प्रकासित बाक्य 17 - बृज भासा

पसु पै बैठी औरत

¹ जाके बाद बिन सात सुरग दूतन नें जिनपै सात कटोरा हते बिनमें ते एक ने मेरे जौरें आयकै कही, “आ मैं तोय बा बड़ी बेस्‍या के दन्‍ड कूं दिखाऊंगौ जो नदिन के किनारे पै बैठी है।

² धरती के राजान ने वाके संग व्‍यभिचार करौए और बे सब धरती पै रैहबे बारे वाके संग व्‍यभिचार की सराब पीके मतबारे है गयेएं।”

³ तब बू आतमा मोय बेहड़ के माऊं लै गयौ, म्हांपै एक औरत लाल रंग के ऐसे पसु पै बैठी हती, बा पसु के सरीर पै परमेस्‍वर के नाम की निन्दा की बाते लिखी हतीं, वाके सात सिर और दस सींग हते।

⁴ और बू औरत बैजनी और लाल रंग के कपड़ा पैहने भये हती। बू सौने और भौत कीमती मड़ी और मोतीन ते सजी भई हती और वाके हात में एक सौने कौ कटोरा हतो जो बुरी बात व्‍यभिचार की असुद्ध चीजन ते भरौ भयौ हतो।

⁵ वाके माथे पै भेद ते भरौ भयौ नाम लिखौ देखौ, “बड़ौ बेबीलोन, बेस्‍यान की और धरती के सब गन्दे कामन की मईया।”

⁶ बा औरत कूं परमेस्‍वर के पबित्र लोगन और ईसू कै गबाहन कौ खून पीके मतबारी भई। मैं बाय देखकै अचम्भे में पर गयौ।

⁷ तब बा सुरग दूत ने मोते पूछी, “तू अचरज में चौं पर गयौऐ? मैं तोय बा डराबने पसु जाके सात सिर और दस सींग है जापे बू बैठीऐ, वाकौ भेद समझातूं।

⁸ जो तुमने देखौए बू पैहले कबऊ जीबित हतो, पर अब बू जीबित नांय रयौ। बू पाताल मेंते निकरबे बारौ है, तबई वाकौ नास है जाबैगौ, फिर धरती के बे लोग जिनके नाम सृस्‍टी के पैहले ते जीबन की किताब में नांय लिखे भये नांय हते, बा पसु कूं देखके अचरज करिंगे, चौंकि बू कबऊ जीबित हतो पर अब जीबित नांय पर फिरऊ बू आयबे बारौ है।

⁹ “ज्हां थोरी बुद्धी की जरूरते जे सात सिर बे सात परबतें जिनपै बू औरत बैठी है।

¹⁰ बे सात सिर उन राजान केऊ चिन्‍नैं। जिनमें ते पांच कौ तौ सर्वनास है चुकेएं और एक अबऊ राज कर रयौ है और एक आयबे बारौ है बू कछू देर तक रैहबेगौ।

¹¹ जो डराबनो पसु पैहले कबऊ जीबित हतो, पर अब जीबित नांय बू खुद आठमो राजाए जो उनमे तेई एकऐ, वाकौऊ नास हैबे बारौऐ।

¹² “जो दस सींग तुमने देखैएं बे दस राजा हैं जिन्‍ने अबई तक राज नांय न करौ, पर बा डराबने पसु के संग कछू समै के काजै राज करबे कौ अधिकार पामिंगे।

¹³ इन राजान कौ केबल एकई उद्‍देस्‍य होगौ कै बे अपनी सक्‍ती और अपनों अधिकार बा पसु कूं सौंप देंगे।

¹⁴ बे मैमना के बिरुध युद्ध करेंगे,पर मैमना अपने बुलाये भये, चुने भये और अपने भरोसे योग्‍य चेलान के संग उनकूं हराय देगौ चौंकि बू राजान कौ राजा और पिरभून कौ पिरभू है।”

¹⁵ फिर बा दूत ने मोते कही, “जो नदिया तैने जापै बैस्‍या बैठी देखी है, बू सबरे कुल, समुदाय जात और भासान कौ चिन्‍नैं।

¹⁶ और बे दस सींग जो तैनें देखिऐं बे बा डराबने पसु और बा बैस्‍या कूं नंगौ करिंगे और वाकौ मांस खा जामिंगे और बाय आग में जराय डारिंगे।

¹⁷ चौंकि परमेस्‍वर बिनके मन में जि बात डारेगौ कै बे वाकी मनसा पूरी करें, जब तक परमेस्‍वर कौ वचन पूरौ नांय होय, तब तक बे एक मन हैकें अपनों अपनों राज बा डराबने पसु कूं दैदें।

¹⁸ जो औरत तुमने देखीऐ बू महा नगरी हती जो धरती के राजान पै राज करै।”