1 Kɔ̀rintìyà 12 - Mokpwe: Bakwery (New Testament)

Màhweyà ema mà uwɛ̀lɛ̀lɛ̀yi o èlìŋgɛ̀ ya Wòtani

¹ Ìi wònyàmowe, lì hvomɛ̀nɛ̀ mamɛ ema inyɔ e ma tile o lì hvomɛ̀nɛ̀ màahweyà ema mà uwɛ̀lɛ̀lɛ̀yi na Èlìŋgɛ̀ yà Wòtani, imba na rza arza ema inyɔ e hwiye e jɔ̀kɛ̀ lì hvomɛ̀nɛ̀ maŋga màhwèyà.

² Inyɔ e hwi ema e hvonda inyɔ e ma hwɛ ema e rzi hwiyɛ Lohwà, e ma eŋgìrzɛ̀hwɛ̀ o molawo, o lì kànɛ̀lɛlɛ hwèrzìrzà ema hwe rza tɔ̀ɔ.

³ O èŋgànɛ̀lɛ̀ rzɔ na arza ema e rzɔ̀ŋgìtɛ̀nɛ̀ nanù ema, tɔ̀ mòtò tɔ̀ mɔ̀kɔ ema a ondi na Èlìŋgɛ̀ ya ama Lohwɛ̀, a rza tanɛ lì ohwa nanù ema, “Yerzù a jemahwi” Rzi tɔ̀ mɔ̀kɔ a rza tanɛ a ohwa nanù ema “Yerzù a hwèlì ndi Rzàŋgo” ema rzeketɛ Èlìŋgɛ̀ yà Wòtani ndi è mò òŋgòwani.

⁴ O hwèlì nyayi na nyayi ja màahweyà ndi molemilemi mo Èlìŋgɛ̀ mɔ̀ndi mo ma ŋgbaà ma arzɛ.

⁵ O hwèlì hvɛ nyayi na nyayi ja ŋgàna o lì gbeyà e Rzàŋgo ndi, molemilemi mo Lohwà ndi i gbèeyà.

⁶ O hwèlì nyayi na nyayi ja ŋgàna o lì gbeyà hwèwòlò hwe ama Lohwɛ̀ ndi molemilemi mo Lohwɛ̀ mɔ̀ndi à jo ŋgba e ŋgilì ya lì hwe gbeyà.

⁷ Èlìŋgɛ̀ yà Wòtani e ŋgba tɔ̀ ima mòtò yama, o gbamù wo tɔ̀ ima mòtò.

⁸ Èlìŋgɛ̀ yà Wòtani e lìyɛlɛ mòtò mɔ̀kɔ o lì ohwa hweyà hwe lìhwiyè, èŋge èlìŋgɛ̀ yà wòtani mɛnɛ e lìyɛlɛ o hvɛhvɛ mòtò o lì okolɛ̀ hwatò na lìhwiyè.

⁹ Molemilemi mo Èlìŋgɛ̀ yà Wòtani e gbeyà mòtò mɔ̀kɔ o lì ohva lì lòkɛ̀, lì ndɛnɛ ema Lohwà a gbeyà tɔ̀ ima eyà ema a ohwi ema a gbeyà o rzi a ŋgbaà hvɛ ohvɛhvɛ làhweyà ya lì wɔ̀wìrzɛ̀.

¹⁰ Rzi Èlìŋgɛ̀ e ŋgbaà hvɛ mòtò mɔ̀kɔ, e ŋginyà ya lì gbeyà hweyà hwe mànyakà, rzi a ŋgbaà ɔhvɛ làhweyà la lì ohwa ŋmɛ̀ndì mo Lohwà. O ma ohvɛhvɛ mòtò, èlìŋgɛ̀ yà wòtani e ŋgba e ŋgilì ya lì rzɔ̀ŋgìtɛ̀nɛ̀ màahweyà ema mà uwɛ̀lɛ̀lɛ̀yi o èlìŋgɛ̀ yà wòtani, na e lɔ̀wu ema lì rza uwɛ̀lɛ̀lɛ̀yi o èlìŋgɛ̀ yà wòtani. Èŋge èlìŋgɛ̀ mɛnɛ e ŋgba mòtò mɔ̀kɔ lìhwiyè la lì ohwa ihvɛhvɛ mbɔrzi, e ŋgba ohvɛhvɛ mòtò lìhwiyè o lì tikowa mamɛ hwaŋga hwatò hwa ohwa.

¹¹ Èlìŋgɛ̀ yɔ̀kɔ mɛnɛ ndi e gbeyà hwenè hwèwòlò hwe arzɛ, o màlùtèyà ma eni a lìŋgàna lì ŋgbàà tɔ̀ njɛnɛ è la eni lì ahweyà.

Mitelì me gbèyi ndi nàa nyo hvɔ̀kɔ na rzayì-rzayì ja hwènàmà

¹² Tɔ̀ nɛ ŋmita mo nyo mo òhvi rzayì-rzayì ja hwènàmà, e hwèlì ndi ŋmita mɔ̀kɔ mɛnɛ.

¹³ Nànù mɛnɛ hvɛ ndi e hwèlì na irzɔ hwa arzɛ e hwɛ ndi ŋga wònyà Yudà o tɔ̀ hwaŋga ema hwa rza enje wònyà Yudà tɔ̀ e hwɛ ndi ŋga hwàkòmì tɔ̀ e hwaà wònjà irzɔ hwa arzɛ i lùhwìrzɛ̀hwɛ̀ ndi na èlìŋgɛ̀ yà wòtani, o tenì ya èŋge nyo ya ahvɔ̀kɛ. Ndèŋgana Lohwɛ̀ à mà jo rzòòkɛ èŋge èlìŋgɛ̀ yà wòtani mɛnɛ o tenì ya mèèmà me arzu.

¹⁴ È nyo yitɛ-yitɛ e rza gbeyàhwi ndi na ènàmà yɔ̀kɔ mɛnɛ ndi e ohvi hwènàmà na hwènàmà.

¹⁵ È hwèlì tɛ ema lìtìŋga lì ohwi tɛ ema, “Imba na rza ènje lìya o èŋgànɛ̀lɛ̀ na rza ènje mɔ̀kɔ wa ŋmita,” èŋge ŋgàna e rza ohwa nanù ema lì rza ènje ènàmà ya nyo.

¹⁶ Lìto hvɛ lì ohwi tɛ ema imba na rza ènje lìirzɔ̀ o èŋgànɛ̀lɛ̀ na rza ènje wa monò ŋmita, èŋge ŋgàna è rza lì gbeyà nanù ema lì rza ènje ènàmà ya èŋge nyò.

¹⁷ Ŋmità mo arzɛ hvɛ mo ma hwɛ tɛ ndi lìirzɔ̀, nɛ mo tànɛyi lì hweyà e? Mo ma hwɛ hvɛ tɛ ndi lìto nɛ mo tànɛyi lì uŋgbɛlɛlɛ erzunju e?

¹⁸ Nà oma e hwèlì, Lohwɛ̀ a ikayi nyayi na nyayi ja hwènàmà o nyo ò lì arza nanù ema e hwɛ na oma à mà arze.

¹⁹ È nyo ya arzɛ e rza hwɛ̀lɛ̀hwɛ̀ nyo, e ma hwɛ tɛ ema e nyo ya arzɛ yo òhvi ndi ènàmà yɔ̀kɔ.

²⁰ È nyo yo òhvi rzayì-rzayì ja hwènàmà, ndi nyo hvɔ̀kɔ ndi e hwe ohvi hwe arzɛ.

²¹ O èŋgànɛ̀lɛ rzɔ lìirzɔ̀ lì rza tànɛyi lì ohweyà lìya nanù ema, “Nà rza o endèli!” Tɔ̀ moòhvo hvɛ mo rza tanɛ lì ohweyà mataŋga ema, “Nà rza o endèli!”

²² O lì ohwa la jɔ̀kɛ̀ hweŋga hwènàmà ema i rza ɛnɛ na tɔ̀ eyà hwe ɔ̀ndi hwe lìtelì kɔ̀yi-kɔ̀yi.

²³ Hwèŋge hwènàmà rzɔ ema irzɔ jo ɔ̀ŋgɛ̀lɛ̀ nanù ema hwe rza hwɛnì wòlìtò hweyɔ ndi irzɔ jo ɔŋgeya lì aka lìmɛni. Hwèŋge hwènàmà hwe nyo ema hwe rza ohvɛ mòlòŋgà hweyɔ ndi jo ɔŋgeya towotowo.

²⁴ Hwènàmà hwe mòlòŋgà hwe rza arza hwenè hwèhvarzù. Lohwɛ̀ Mɔ̀ ŋmìti ndi à hwèki ene nyo ya hwènàmà, nyayi ŋgàna ema o lì arza nanù ema a gbèe hwèŋge hwènàma hwe endahwɛlɛ èluhwe e karzami.

²⁵ O èŋgànɛ̀lɛ̀ rzɔ o rza ènje mbààlì o ŋmita mo nyo ndi enama yɔ̀kɔ e hwɛnì lì òŋgòwàna enɛyi.

²⁶ Ènàmà yɔ̀kɔ ya nyo e tàkà tɛ hwenɛyi hwènàmà hwe arzɛ hvɛ hwe tàkà na yɔ, Ènàmà yɔ̀kɔ e ekàhwì tɛ hwe nɛyi hwe arzɛ hvɛ hwe hwɛ ndi o mɔ̀nyɛ̀ŋgì na yɔ.

²⁷ Inyɔ hwa arzɛ è hwèlì ndi ŋmita mo nyo mo ama Krirztò ndèŋgànɛ̀lɛ tɔ̀ ima mɔ̀ wa anyu hvɛ a hwèlì ndi ènàmà yɔ̀kɔ ya èŋge nyo.

²⁸ Lohwɛ̀ à mà ŋgba hwatò hwehvɛhvɛ hwèwòlò ò tenì ya mìitelì. A ma loma lì ika lòŋgo la hwatò i Àpɔ̀rzìtòlò. O mburzà nanù, a hvɔ̀rzɔ̀ hvɛ hwà-òhwèlì hwa hwèlìŋgɛ̀. Ndèŋgana a e hvɔ̀rzɔ̀ hvɛ Hwà-òkòwèlì. Ndèŋgana a e hvɔ̀rzɔ̀ hwatò ema hwa gbeyà hweyà hwe mànyakà. Rzi a hvɔ̀rzɔ̀ hvɛ hwatò ema hwa òŋgòwàna hwanɛ̀yi hwatò. A ma hvɔ̀rzɔ̀ hwatò ema hwà mà hwɛnɛ lìhwiyè la lì tìmba hwahvɛhvɛ hwatò. Rzi a hvɔ̀rzɔ̀ hvɛ hwatò ema hwa ohwa ihvɛhvɛ mbɔrzi.

²⁹ Rzeketɛ hwatò hwa arzɛ ndi hwa hwèlì i àpɔ̀rzìtòlò. Rzeketɛ hwatò hwa arzɛ ndi hwa hwèlì hwà-òhwèlì hwa hwèlìŋgɛ̀, rzeketɛ hwatò hwa arzɛ ndi hwa hwèlì Hwà-òkòwèlì. Rzeketɛ hwatò hwa arzɛ ndi hwa hwɛnì e ŋginyà ya lì gbeyà hweyà hwe mànyaka.

³⁰ Rzeketɛ hwatò hwa arzɛ ndi Lohwà a ŋgbelì e ŋginyà ya lì wɔ̀wìrzɛ̀ hwatò i nyàmbɛ. Rzeketɛ hwatò hwa arzɛ ndi hwa ohwa ihvɛhvɛ mbɔrzi. Rzeketɛ hwatò hwa arzɛ ndi hwa hwèlì e wɔ̀ ema hwa tikowa ihvɛhvɛ mbɔrzi.

³¹ O màhwèyà ma arzɛ ma ama Lohwɛ̀, e hvɔ̀rzè maŋga màhwèyà ema mà hwɛnì wòlìtò.