1 Kɔ̀rintìyà 16 - Mokpwe: Bakwery (New Testament)

Mòrzàŋgìrzèlì mò lì òŋgòwàna hwatò

¹ Nàŋgɛ nanù, inyɛ nɛ ohweyà lì hvomɛ̀nɛ̀ wolì ema e ma rzaŋge o lì òŋgòwàna hwatò hwa Lohwɛ̀. Nà oma nà mà òhwèyà ŋmèmba mo hwatò hwa Gàlerzìyà ema hwa gbeye inyɔ hvɛ e hwɛnì ndi lì gbeyà nanù mɛnɛ.

² Tɔ̀ ima eyu ya Màrzo Lìrzàmba tɔ̀ ima mɔ̀ wa anyu a ulɛ ŋmanà wolì a ute. Wono wolì wo hwɛ ndi o mamɛ ema tɔ̀ ima mòtò a lu. È gbèyi tɛ nanù o rza hwɛ hvɛ mòrzàŋgèlì mo wòlì nà jelì tɛ.

³ Imba nà jelì tɛ, hwatò ema e hvɔ̀rzì na wa omana itita o lì wowa wòŋgo wolì ema e ma rzàŋgɛ o lì wo ɛ̀ndɛnɛ o mbowà ya Jèrurzàlɛ̀mù.

⁴ Ndi, e hwèlì tɛ gbamù ema na hwɛnì lì ɛ̀ndɛ, nanù oma jɛ̀ndɛlɛnɛ na wɔ̀.

Hwetɛyirzelelì hwe ama Pàwolò

⁵ Imba na jà o lì ehvɛhvɛ e hvonda ema na kulɛ o lì akeyà o erzòòkà ya Màrzèdonìyà èhwanja imba na ikayi o ŋmèma ema na akeyà ndi èŋge èhvarzù ya Màrzèdonìyà.

⁶ Hvonda hvɔ̀kɔ, na o lìya na inyɔ tɔ̀ɔ̀ lì hwɛ na inyɔ o hvonda ya màyelì, o lì arza nanù ema è ò nò òŋgòwàna ò yɔ̀ndɔ̀ ya ami tɔ̀ ima èki ema nà ɛ̀ndɛ.

⁷ Imba na rza arza ndi lì e ɛnɛ nàa mòtò ema aka lì aka. Imba na àhvìtɛ̀ lì hwɛ na inyɔ o ŋmanà hvòka hvonda Rzàŋgo a imanɛlɛ tɛ.

⁸ Ndi na lìya anù o Ɛ̀hvɛ̀rzɔ̀rzì natɛ̀ɛ na eyu ya e ndèma ya Pɛ̀ntìkɔ̀rzì.

⁹ Lìyohva lì ndɛnɛ lì lìhvowahwi anù o lì gbeyà èwòlò ya jɔ̀kɛ̀, ndi tɔ̀ nɛ ohwèlì rzayì-rzayì ja hwatò ema hwa no teŋgɛ̀nɛ̀yi.

¹⁰ Tìmòtì a e jèlɛlɛ tɛ, e mo àŋgoweyà kɔ̀yi-kɔ̀yi èhwanja èwòlò ema a gbeyà Rzàŋgo yɔ ndi imba hvɛ na gbeyà.

¹¹ O èŋgànɛ̀lɛ̀ rzɔ tɔ̀ mòtò a rzi mo niya. È mo òŋgòwane a ɛ̀ndɛ o yɔ̀ndɔ̀ ya eni na ɛ̀yɔ̀lɛ̀, aŋga nanù mɔ̀ nà hwahvɛhvɛ hwatò hwa Krirztò ema na ambɛ̀lɛ hwanù ùŋmanɛlɛ anù.

¹² Lì hvomɛ̀nɛ̀ ŋmanyàŋgò hwa arzu Apòlòrzì nà mà màa lì mò kɔmɛ̀lɛ̀ nanù ema a jè mojeŋga o mba anyu ŋmèmba na hwanɛ̀yi hwatò hwa Krirztò ndi à rza ohvi ŋmèma o lì jà naŋgɛ mɛnɛ. È hvonda ema a o luwɛ ŋmàna hvonda a o ja òŋgo.

Ìikɔ̀mi ja Lirzuku

¹³ È aŋgòwà e tɛ̀mɛ̀ ehve-ehve o lì lòkɛ̀. È ètìrzɛ̀ mèèmà, e hwɛnɛ̀ hvɛ màyìmbì.

¹⁴ Tɔ̀ ima lìtumba la eyà ema e gbeyà e uŋmɛ̀lɛ̀ ema ya ohvanɛ ndìŋgɛ mɔ̀kɔ na ɔ̀nɛyi.

¹⁵ Ìi wònyamòwè naŋgɛ rzɔ, è hwi ema lìtumba lì arzɛ lì ama Rztehvànàrzì lɔ̀ndi lì ma hwɛ e lɔ la worzò o erzòòkà ya Àkayiyà o lì lòkɛ̀ Krirztò, ndèŋgàna hwà mà aŋgbɛ wɔ̀ hwiti o lì gbeyà hwatò hwa ama Lohwɛ̀. Nà e atɛkɛ nanù ema,

¹⁶ e arzihwirzɛ o rze ya ini nyayi ja hwatò, ndèŋgàna ya arzihwirzɛ hvɛ o rze ya tɔ̀ ima mòtò ema a gbeyà ene tumba ya èwòlò.

¹⁷ Nà oki mɔ̀nyɛ̀ŋgì na hwèjèelì hwe ama Rztɛ̀hvànàrzì Hvɔ̀tùnàtùrzì na Akàyìkùrzì. Wɔ̀ hwa jèelì èhwanja wɔ̀ ndi hwa àŋgàmɛ̀nɛ̀ lì gbeyà èwòlò ema inyɔ e hwɛnì lì gbeyà.

¹⁸ Wɔ̀ hwa mà nò kɔ̀mɛ̀lɛ̀ na oma hwa mà e kɔ̀mɛ̀lɛ̀. Tɔ̀ ima lìtumba la eyà ema lìni lìtumba la hwatò lì ohwa i hwɛnì lì hwa ŋgbaà èluhwe.

¹⁹ Mèèmbà me arzɛ me erzòòkà ya Èrzìyà me è omelì ikɔ̀mi ja awu. Akwìlà na Prìrzìlà na mèèmbà ema me taneyà o ndawò ya awu, wɔ̀ hvɛ hwa e omelì ikɔ̀mi o lìnà la ama Rzàŋgo.

²⁰ Wònyanyàŋgò hwa arzu hwa arzɛ hwa Krirztò, ema hwa hwèlì anù, hwa è omèlì ikɔ̀mi. È arzàŋgànɛ̀lɛ̀ mɔ̀kɔ nà ɔ̀nɛyi ò lìnà là ama Yerzù.

²¹ Imba Pàwolò ndi nà tilì ini ikɔ̀mi nà lìya là ami.

²² Tɔ̀ jɛ̀ɛ̀ ema à rza lìŋgànɛ Rzàŋgo èwoma e hwɛ na mɔ̀. Rzàŋgo wa arzu, jà!

²³ Inyɛ̀ è ndèli ya ama Rzàŋgo Yerzù e hwɛ̀ nà inyɔ.

²⁴ Nà e lìŋgàni inyɔ hwatò hwa arzɛ o lìnà lì ama Yerzù Krirztò.