प्रकासित बाक्य 11 - बृज भासा

दो गबाह

¹ फिर बानें मोय नापबे कूं सरकन्डौ दियौ और कही, “उठ परमेस्‍वर कौ बड़ौ पिराथना घर और बेदी कूं नाप लै और भगतन कूं गिन लै।

² और बड़े पिराथना घर के आंगन कूं और चारदीबार कूं नाप लै और चारदीबार की बाहर की जगैह कूं छोड़ दै, बाय मत नापै चौंकि बू गैर यहुदियन कूं दियौ गयौऐ। बे पबित्र नगर कूं बियालिस महीनन तक रौदिंगे।

³ और मैं अपने दो गबाहन कूं जि अधिकार दुंगो,कै बे टाट ओढे़ भये बारै सौ साठ दिना तक भविस्‍यबानी करें।”

⁴ जि दोनों गबाह बुईऐ जो, दो जैतून के पेड़न कूं और दो दीबटन कूं दिखामें, जो धरती पै राज करबे बारे पिरभू परमेस्‍वर के सामने सुरग में ठाड़े रैहमें।

⁵ यदि कोई इन्‍ने नांस करबौ चाहबै, तौ इनके मौंह ते आग निकरै जो इन दुसमनन कूं नास करै। अगर कोई इनकौ बुरौ करबौ चाहबै तौ बू जरूर जाई तरैह ते मार डारौ जाबैगौ।

⁶ इनै सबरे आकास पै अधिकारै इनकी भविस्‍यबानी कै बिना मेह नांय बरसैगौ इनकूं पानी कौ खून बनाबे कौऊ अधिकारै जब चाहे तब सबरी धरती पै हर बिपत्‍ती लामें।

⁷ जब जे अपनी गबाही दै चुकिंगे तब पाताल कुन्‍ड में ते निकरबे बारौ डराबनौ पसु इनते लड़ाई लड़कें इनैं जीतैगौ बिनकूं मार डारैगौ।

⁸ और बिनकी लास बा बडे़ नगर के चौक में परी रैहबैगी। मापै बिनके पिरभू कूं क्रूस पै चढ़ायौ हतो। जा नगरै बुराई की बजैह ते सदौम या मिस्र के नाम तेऊ जानें।

⁹ और सबरी धरती के सबरे कुल और भासा और जातिन मेंते कछू लोग साढे तीन दिना तक बिन लासन कूं देखते रिंगे, पर बिनकी लासन कूं कबर में नांय रखन दिंगे।

¹⁰ और धरती कै रैहबे बारे लोग खुस हुंगे और एक दूसरे के जौरें भेंट भेजिंगे चौंकि बिन दोनों परमेस्‍वर की बात बताबे बारेन कूं धरती के रैहबे बारेन नें दुख पौंहचायौ हतो।

¹¹ और साढ़े तीन दिना के बाद परमेस्‍वर की ओर ते जीबन की आतमा बिनमें घुस गई, और बे अपने पांमन के बल ठाड़े है गए, और बिनके देखबे बारेन पै बड़ौ भय छाय गयौ।

¹² और बिनें सुरग ते एक बड़ी अबाज सुनाई दई, “य्हां ऊपर आऔ।” जि सुनकें बे बादल पै सबार हैकें अपने बैरिन कूं देखते-देखते सुरग पै चढ़ गए।

¹³ फिर बाई घड़ी एक बड़ौ भूकम्प भयौ, और नगर कौ दसमौ हिस्सा गिर परौ, और बा भूकम्प ते सात हजार आदमी मर गए और बचे भये सेस डर गए, और सुरग के परमेस्‍वर की महिमा करी।

¹⁴ दूसरी बिपत्‍ति बीत चुकी, देखौ, तीसरी बिपत्‍ति जल्दी आयबे बारीऐ।

सातमीं तुरही कौ बजबौ

¹⁵ और जब सातमे दूत नें तुरही बजाई, तौ सुरग में जा बिसय की बड़ी बड़ी अबाज हैबे लगी, “जगत कौ राज हमारे पिरभू कौऐ, और वाके मसीह कौ है गयौ। अब बू युगानुयुग राज करैगौ।”

¹⁶ चौबीसौं बुजुर्ग जो परमेस्‍वर के सामने अपने अपने सिंहासन पर बैठे हते मौंह के बल गिरकें, परमेस्‍वर कूं दन्‍डबत करकें,

¹⁷ जि कैहबे लगे कै, “हे सर्वसक्‍तीमान पिरभू परमेस्‍वर, जो है, और जो हतो, हम तेरौ धन्यबाद करें। तैनें अपनी बड़ी सामर्थ कूं काम में लायकें सब राजान पै राज करौये।

¹⁸ और गैर जातियन नें गुस्सा करौ, अब तेरौ कोप आय परौ बू समै आय पौहचोंए, मरे भयेन कौ न्याय करौ जाए, और तेरे दास परमेस्‍वर की बात बताबे बारेन कूं और पबित्र लोगन कूं और बिन छोटे बड़ेन कूं तेरे नाम ते डरपैं हते, बदलौ दियौ जाए, और धरती के बिगाड़बे बारेन कौ नास करौ जाएं।”

¹⁹ और परमेस्‍वर कौ पिराथना घर सुरग में है, बू खोलौ गयौ, और वाके बड़े पिराथना घर में वाके बाचा कौ सन्दूक दिखाई दियौ, और बिजली चमकी और गर्जन की अबाज आई और भूकम्प भए, और बड़े-बड़े ओरे परे।