तीतुस 3 - बृज भासा

मसीह जैसौ जीबन जीयौ

¹ लोगन कूं याद करातो रैह कै बे राज्‍य करबे बारे और अधिकारिन के अधीन रैहमें और बिनकी अग्‍यान कूं मानें। और हर एक अच्‍छे काम काजै तईयार रैहमें,

² काऊ की निन्दा नां करें और झगड़ालू नां हों, पर सहनसील हों और लोगन के संग कोमलता कौ व्‍यवहार करें।

³ चौंकि हमऊं पैहले, निरबुद्धी, अग्‍या ना मानबे बारे, भटके भये, हर तरैह की बासना और सुखविलास के दास हते। हम बैर भाव और जलन रखबे में अपनों जीबन जीते और एक दूसरे ते नफरत रखते।

⁴ पर जब उद्धारकरता परमेस्‍वर की किरपा और लोगन पै वाकौ पिरेम पिरगट भयौ

⁵ तब बानें हमारौ उद्धार करौ और जि बानें हमारे काऊ धरम के कामन की बजैह ते ऐसौ नांय करौ, पर हम पै अपनी दया ते ऐसौ करौ है। ऐसौ बानें पबित्र आतमा के जरिए हमे बचाकैं करौए पबित्र आतमा जाने हमें धोयकें नयौ जनम दियौए।

⁶ बानें पबित्र आतमा हमारे उद्धारकरता ईसू मसीह के द्वारा हम पै भरपूरी उंडेलौ है।

⁷ हम वाके अनुग्रह ते धरमी ठहरे हैं, जाते हम कबऊ नांय खतम हैबे बारे जीबन के बारिस हैबे की आस रख सकैं।

⁸ जि बात सई है और मैं चाहूं, कै तू इन बातन के बारे में दिरनता ते बोले कर, जाते बे लोग जो परमेस्‍वर में भरोसौ करें, बे भले कामन में लगे रैहबें। जे बात अच्‍छीऐं और लोगन के काजै लाभ की हैं।

⁹ मूर्खता के बिबाद, और बंसावलि, और लड़ाई झगड़े और व्‍यबस्था सम्बन्धी झगड़न ते दूर रै। चौंकि इनते कोई लाभ नांय और जि बेकार के है।

¹⁰ फूट डारिबे बारे कूं चेतावनी दै, कै बू ऐसौ नां करै। बाय एक बार चेतावनी दै, और बू ना मानें तौ दूसरी बार चेतावनी दै, फिरऊ ना मानें तौ बाते अलग है जा।

¹¹ चौंकि तू जानें कै ऐसौ आदमी रस्ता ते भटक गयौ है और वाके पाप बाय खुद कूं दोसी ठहरातै।

चिठ्‌ठी की आखरी सिछा

¹² जब मैं तेरे जौरें अरतिमास या तुखिकुस कूं भेजूं तब बिनके पौहचतेई तू मोते मिलबे निकुपुलिस आबे कौ जतन करियो। चौंकि मैंनें मंई पै जाड़े काटबे की ठानी है।

¹³ बकील जेनास और अपुल्‍लोस की यात्रा काजै अच्‍छौ प्रबन्ध करियो, जाते बिन्नें काऊ बात की कमी नांय होय।

¹⁴ हमारे अपने लोगन नें पूरे मन ते भले काम करते रहनों सीखनों चहिऐं, जाते बे औरन की जरूरत पूरी कर सकें और निकम्मे नांय बैठे रैहमें।

¹⁵ जो मेरे संग है बिन सबन कौ तोकूं नमस्‍कार और जो भरोसे की बजैह ते हमते पिरेम रखतै बिन काजैऊ हमारौ नमस्‍कार। परमेस्‍वर कौ अनुग्रह तुम सबन पै हैतौ रैहबै।