1 Kɔ̀rintìyà 15 - Mokpwe: Bakwery (New Testament)

Hwèhvùmùwèlì hwe ama Yerzù Krirztò

¹ Ìi hwa ŋmanyàŋgò hwa ami na indomɛ̀ ja ami, na arza lì e ɔ̀ŋgɛ̀lɛ̀nɛ̀ o Ŋmɛ̀ndì mò Gbamù ema, nà mà e ohweyà. Inyɔ ema mo àyimànɛ̀lɛ̀, o nyòla mòŋgo ŋmɛ̀ndì ɔ̀ndeŋgàtɛ̀ malòkɛ̀ ma anyu ma imbami.

² È o rzùŋgàhwà nà ŋmɛ̀ndì mò gbamù, e hwèlì tɛ ema, e mo lɛmbi kɔ̀yi-kɔ̀yi, e rza enje tɛ nanù oma lìlòkɛ̀ la anyu na Krirztò lì hwèlì ndi ŋgundu.

³ Nà ma e ohweyà Ŋmɛ̀ndì mò Gbamù ema nà mà luwe ndèŋgàna mo hwèlì wòlìtò. Mòŋgo ŋmɛ̀ndì mò hwèlì ndi ema, Krirztò à mà jo ŋwèeyà o wòhwe wò arzu, na oma e tìlahwì o kààtì ya ama Lohwà.

⁴ È tìlahwì ema à mà imayɛlɛhwɛ, à mà hvùmùlɛ̀hwɛ na Lohwɛ̀ o mburzà ya mèenyà meyawo.

⁵ Nànù hvɛ ema à mà wurzeya Pètrò, na lìnɛyi Lìyomɛ̀ la eni la Hwà-òkòwèlì na hwahwàkɛ.

⁶ Rzìi à mà wurzeya hvɛ lì aka hwègbe hweta hwe hwatò ema hwà mà hwe lì mo nɔ̀ŋgɔ o ŋgelì hvɔ̀kɔ. Lòŋgò la hwaŋga hwatò hwe e hwèlì lòŋgɛ, lòŋgo hvɛ hwà mà ŋwa.

⁷ O mburzà ya hvonda à mà wurzeya Jèmìrzì, rzìi a wurzeya hvɛ inɛyi àpɔ̀rzìtòlò ja arzɛ.

⁸ O lìrzukù, à mà no wurzeya imba hvɛ, tɔ̀ nɛ na hwèlì ndi mòtò ema à mà ŋyaahwa ndi e hvonda ema hwatò hwa rzìi hwiye ema mòtò a ŋyàa ŋmanà.

⁹ O i àpɔ̀rzìtòlò ja arzɛ, imba ndi na hwèlì e mɔ̀ ema a rza ohvɛ wòlìtò.

¹⁰ Ndi o ììlì jà amà Lohwɛ̀, imba na hwèlì ndi ema na hwèlì, rzìi ììlì ja eni ema a no ŋgbelì i rza enyi ŋgundu. Ndi imba na gbèyi èwòlò lì aka inɛyi àpɔ̀rzìtòlò jarzɛ wɔ̀ tɔ̀ nɛ rzeketɛ o e ŋginyà ya ami ndi nà mà gbeyàne ene èwòlò ndi o ììlì jà mà Lohwà ema i hwèlì na imba.

¹¹ O eŋganɛlɛ rzɔ̀, tɔ̀ e ma hwɛ tɛ ndi nanù ema imba ndi na e ohweyà mono ŋmɛ̀ndì, tɔ̀ inɛyi àpɔ̀rzìtòlò ndi ja a e ohweyà, eyà yɔ̀kɔ ndi irzɔ hwa arzɛ jo ohwa, ndèŋgànɛlɛ yɔ ndi inyɔ e lòkɛ̀yì.

Nà oma Yerzù à mà hvùmùwè nanù mɛnɛ hvɛ ndi hwàlòkèlì hwa o hvùmùwà

¹² O èŋgànɛ̀lɛ̀ jo e ohwèlì tɛ nanù ema Krirztò à mà Hvùmùwà o kpelì, mamɛ ndeŋgatɛ e ohwa ema hwatò ema hwà mà ŋwɛ hwa rza hvùmùwà e?

¹³ Inyɔ e ohwa tɛ e jɔ̀kɛ̀ nanù ema o rza enje hwèhvùmùwèlì o mburzà ya kpelì, nanù oma Krirztò a rzi hvùmùwè.

¹⁴ Krirztò a rzìi hvùmùwàyɛ̀lɛ̀hwɛ̀ tɛ o kpelì, nanù oma eyà ya Lohwà ema jo ohwa e hwèlì ndi ŋgundu, nanù hvɛ mɛnɛ na lìlòkɛ̀ la anyu.

¹⁵ Nànù o ma ya àwuŋmɛ̀lɛ̀ ndi ema i kɔ̀yeyà ndi Lohwɛ̀ hweyà, na oma jo ohwa nanù ema Mɔ̀ ndi à hvùmùlɛ̀ Krirztò. Ndi e hwèlì tɛ e jɔ̀kɛ̀ nanù ema hwatò hwa rza hvùmùwà o mburzà kpelì, nanù oma Lohwɛ̀ a rzi hvùmùlɛ̀ Krirztò.

¹⁶ O èŋgànɛ̀lɛ̀ rzɔ, e wɔ̀ hwa ŋwelì hwa rza hvùmùwà tɛ o kpelì nanù oma Krirztò a rzi hvùmùlɛ̀hwɛ o kpelì.

¹⁷ Lohwɛ̀ a rzi hvùmùlɛ̀hwɛ̀ tɛ Krirztò o kpelì, nanù oma lìlòkɛ̀ la anyu lì hwèlì ndi ŋgundu. Rzìi oma e hwèlì ndi o wòhwe wo anyu nanù mɛnɛ.

¹⁸ È uŋmɛ̀lɛ̀ hvɛ ndi nanù ema hwaŋga hwatò ema hwà mà lòkɛ̀ Krirztò ema hwà mà ŋwɛɛ hwa wɔ̀.

¹⁹ Èma hwɛ tɛ ema màhvìtà mà arzu na Krirztò ma kùwa tɛ ndi o lìni lòŋgɛ mɛnɛ, nanù oma hwatò hwa hwɛnì lì jo òkeya ììlì rzayì-rzayì lì aka nɛ wɔ̀ hwa okeya hwahvɛhvɛ hwatò.

²⁰ Ndi e jɔ̀kɛ̀ e hwèlì ndi nanù ema, Lohwɛ̀ ama hvùmùlɛ̀ Krirztò o kpelì. Krirztò ndi à hwèlì e mòtò wa worzò o lì hvùmùwà o kpelì, o tenì ya hwatò hwa arzɛ e ma hwà mà ŋwɛɛ.

²¹ Èya yɔ̀kɔ ema mòtò wa hwènàmà mɔ̀kɔ a gbèyi, yɔ ndeŋgatɛ hwatò hwa arzɛ hwa ŋwa. Ŋgana hvɔ̀kɔ hvɛ mɛnɛ ema eyà yɔ̀kɔ e ma mòtò mɔ̀kɔ a gbèyi yɔ ndi e gbeyà ema hwatò hwa arzɛ hwa hvùmùwà.

²² Hwatò hwa arzɛ hwa ŋwa èhwanja hwa hwèlì ndi mòtò mɔ̀kɔ na Adàmu. Ŋgana hvɔ̀kɔ mɛnɛ nanù ndi Lohwɛ̀ a gbeyà hwatò hwa rze hwa hvùmùwà na oma hwa hwèlì mòtò mɔ̀kɔ na Krirztò.

²³ Ndi tɔ̀ ima mòtò a hvùmùlɛ̀hwɛ ndi o e ya eni hvonda. Krirztò ema a hwèlì e wa worzò o lì hvùmùwà, e hvonda ema a o jɛ̀ɛ̀ hvɛ hwaŋga hwatò ema hwa hwèlì e hwa eni, wɔhvɛ hwa hvùmùwà.

²⁴ O mburzà ya hvonda lìrzukù lì o jà. O èŋge hvonda hwèlìŋgɛ̀ ema hwe kànèyà, Hwàkànèlì na iŋginyà ja ene rze, Yerzù a hwa lìmìrzɛ̀ iŋginyà ja awu jarzɛ. Aŋga ndi à o ŋgbɛ lìkànèyà oma Tatà Lohwɛ̀.

²⁵ Krirztò A hwɛnì lì kànèyà natɛ̀ɛ na e hvonda ema Lohwɛ̀ à ò aka hwakɔ̀èlì hwa eni rzìi a hwa ika hwa arzɛ o rze ya lìkànèyà la eni.

²⁶ È mɔ̀kɔ̀yèlì wa lìrzukù ema a hwɛnì lì hvaŋgahwa a hwèlì ndi e kpelì.

²⁷ È tìlàhwì ò kààtì yà Lohwà nanù ema, “Lohwɛ̀ à ikayi hwèèmà hwe arzɛ ò rze yà màtàŋgà mà eni.” Ndi nà è jɔ̀kɛ̀ è òhwàhwì nanù ema, hweyà hwe arzɛ ema Lohwɛ̀ à ohwi ema à ika ò rze yà ama Krirztò, Mɔ̀ ŋmìti à rza enje aŋga.

²⁸ È hvonda ema hweyà hwe arzɛ, hwe ikahwa o rze ya lìkànèyà la ama Krirztò, rzìi mɔ̀ e ŋmana wa Lohwɛ̀ a hwɛ o rze ya ama Lohwɛ̀. Lohwɛ̀ mɔ̀ndi à ikayi hweyà hwe arzɛ o rze ya eni, aŋga nanù, mɔ̀ ŋmìti a kànèyà hweyà hwe arzɛ ŋgelì hvɔ̀kɔ, o i ŋgelì ja arzɛ.

²⁹ O naŋgɛ nanù nɛ e hwèlì na hwaŋga hwatò ema hwa lùhwìrzɛ̀hwɛyi o mèyòhvò me hwaŋga hwatò ema hwà mà ŋwɛɛ e? È hwèlì tɛ ema e wɔ̀ ema hwa ŋwelì hwa rza hvùmùwà, mamɛ ndeŋgatɛ hwa lùhwìrzɛ̀ hwatò ò mèyòhvò me hwaŋga hwatò ema hwa ŋwelì e?

³⁰ Rzìi hwatò nàa hwa irzɔ, mamɛ ndeŋgatɛ i wowa ene mbeya nyo hvonda tɛ e?

³¹ Ìi wònyàmowe, imba na tɛ̀mɛ̀ o worzò wo kpelì wùnyà tɛ. Hwèkòòwà ema na e ohvani, na oma e hwèlì mòtò mɔ̀kɔ na Yerzù Krirztò, e Rzàŋgo ya arzu hwe ɔ̀ndi hwe gbeyà a na ohwa ene eyà.

³² Nà ɔ̀ŋgɔnìtɛ̀ na mirzɔ̀ ma mòtò wa hwènàmà, mamɛ e hwèlì mɔrzɛŋgi mo ami nà mà ana tɛ na nyàmà ja wàŋga o e mbowà ya Ɛ̀hvɛ̀rzɔ̀rzì. O èŋgànɛ̀lɛ̀ hwatò ema hwa ŋwelì hwa rza o hvùmùwà tɛ o lòŋgɛ nanù oma, i ohwa ndi nanù ema, “I hwɛ ndi o lì laa na lì nyɔ èhwanja ŋmɛlɛ oma i ma ŋwa.”

³³ I rzi ɔnjɔwɔ, “Yorza ya wòhwe e hvaŋga ɛ̀ɛ̀mɛ̀ ya gbamù.”

³⁴ È timbe o mahwiye ma anyu ma jɔ̀kɛ̀, e rzìi gbeyà wòhwe hvɛ. Lòŋgò la anyu e rza hwi Lohwɛ̀. È hwɛnì ndi lì oka ìrzɔnì na oma na ohwa ene eyà.

Nɛ hwatò ema hwà mà ŋwɛɛ hwa hvùmùwà

³⁵ Moto a tànɛyi lì ijòwa nanù ema, “nɛ Lohwɛ̀ a tànɛyi lì hvùmùlɛ̀ hwatò ema hwà mà ŋwɛɛ e? Ima nyayi ya nyo hwa ohva e?”

³⁶ Yoma èèti ya mòtò! O òni tɛ hvɔ̀ŋgɔ̀ o mɔ̀nyɛ̀ e rza kɛ̀ɛkɛ̀ natɛ̀ɛ e ŋwa.

³⁷ Mamɛ o òna e hwèlì ndi hvɔ̀ŋgɔ̀ mɛnɛ, e tànɛyi lì hwɛ hvɔ̀ŋgɔ̀ ya mbarzi, tɔ̀ e hwɛ èhvɛhvɛ nyayi ya hvɔ̀ŋgɔ̀. Rzeketɛ gbèe worzurzu ndi o wa o òna ema wo tìmbàa hvɛ lì oŋga.

³⁸ O hwe lìŋganelì hwe ama Lohwɛ̀, ndeŋgatɛ tɔ̀ ima hvɔ̀ŋgɔ̀ e ohvi e nyo ema e ohvi, a ŋgbaà tɔ̀ ima hvɔ̀ŋgɔ̀ e ya eni nyo ema ya e lɔɔnì.

³⁹ I nyo ja hwema hwe arzɛ ema hwe hwèlì lòŋgɛ i rza enje nyayi hvɔ̀kɔ. Hwatò hwa hwènàmà hwa ohvi e ja awu nyo, i nyàmà ja wàŋga i ohvi e ja awu nyo, hwenɔ̀ni hwe koohwa o ŋmanyu hwe ɔhvɛ hwe ohvi e ja awu nyo rzìi i nyàmà ja malìhwa jɔ̀hvɛ i ohvi e ja awu nyo.

⁴⁰ Rzìi o hwèlì hwema ema hwe hwèlì o ŋmanyu yà lohwà na o rze ya mɔ̀nyɛ̀. Hwema ema hwe hwèlì o ŋmanyu Lohwà hwe ohvi e ma awu mòlòŋgà ema hwema hwe ene rze hwe rza ohvɛ. Hwema ema hwe hwèlì o rze ya mɔ̀nyɛ̀ hwe ohvi e hwe awu mòlòŋgà ema hwema ema hwe hwèlì o ŋmanyu yà lohwà hwe rza ohvɛ.

⁴¹ Igbe i ohvi e je eni mòlòŋgà, ŋmɛ̀ɛlì mɔhvɛ e mo eni mòlòŋgà rzìi i rzombe jɔ̀hvɛ i ohvi e ja awu mòlòŋgà. Nà oma i rzombe i hwèlì jɔ̀hvɛ i ohvi e ja awu mòlòŋgà nyayi na nyayi.

⁴² Nànù mɛnɛ hvɛ ndi e o hwɛ̀ɛ na hwatò ema hwa o hvùmùhwɛ̀ɛ. È nyo ema e imayɛlɛhwɛ, e hwèlì ndi e nyo ema e hvaŋgeya, ndi e nyo ema Lohwɛ̀ a hvùmùlɛ̀ e ɔ̀ndi e rza hvaŋgeya hvɛ.

⁴³ È nyo ema hwi imelì, e rza ohvi mòlòŋgà ndèŋgàna e rza imbami. Lohwɛ̀ a e hvùmùlɛ̀ tɛ e ɛneya mòlòŋgà mo rzayì-rzayì ndèŋgàna e imbama.

⁴⁴ È imayɛlɛhwɛ tɛ, e hwɛ ndi nyo ya mòtò, ndi Lohwɛ̀ a e hvùmùlɛ̀ tɛ, e hwɛ ndi nyo ya èlìŋgɛ̀. O hwèlì nyo ya mòtò wa hwènàmà, o hwèlì hvɛ e nyo ya èlìŋgɛ̀.

⁴⁵ È tìlahwì o kààtì ya Lohwà nanù ema, “È mòtò wa worzò, Adàmu, Lohwɛ̀ à mà mo weka rzi a mo ŋgbaà lòŋgɛ.” Ndi e Adàmu ya lìrzukù e hwèlì ndi èlìŋgɛ̀ ema e ŋgba lòŋgɛ.

⁴⁶ Rzeketɛ e mòtò wa èlìŋgɛ̀, mɔndi à mà loma lì jà. È nyo ya e mòtò wa hwènàmà yɔ ndi e ma loma lì jà ndèŋgàna e nyo ya èlìŋgɛ̀.

⁴⁷ Adàmu e mòtò wa worzò, à mà wèkahwà ndi na mɔ̀nyɛ̀ mo rze, à mà uwɛ̀lɛ̀lɛ̀yi ndi o mɔ̀nyɛ̀. È Adàmu ema e ma jà hvɛ ema uwɛ̀lɛ̀lɛ̀yi ndi o ŋmanyu a Lohwà.

⁴⁸ Hwatò ema hwa hwèlì o rze, hwa hwèlì ndi nàa Adàmu, ema à mà wèkahwɛlɛ na mɔ̀nyɛ̀. È wɔ̀ ema hwa hwèlì o ŋmanyu yà lohwà hwa hwèlì ndi nàa e Adàmu ema e uwɛ̀lɛ̀lɛ̀yi o ŋmanyu yà lohwà.

⁴⁹ Nà oma ja ɛneya na Adàmu e mòtò ema à mà wèkahwà na mɔ̀nyɛ̀ mo rze, nanù mɛnɛ hvɛ ndi jo ò ɛneya nàa e mɔ̀ ema à mà uwɛ̀lɛ̀lɛ̀yi o ŋmanyu yà lohwà.

⁵⁰ I wònyàmowe, mamɛ ema na e ohweyà e hwèlì ndi nanù ema, yòma ema e wèkahwì ema ya ohvi nyo na màyija, e rza tanɛ lì lùwa hweyà hwe lìkànèyà la ama Lohwɛ̀. I nyo ema jo ò hwɛ natɛ̀ɛ nà ò mòlìkɛ̀ i rza o lùwa hweyà ema hwe o hwɛ natɛ̀ɛ na o mòlìkɛ̀.

⁵¹ È okànèyà na e ohweyà hweyà ema hwatò hwa rza hwiyɛ. Irzɔ hwa arzɛ i rza o ŋwa, ndi Lohwɛ̀ a jo tikowa i rzɔ hwa arzɛ

⁵² o ŋmanà hvoka hvonda. Hwenè hwe tikowelì hwe o hvinjɛlɛ ndi nàa ehvohvo ya lìrzɔ. Ène eyà e o gbèyɛ̀nɛ e hvonda ema lìyɔ̀mi la lìrzùkù lì o tòŋgahwɛ̀ɛ. Liyɔmi lì tòŋgahwi tɛ hwaŋga hwatò ema hwà mà ŋwɛɛ hwa o hvùmùwà, hwa rza o ŋwa hvɛ, rzìi oma Lohwɛ̀ à mà jo tikowa irzɔ hwa arzɛ.

⁵³ È nyo ema e rzɔ̀mbɔ̀ e o jà e nyo ema e rza rzɔ̀mbɔ̀ hvɛ, ndèŋgàna i nyo ema e o ŋwɛɛ, e o jà lì hwɛ e nyo ema e rza o ŋwaa hvɛ.

⁵⁴ È hvonda ema e nyo ema e rzɔ̀mbɔ̀ e o jà lì hwɛ e nyo ema e rza rzɔ̀mbɔ̀, ndèŋgàna e hvonda ema e nyo ema e ŋwaa, e o jà lì hwɛ e nyo ema e rza ŋwa, e o ondìrzɛ̀hwɛ̀ na oma e tìlahwì o kààtì ya ama Lohwà nanù ema, “O rza hwɛ a hwɛ hvɛ tɔ̀ kpelì hvɛ tɔ̀, Lohwɛ̀ à mà aka e kpelì.”

⁵⁵ “I kpelì one e ŋginyà ya aŋgɔ ya lì kpirzɛ e mòtò e hwèlì e? I kpelì one e ŋginyà ya aŋgɔ e hwèlì o lì òkìrzɛ̀ e mòtò mòrziyò e?”

⁵⁶ Wòhwe ndi wo gbèyi ndeŋgatɛ e kpelì e ohvi ŋginyà o lì rzɔrzɛlɛ mòtò na mòrziyò, ndèŋgàna e ŋginyà ya wòhwe e uwɛ̀lɛ̀lɛ̀yi ndi o mbenda.

⁵⁷ Ndi je èki tɛ Lohwɛ̀ ema a jo gbèyi ema i kpirzɛ wòhwe lì akeyà na Rzàŋgo wà arzu Yerzù Krirztò.

⁵⁸ O èŋgànɛ̀lɛ̀ ìi wònyamòwè kòkò, e tɛ̀mɛ̀ gbamù, e rza anyìŋgìrzɛ̀nɛ̀. È hwɛ ndi o lì gbèeyà Rzàŋgo. È hwi nanù ema èwòlò ema e gbèeyà Rzàŋgo tɔ̀ yɔ̀kɔ e rza hwɛ ya ŋgundu.