प्रकासित बाक्य 3 - बृज भासा

सरदिस की कलिसिया कूं मसीह कौ सन्देस

¹ “सरदिस की कलिसिया के दूत कूं जि लिख। “जाके जौरें परमेस्‍वर की सात आतमांऐं और सात तारे हैं, बू जे कहमें, कै मैं वाके कामन्‍नें तौ जानूं, बे लोग अपने आपकूं जीबित कहमें, पर बे जीबित नांय,

² जामारैं मैं तुमते कैहतूं जो चीज बची भई हैं और जो नांस हैबे बारीऐं, बिन्‍नें मजबूत करलै। चौंकि मैंनें तेरौ कोई काम मेरे परमेस्‍वर की नजर में पूरौ नांय पायो।

³ जामारैं तू चेत जा और यादकर कै तैनें कैसी सिक्छा पाईए और सुनीए तू बाई में बनो रैह और अपनों मन फिरा, जो तू चेतैगो नांय तौ मैं चोर की तरैह ते आ जाऊंगो, और तू कबऊ नांय जान पाबैगौ के मैं तेरे जौरें कब आ परूंगो।

⁴ “हाँ पर सरदिस में तेरे ज्हां कछू लोग एसेऊ हते, जिन्‍नें अपने कपड़ा मैले नांय करै। बे सफेद कपड़ा पैहनिंगे और बे मेरे संग घूमिंगे चौंकि बे जाई लायक हैं।

⁵ और जो जय पाबैगौ, बाय जाई तरैह ते सफेद कपड़ा पैहनांये जांगे, बाको नाम जीबन की किताब में लिखौ जाबैगौ, बाय मैं काऊ रीति ते नांय काटुंगो और मैं बाय अपने परमेस्‍वर पिता के और वाके सुरग दूतन के सामने अपना लुंगो।

⁶ जाके कान हौंय बू सुन लेय के कलिसिया ते आतमा का कैहबै।”

फिलदेलफिया की कलिसिया कूं मसीह कौ सन्देस

⁷ “फिलदेलफिया की कलिसिया के दूत कूं जि लिख। “जो पबित्र और सच्‍चौ है जाके हात में राजा दाऊद की तारीऐ, जाके खोले भये दरबाजेए कोई बन्द नांय कर सकै और जाके बन्द करे भये दरबाजेए कोई खोल नांय सकै बू जे कैहबै कै,

⁸ मैं तेरे कामन कूं जानूं। देख, मैंनें तेरे सामने एक द्वार खोलोए, जाय कोई बन्द नांय कर सकै। तेरी सामर्थ थोड़ी सी कम तौ हते पर फिरऊ तैनें मेरे वचन को पालन करौए और मेरे नाम कौ इन्कार नांय करो।

⁹ देख, मैं बिन दुस्टन की मन्‍डली कूं तेरे बस में कर दुंगो। जो यहुदी बन बैठे है, पर बे हत नांय और झूंठ बोलें। देख, मैं ऐसौ करूंगो कै बे आकें तेरे पामन में गिरिंगे तब तू जान लैबैगो के मैं तोते कितनों पिरेम करुं।

¹⁰ तैनें मेरे धीरज के वचन कूं मानोंए और मैं तोय परीक्छा के बा समै में बचाय कें रखूंगो, धरती पै रैहबे बारेन के बा परखवे के काजै संसार में आबै,

¹¹ मैं जलदी आबे बारोऊं, जो कछू तोपे हतेये बाय तू पकड़े रैह कोई तेरौ जीबन को मुकुट छीन नांय लेय।

¹² जो जय पावेगो बाय में अपने परमेस्‍वर के बड़े पिराथना घर को खम्भा बनांऊंगो और बाय फिर कबऊ कोई बामें ते बाहर नांय निकारैगौ। मैं अपने परमेस्‍वर कौ नाम और परमेस्‍वर के नगर, नये येरूसलेम जो मेरे परमेस्‍वर के जौरें सुरगते उतरबे बारौ है वाकौ नाम और मैं अपनों नयौ नाम बापै लिखूंगो।

¹³ जाके कान हौंय बू सुन लेय के कलिसिया ते आतमा का कैहबै।”

लौदिकिया की कलिसिया कूं मसीह कौ सन्देस

¹⁴ “लौदिकिया की कलिसिया के दूत कूं जि लिख। “जो ऐसौई हैबै और भरोसेमंद सच्‍चौ गबाह और परमेस्‍वर की सृस्‍टी को मूल कारनें। बू जे कैहबै,

¹⁵ मैं तेरे कामन कूं जानूं, तू ना तौ ठन्‍डौ और न गर्म। भलौ होतौ कै तू ठन्‍डौ या गर्म होतो,

¹⁶ तू गुनगुनोयें, तू न तौ ठन्‍डौए और न गर्मे, देख मैं जामारैं तोय उगलवे पेऊं।

¹⁷ तू जे कैहबै कै, ‘मैं धनी है गयौऊं और धनबान है गयौऊं मोय काऊ बात की घटी नांय।’ जामारैं तू जि नांय जानें कै तू कितनौ अभागौ और तुच्‍छ और कंगाल और अन्धौ और नंगौए।

¹⁸ जा बजैह ते मैं तोय सलाह दऊं के तू आग में ते तपो भयौ सौनों मोपैते मोल लैलै, जाते तू धनी है जाय। और सफेद कपड़ा खरीदलै और जाय पहनकें अपने नंगेपन की लज्जा बचालै। और सुरमा लैलै बाय अपनी आँखन में लगा लै जाते तू देखवे लगै।

¹⁹ “मैं जिन जिनते पिरेम करुं बिनें तारना दऊं और उलाहनों दऊं जा बजैह ते तू उत्साहित हो और अपने पापन ते मन फिरा।

²⁰ देख, मैं द्वार पै खड़ौ खटखटाऊं। जौ कोई मेरी अबाज सुनकें द्वार खोलेगौ, मैं वाके घर में आकें भोजन करूंगो और बू मेरे संग भोजन करैगौ।

²¹ “जो जय पाबैगो बाय मैं राजगद्‍दी पै बैठाऊंगो जैसे मैं बिजयी हैकें पिता के संग राजगद्‍दी पै बैठोऊं।

²² जाके कान होय बू सुन लेय कै आतमा कलिसिया ते का कैहबै।”