प्रकासित बाक्य 1 - बृज भासा

¹ जा किताब में बे बात लिखी गयीं है जो ईसू मसीह नें दरसन के द्वारा बताईं हैं। जे बात परमेस्‍वर नें ईसू मसीह कूं बताई हैं जाते बू परमेस्‍वर के दासन कूं जे बता सकै कै आबे बारे समै में जल्दी हैबे बारी हैं और बानें अपने सुरग दूत कूं भेजकें अपने दास यूहन्‍ना कूं जे बात बताईं।

² यूहन्‍ना नें परमेस्‍वर कौ वचन और ईसू मसीह की गबाही और जो कछू देखौ वाकी गबाही दई।

³ धन्य है बू जो भविस्‍यबानी के वचन कूं पढ़े और सुनें और जामें लिखी भई बातन कूं मानें चौंकि समै भौत जौरें है।

कलिसियान कूं यूहन्‍ना कौ सन्देस

^4-5 मैं, यूहन्‍ना आसिया की सातौ कलीसियन के नाम लिख रयौऊं, जो है और जो हतो और जो आवे बारौ है बा परमेस्‍वर की ओर ते और बिन सातौ आतमन की ओर ते जो वाकी राजगद्‍दी के सामने हैं। और जो भरोसेमंद गबाही और मरे भयेन में ते जीबित हैबे बारौ पैहलौठौ है और सबरी धरती के राजान कौ हाकिम है। बा ईसू मसीह की ओर ते तुमें किरपा और सान्‍ती मिलती रैहबै। बू हमते पिरेम करै, जाने अपने खून के द्वारा हमारे सबरे पाप छुड़ा दिये हैं।

⁶ बानें हमें एक राजबंस और अपने पिता परमेस्‍वर की सेबा करबे काजै पुरोहित बना दियौ हैं और बिनकी महिमा और पराक्रम युगानुयुग होती रैहबै। ऐसौई हैबै।

⁷ देखौ, बू बादरन पै आबे बारौ है, हरेक आँख बाय आते भये देखेगी और बेऊ जिन्‍ने बाय मारौ हतो, बेऊ बाय देखिंगे और धरती के सगरे कुल वाके कारन छाती पीटिंगे। ऐसौई हैबै।

⁸ हमारौ पिरभू परमेस्‍वर जो हतैए, जो हतो और जो आवे बारौ है, बुई सर्वसक्‍तीमान जि कैहबै कै, “मैं ही अलफा और ओमेगा हूं।”

⁹ मैं यूहन्‍ना जो तुमारौ भईयाऊं, जो ईसू मसीह कौ कलेस और राज में, धीरज में तुमारौ सहभागी रहौ, परमेस्‍वर के वचन और ईसू मसीह की गबाही के कारन देस निकारौ दैकें पतमुस नाम के टापू में भेज दियौ हतो।

¹⁰ मैं पिरभू के दिनन में पबित्र आतमा में आ गयौ और मैंनें तुरही के समान बड़े सब्द में मेरे पीछे जे कैहते भये सुनौ,

¹¹ “जो कछू तू देखै बू सब किताब में लिखलै और सातों कलिसिया के जौरे भेज दै मतलब इफिसुस, और स्मुरना, पिरगामुन, थूआतीरा, सरदिस, फिलदेलफिया और लौदिकिया कूं।”

¹² तव मैंनें जो बोल रयो हतो बाय देखिबे काजै अपनों मौंह पीछे फेरौ और मुड़कें मैंनें सात सौने की दीबट देखीं।

¹³ और बिन दीबटन के बीच में मनुस्‍य के बेटा के समान आदमी देखौ, जो पामन तक कपड़ा पैहनें भये हतो और वाकी छाती पै सौने को पट्‍टा बंधौ भयौ हतो।

¹⁴ वाके सिर के बाल ओरे तेऊ जादा सफेद हते और वाकी आँख धधकती भयी आग के समान हतीं।

¹⁵ वाके पाम बढ़िया पीतल की तरैह हते, मानों आग की भट्‍टी में तपाये गये होंय और वाकी अबाज भौत पानी की गरजन की तरैह हती।

¹⁶ बू अपने सीदे हात में सात तारे लिये भये हतो और वाके मौंह ते तेज दुधारी तलबार निकर रई हती। वाकौ म्हों ऐसौ तेज चमक रयौ हतो जैसे सूरज की तेज कर्री घाम।

¹⁷ जब मैंनें देखौ तौ मैं वाके पामन पै मुर्दे जैसौ गिर गयौ और बानें मेरे सिर पै सीधौ हात रखकें कही, “डरपै मत। मैं पैहलौ और आखरी हूं।

¹⁸ मैं बुईऊं जाके जौरें जीबन है। मैं पैहले मर गयौ हतो, अब युगानुयुग जीबतौ हूं। देखौ, मौत और पाताल की तारी मेरे जौरें है।

¹⁹ जामारैं तू बिन बातन कूं जो तैंनें देखी हैं, और जो बात है रयीं हैं और जो जाके बाद हैबे बारीऐ बिन सबन कूं लिखलै।

²⁰ मतलब बिन सात तारेन कौ भेद जो तैनें मेरे सीदे हात पै देखौ हतो, और बिन सात सौने की दीबटन कौ भेद, बे सात तारे सातौ कलीसियन के दूत हैं, और बे सात दीबट सात कलिसिया है।