̀nɔ̀ŋgɔ̀ mo hwèlì ndi hwèyòkòwèlì ema nà mà màa lì e okolɛ̀ lì hvomɛ̀nɛ̀ Yerzù Krirztò, ema Lohwɛ̀ ama jo rzuŋga moŋgɛ ma arzu lì akeyà na Yerzù Krirztò.

¹² Lòŋgò la hwàgbèèlì ema hwa o òŋga o mòŋgo mɔ̀nɔ̀ŋgɔ̀, hwa o gbeyàna hwema nàa goolo, rzilìhwa, màŋyàyi ma hwèluhwe, hwèhwàmbo, meyowo me mayi tɔ̀ ŋgonja.

¹³ Ndi o wùnyà wo hwèkayirzelì, mùùnya mo hvurzirzɛ e tumba èwòlò ema tɔ̀ ima mooŋgelì a gbèyi. Mòŋgo mùùnya mo uŋmɛ̀lɛ̀ ŋga èwòlò yà mòtò tɛ è hwɛnì wòlìtò.

¹⁴ È hwèlì tɛ ema, èwòlò ema, è mògbèèlì à gbèyi, è ò karzòlɛ̀ mòŋgo mùnya, è mògbèèlì à ò lùwa jàhwèyà.

¹⁵ Ndi èŋge èwòlò ema è mògbèèlì à gbèyi è rzèèlì tɛ ò mùnya, oma è mògbèèlì wà èŋge èwòlò à ò lùwa mbɔ̀lɔ̀nì ndɛnɛ ema à rza ò lùwa tɔ̀ jàhwèyà. È mògbèèlì à rzùŋgahwa, ndi nàa mòtò ema a hwaŋgi lì hwaŋgi o lì anjiya o tenì ya mùnya.

¹⁶ Nà lòkɛ̀yi nanù ema e ayèmbɛ inyɔ hwa arzɛ nanù ema e hwèlì ndi nàa e Ndawò yà Lohwà. Ndèŋgana èlìŋgɛ̀ ya ama Lohwɛ̀ e hwèlì, e lìyayi o ìtììtènì ja anyu.

¹⁷ Lohwɛ̀ a hvaŋga tɔ̀ ima mɔ̀ ema a hvaŋga ene Ndawò yà Lohwà. Èhwanja e Ndawò yà Lohwà è hwèlì wòtani, ndèŋgàna inyɔ ndi e hwèlì èŋge Ndawò yà Lohwà.

¹⁸ È hwɛmɛ lì alukɛlɛnɛ la inyɔ hwiti. È hwèlì tɛ ema mɔ̀kɔ wa anyu, a ɔ̀ŋgɛ̀lɛ̀ nanù ema a hwɛnì lìhwiyè o ene rze, inyɛ a àtimbirzɛ mɔ̀ ŋmìti èèti ya mòtò, oma à mà lùwa lìhwiyè.

¹⁹ Èhwanja mamɛ ema hwatò hwa ene rze hwa ɛnɛ na lìhwiyè, e hwèlì ndi èèti, o worzò wa ama Lohwɛ̀. I hwi ema, e tìlahwì o kààtì ya Lohwà nanù ema, “Lohwɛ̀ a gbeyàna ŋgbaaŋgo wo hwatò hwa ŋgbaaŋgo ò lì lɛ̀mbɛ meyano me awu.”

²⁰ È kààtì e timbi hvɛ lì hwatɛ nanù ema, “Rzàŋgo a hwi mɔ̀ŋgɛ̀lɛ̀ ma e wɔ̀ ema hwa aŋgo. A hwi ema mà rza enje tɔ̀ eyà.”

²¹ È rza ayèkirzɛ o mamɛ ema mòtò wa hwènàmà a tànɛyi lì gbeyà. Èhwanja Lohwɛ̀ à mà màà lì e ŋgbaà hwèèmà hwe arzɛ.

²² Lohwɛ̀ a no òmi imba, Apòlòrzì, na Pètrò, o lì e òŋgòwàna. Hweema hwe arzɛ ema Lohwɛ̀ a wèki o rze, a e ŋgbelì ndi e hweyɔ ema, e hwe gbeyàne. Tɔ̀ e ŋwa, tɔ̀ e hwɛ o lòŋgɛ, Lohwɛ̀ à mà e gbeyà ndi nanù o gbamù wa anyu. Hweya ema hwe e gbèyɛ̀nɛ naŋgɛ, na o e hvonda ema e o jɛ̀ɛ̀, hwe hwèlì ndi o gbamù wa anyu. Hwanù hwatò hwa arzɛ, na hwenè hwema hwe arzɛ Lohwɛ̀ a e ŋgbelì e hweyɔ.

²³ Ndèŋgana inyɔ e hwèlì ndi e wɔ̀ hwa ama Krirztò. Krirztò mɔ̀ hvɛ a hwèlì ndi e wa ama Lohwɛ̀.