1 Kɔ̀rintìyà 11 - Mokpwe: Bakwery (New Testament)

Pàwolò a ohwi lì hvomɛ̀nɛ̀ lì kumɛnɛ la meyoohvo ò ndawò ja mitelì

¹ Imba Pàwolò na ohwi nanù ema e no wowe nàa èèmbanelì na oma imba hvɛ na nɔ̀ŋgɔ hwèèmbanelì hwe ama Krirztò.

² I wònyàmowe, imba na e èki rzayì-rzayì nanù ema inyɔ e no ika o màlùtèyà ma anyu i hvonda ja arzɛ rzìi e nɔ̀ŋgɔ hvɛ hwèyòkòwèlì hwe ama Krirztò na oma imba hvɛ nà mà e okolɛ̀.

³ Nà arza ema e rzɔ̀ŋgìtɛ̀nɛ̀ nanù ema, Krirztò a hwèlì ndi moòhvo mo kànèyà tɔ̀ ima mòtò hwa mùnyanà. È mùnyanà mɔhvɛ a hwèlì ndi moòhvo mo ama e jòjìyɛ̀ ya eni. Lohwà mɔhvɛ ndi à hwèlì moòhvo mo ama Krirztò.

⁴ Tɔ̀ ima mùnyanà ema a kànɛɛ tɔ̀ lì ohwa eyà ya Lohwà na moòhvo ema mo kumɛnɛhwɛyi, a enyìrzɛ̀ ndi Krirztò.

⁵ Ndi tɔ̀ ima molanà ema a kànɛɛ tɔ̀ lì ohwa ŋmɛ̀ndì mo ama Lohwà o èki ya màkanɛ̀ rzìi a rzi kumɛnɛ moòhvo mo eni a enyìrzɛ̀ mòjòmɛ̀ mo eni. A hwèlì ndi nyayi hvɔ̀kɔ nàa molanà ema a rzoowahwi lìhvumbu la eni là mohvo.

⁶ Molanà a rza lìŋgàni tɛ o lì kumɛnɛ moòhvo mo eni, o lɔ̀wu nanù ema a mo rzoohwe. Nà oma e hwèlì ndi eyà ya ìrzɔnì o lì ɛnɛ molanà a rzoohwi lìhvumbu la eni la moòhvo, inyɛ a kumɛnɛ moòhvo mo eni.

⁷ Moto hwa mùnyanà a rza hwɛnì lìtiŋga o lì kumɛnɛ moòhvo mo eni èhwanja a hwèlì ndi ewèkèlì na èluhwe ya ama Lohwà. Ndi e molanà a hwèlì ndi èluhwe ya e mòtò wa mùnyanà.

⁸ Èhwanja ewèkèlì ya e mòtò wa mùnyanà e rzi uwɛ̀lɛ̀lɛ̀yi ndi o e nyo ya e mòtò wa molanà, ndi ewèkelì ya e mòtò wa molanà e ma uhwɛlɛ ndi o e nyo ya e mòtò wa mùnyanà.

⁹ Rzeketɛ e molanà ndi Lohwɛ̀ à mà wekane e mùnyanà, ndi e mùnyanà ndi Lohwɛ̀ à mà wekane e molanà.

¹⁰ O nyòla i aŋgèlì, e mòtò wa molanà a kumɛnɛ moòhvo mo eni o lì uŋmɛ̀lɛ̀ nanù ema a hwèlì o hwèkànèlì hwe ama mòjòmɛ̀ mo eni.

¹¹ Nà oma i hwèlì ndi mòtò mɔ̀kɔ na e Rzàŋgo molanà a rza tanɛ lì hwɛ e rzi hwɛ e mùnyanà, e mùnyanà mɔhvɛ a rza tànɛyi lì hwɛ e rzi hwɛ e molanà.

¹² Tɔ̀ nɛ e mòtò wa molanà à mà wekàhwɛ̀ ndi o mùnyanà, nanù hvɛ ndi e mùnyanà mɔ̀ hvɛ à mà ŋyàahwè ndi na e molanà, ndi hwèèmà hwe arzɛ hwe uwɛ̀lɛ̀lɛ̀yi ndi na Lohwɛ̀.

¹³ Inyɔ hwiti e lùtèyà ene eyà kɔ̀yi-kɔ̀yi, o lɔ̀wu nanù ema mòtò wa molanà a kànɛ̀ Lohwɛ̀ o èki ya lì arzàŋganɛ la hwatò hwa Lohwɛ̀, e rzi hwɛ lì kumɛnɛ moòhvo mo eni e?

¹⁴ È ŋgàna ema Lohwɛ̀ a jo wèki, e uŋmɛ̀lɛ̀ nanù ema e hwèlì ndi erzàmbo e hwèlì tɛ̀ nanù ema mòtò wa mùnyanà a ohvi lìhvùmbù la mohvo lì kɔ̀lì, kɔ̀lɔ̀lɔ̀lɔ̀?

¹⁵ Ndi o e mòtò wa molanà, mòlòŋgà mo eni mo hwèlì ndi o lìhvùmbù la eni ema lì wawi. Lìhvùmbù la eni ema lì wawi lì mo ŋgbàahwì ndi na Lohwà o lì kumɛnɛ moòhvo mo eni.

¹⁶ Ndi mòtò a arza tɛ lì tàànà ene eyà hvenda, mamɛ ya arzɛ na hwɛnì lì ohwa e hwèlì ndi nanù ema irzɔ tɔ̀ miitelì me arzɛ i rza ohvi ehvɛhvɛ ɛ̀ɛ̀mɛ̀ ya lì kanɛ̀ Lohwà.

Lì làa la Rzàŋgo

¹⁷ O naŋgɛ na ohwi tɛ hwènɛ̀ɛ̀yi hweyà ema na hwɛnì lì e ohweyà, na rza tanɛ lì e eka, èhwanja e ndoŋgamɛni ya anyu ya lì aùŋmanɛ o lì kanɛ̀ Lohwà e gbeyà inyɔ e gbeyà wòhwe lì aka gbamù.

¹⁸ Èya ya worzò e hwèlì ndi ema, na ohwayɛlɛyi nanù, ema, e aùŋmanɛ tɛ o lì kanɛ̀, o hwèlì lì akahwanɛ̀ o ìtììtènì ja anyu. Nà e jɔ̀kɛ̀ na lòkɛ̀ ene eyà teŋyi.

¹⁹ O tɛ̀ɛ̀tɛ̀ɛ o hwɛnì lì hwɛ la akahwanɛ̀ɛ o ìtììtènì ja anyu aŋga nanù hwaŋga ema hwa hwèlì hwa nɔŋgelì hwa jɔ̀kɛ̀ hwa ama Lohwà, hwa ɛnɛhwɛ na e jɔ̀kɛ̀.

²⁰ È arzàŋganɛ tɛ o ŋmèmba, rzeketɛ lì làa la rzaŋgo ndi e làa.

²¹ Èhwanja tɔ̀ ima mòtò a làa ndi mòlelì mo eni, e rzi hwɛ lì ambɛ̀lɛ e mbunda ya eni. Ène eyà e gbeyà lòŋgo hwa woma rzìi hwanɛ̀yi hvɛ hwa lìya na e njàwò.

²² È rza ohvi ma ndawò ma anyu o lì laa na lì nyɔ̀èya e? Ŋga e arza ndi lì enyìrzɛ̀ miitelì me ama Lohwà, na lì enyìrzɛ̀ hwaŋga hwatò ema hwa rza ohva mòlelì e? Mamɛ e arza ema imba na e ohweyà lì hvomɛ̀nɛ̀ ene eyà e? È arza ema na e eke e? Nà rza tànɛyi lì e eka!

²³ Nà ma loma lì e akɛlɛlɛ hwèyòkòwèlì ema nà mà lùwànè Rzàŋgo. O wòŋgo wùù ema Rzàŋgo Yerzù à mà àhwirzɛ̀hwɛ̀, à mà wowa ehvòòto yɔ̀kɔ.

²⁴ È hvonda à mà kulɛ lì ŋgba Lohwà jeka, à mà e hwàà rzìi a ohwa nanù ema, “È nyo ya amì ene ema yè è ŋgbààhwì. È gbèyè nanù o lì nò ɔ̀ŋgɛlɛ.”

²⁵ È hvonda ema hwa mà kulɛ̀ ò lì làa, nyayi hvɔ̀kɔ mɛnɛ, rzìi à wòwà lìwònde à ohwa nanù ema, “lìni lìwònde là mimba, lì hwèlì ndi yòòmbò è hvènya lì hvomɛ̀nɛ̀ Lohwɛ̀ nà inyɔ, è hweyi yà màyija mà ami. Nà oma è mà nyɔ ŋgɛ̀lɛ̀-ŋgɛ̀lɛ̀, è gbèye ndi nanù ò lì nò ɔ̀ŋgɛ̀lɛ̀.”

²⁶ Ène ŋgàna è hwèlì ndi nanù ema tɔ̀ ima hvonda ema e làa ene ehvòòto, rzìi e nyɔ hvɛ manù mimba, e hwèlì e ohwa lì hvomɛ̀nɛ̀ e kpelì ya ama Rzàŋgo natɛ̀ɛ a tìmba anù rze hvɛ.

²⁷ Tɔ̀ ima mɔ̀ ema a lelì ene ehvòòto rzìi a nyɔ hvɛ manù mimba, ma ama Rzàŋgo, na mèèmà ema mo rza rzaŋgɛ. Nànù o ma a gbèyi wòhwe o nyo na màyija ma ama Rzàŋgo.

²⁸ Inyɛ̀ mòtò tɛ a ɔŋgɛ kɔ̀yi-kɔ̀yi ndèŋgànɛ̀lɛ̀ a e làa èŋge ehvòòto na lì nyɔ maŋga mimba.

²⁹ O èŋgànɛ̀lɛ̀ mòtò a rza embi tɛ jànda ja nyo ya ama e Rzàŋgo ò èŋge hvonda ema hwa làa èŋge ehvòòto rzìi hwa nyɔ̀ɔ maŋga mimba, hwa jànà ndi hwèkɔ̀kìrzèlì o nyo ja awu. Nà oma wɔ̀ hwa làa èŋge ehvòòto na lì nyɔ maŋga mimba.

³⁰ Ɔ̀ndeŋgàtɛ̀ rzayì-rzayì ja hwa inyɔ e hweyà inyo ja anyu rzilìlì na lì ɔ̀kìrzɛ̀ hvɛ nyayi na nyayi ja merziyo, rzi rzayi-rzayi ja hwa inyɔ hvɛ e ma ŋwa.

³¹ I lomi tɛ lì awɔ̀ŋgɛ kɔ̀yi-kɔ̀yi i rza kɔ̀kìrzɛ̀hwɛ̀ na Lohwɛ̀.

³² Ndi i kàyìrzɛ̀hwɛ tɛ na lì kɔ̀kìrzɛ̀hwɛ̀ na e Rzàŋgo, i rza kɔ̀kìrzɛ̀hwɛ̀ na ene rze.

³³ O èŋgànɛ̀lɛ̀ hwa ŋmanyàŋgò wa ami, e arzàŋganɛ tɛ o lì làa lì laa la rzaŋgo, e ambɛlɛlɛ mɔ̀kɔ na ɔ̀nɛyi.

³⁴ Tɔ̀ ima mòtò ema a hweyàa e njàwò, a lee o ndawò ya eni aŋga nanù a rza gbeyà eyà ema Lohwɛ̀ a e kàyìrzɛ̀ e arzàŋganɛ tɛ. Ndi lì hvomɛ̀nɛ̀ hwenɛyi hweyà, na jelì tɛ na e ohweyà nɛ e hwɛnì lì hwe gbèeyà.