प्रकासित बाक्य 20 - बृज भासाहजार साल 1 फिर मैंनें सुरग ते एक सुरग दूत कूं नीचे आते भये देखौ वाके हात में पाताल की तारी हती और एक बड़ी सांकर हती। 2 बानें अजगर कूं पकर लियौ जो सैतान इबलिस हतो, बाय पकर कें हजार साल के काजै साकर ते बांध दियौ। 3 तब बा सुरग दूतनें बाकूं पाताल के बा अथाह कुन्ड में धकेल दियौ और बापै मौहर लगाय दई जाते, जब तक हजार साल पूरे नांय है जाय तब तक लोगन कूं भरमाय नांय पाबै। हजार साल पूरे हैबे के बाद थोरे समैं के काजै छोड़ौ जाबैगौ। 4 फिर मैंनें कछू राजगद्दी देखीं, जिनपै कछू आदमी बैठे हते बिनकूं न्याय करबे कौ अधिकार दियो हतो और मैनें बिन आदमिन की आतमन कूअऊं देखौ जो ईसू की गबाही और परमेस्वर के वचन की बजैह ते और बा डराबने पसु की मूरती की पूजा नांय करी और न वाके अंक अपने ऊपर लिखबाये जा बजैह ते बिनके सिर काट दिये हते। बे फिर जीबित है उठे और मसीह के संग हजार साल तक राज करौ। 5 और जब तक जे हजार साल पूरे नांय भये तब तक बे दुबारा जीबित नांय भये। जि पैहले मरे भयेन मेंते जी उठबोए। 6 बे धन्य हैं और पबित्र है, जो पैहले मरे भयेन मेंते जी उठबे में सामिल है रये हैं, इन आदमिन पै दूसरी मौत कौ कोई अधिकार नांय, पर बे तौ परमेस्वर और मसीह के पुरोहित होकर वाके संग हजार साल तक राज करिंगे। सैतान की हार 7 जब हजार साल पूरे है जांगे तब सैतान बा जेल में ते छोड़ दयो जाबैगौ। 8 और बू सबरी धरती पै फैली भई मनुस्य जात जो गोग और मागोग कही जाबै बिनें भरमाबे काजै निकर परैगौ, बू बिनै युद्ध के काजै इकठ्ठे करैगौ। बे समुन्दर की बारू के किनकन के जितने अनगिनत हुंगे। 9 सैतान की सेना सबरी धरती पै फैल जाबैगी और बे सबरे परमेस्वर के पबित्र लोगन के तम्बू और बिनकी पियारी नगरी कूं घेर लिंगे। पर आग सुरग ते निकरैगी और बिनकूं निगल जाबैगी, 10 जाके बाद भरमाबे बारे सैतान कूं आग और गन्धक की झील में फैक दियौ जाबैगौ, ज्हांपै डराबने पसु और परमेस्वर के बारे में झूंठी बात बतायबे बारे दोनोंई डारे गये हैं, बे युगानुयुग तक रात-दिन तड़पैंगे। संसार के लोगन कौ न्याय 11 फिर मैनें एक बड़ी सफेद राजगद्दी और बाय जो बापै बैठो हतो देखौ वाके सामई धरती और आकास भाग कें ठाड़े भये। बिनकौ नाम निसान नांय रयौ। 12 फिर मैनें छौटे बड़े सब मरे भये लोगन कूं राजगद्दी के सामई ठाड़ौ देखौ हतो कछू किताबें खोली गयीं फिर एक और किताब खोली गयी जि “जीबन की किताब हती” जामें मरे भये लोगन के कामन के अनुसार लिखौ भयौ न्याय करौ गयौ। 13 जो मौत के सागर में हते बिनकूं समुन्दर नेंउ दै दियौ और मौत और पाताल नेऊ अपने मरे भये सौंप दिये। हरेक कौ न्याय बिनके कामन के अनुसार करो गयौ। 14 जाके बाद मौत और पाताल कूं आग की झील में झोंक दियौ जाबैगौ। जि आग की झील दूसरी मौत होगी। 15 अगर काऊ कौ नाम “जीबन की किताब” में नांय लिखौ तौ बाऊए आग की झील में धकेलौ जाबैगौ। |
NonCommercial-NoDerivatives 4.0 International (CC BY-NC-ND 4.0)