फिलिप्पियों 3 - बृज भासासच्ची धारमिकता 1 हे मेरे भईयाओ, पिरभू में हमेसा आनन्दित रहौ मोय बार-बार जि बात लिखबे में कोई परेसानी नांय, और जाई ते तुमारो कल्यान है। 2 और बिन आदमिन ते सावधान रहौ जो कुत्तन की तरैह व्यवहार करतै, बे बुराई करतै और सारीरिक खतना पै जोर देतै। 3 सई पूछौ तौ सच्चे खतना बारे हमई हैं, चौंकि हम पबित्र आतमा के जरिये परमेस्वर की उपासना करतैं हम सरीर में खतना जैसी बातन पै भरोसौ नांय करत, पर ईसू मसीह पै गर्व करते। 4 बैसे तौ ऐसी बातन में मैंऊ खुद पै घमन्ड कर सकूं। अगर कोई जि सोचै कै बू अपनी सारीरिक बातन पै घमन्ड करै तौ बाऊ ते जादा सारीरिक बातन पै घमन्ड करवे की बजैह मोपै है। 5 जब मैं आठ दिना कौ हतो तब मेरौ खतना भयौ और मैं इसरायल के वंस कौ और बिन्यामीन के गोत कौऊं और इब्रानिन कौ इब्रानी हूं और व्यबस्था कूं मानवे की बात करें तौ मैं फरीसीऊ। 6 अगर मेरे जोस की बात करौ तौ कलिसिया पै अत्याचार करबे बारो और व्यबस्था की धारमिकता की बात करौ तौ मैं बिलकुल निरदोस हतो। 7 पर जिन बातन्नें मैं फायदा की समझतौ, बिन बातन कूं मैं मसीह की वजह ते काऊ काम की नांय समझूं। 8 जाई मारे मैं पिरभू ईसू मसीहे जानबो सबसे अच्छौ फायदा समझूं और ग्यान के बारे में कहौ तौ सब बातन्नें काऊ काम की नांय समझूं, जाते मैं ईसू मसीहे पाय लऊं। 9 और मैं पूरी तरैह ते मसीह कौ है जाऊं, पर मैं खुद की धारमिकता की बजैह ते धरमी नांऊ जो नियम मानवे ते मिलै, पर जि धारमिकता है जो मसीह में भरोसे की बजैह ते परमेस्वर पिता ते मिलै हते। 10 मैं मसीहे जानबो चाहतूं और बा सक्तीऊए जानबो चाहतूं जाते बू मरबे के बाद जी उठो, मैं वाकी सी पीड़ा उठाकैं वाके मरवे में सामिल हैवौ चाहूं। और मैं बा रूप कूं पाबो चाहूं जो बानें अपनी मौत के जरिये पायौ। 11 जाते मैं काऊ रीती ते मरे भयेन में ते जी उठवे के पद तक पौंहचूं। लक्छ पाबे की कोसिस करौ 12 मेरौ जि मतलब नांय कै मैंनें सब चीज पाय लयीऐं या पूरी तरीका ते सिद्ध है गयौऊं पर मैं बा ईनामें पाबै काजै कड़ी मेहनत कर रौहूं जाके काजै ईसू मसीह नें मोय पैहले तेई बुलायौ है। 13 हे मेरे भईयाओ, मैं जि नांय समझूं कै मैंनें अब तक बू लक्छ पकर लियोए, मैं इतनोई कैहनौं चाहतूं के पीछे की बातन्ने भूलकै लक्छ की मांऊ बढ़तौ जाऊं। 14 मैं बड़ी उत्सुकता के संग अपने लक्छ की मांऊ दौड़तौ चले जाऊं जाते मैं सुरग में जायकै बू उपहार पाऊं जाके काजै परमेस्वर में मोय पिरभू ईसू मसीह नें बुलायोए। 15 हम में जितने लोग आतमा में मजबूत हैं बे जेई बिचार रखैं, अगर काऊ तरैह ते बिनके बिचार दूसरे है तौ परमेस्वर बिनें खुदई वाके बारे में बता दैवेगौ। 16 पर याद रखौ कै जा सच्चाई कूं मानकें हम अब तक आये हैं। बई सच्चाई कूं मानकै आगे बढ़ते जायें। 17 हे मेरे भईयाओ सब मिलकें मेरे जैसे चलौ और मैंनें तुम लोगन के काजै एक नमूना दियोए और बाई के अनुसार चलबे बारेन पै ध्यान देऔ। 18 चौंकि जैसौ मैं तुमते बार-बार कैह चुकौऊं और रोते भयेऊ कैहरौऊ, भौत से लोग तौ ऐसी चाल चलतें कै ईसू मसीह के क्रूस के दुसमन बन गये हैं। 19 बिनकौ नांस हैबौ तौ जरुरी है चौंकि बिन्नें अपने खाबे कूंईं परमेस्वर बना लियौ है और ऐसी बातन पै घमन्ड करैं जिन बातन पै सरम आनी चहिंयें और धरती की बातन पै मन लगाय भये है। 20 पर हमारौ देस तौ सुरग है और हम सुरग ते आयबे बारे हमारे उद्धारकरता पिरभू ईसू मसीह कौ बेसबरी ते इन्तजार कर रये हैं। 21 बू बाई सामर्थ के जरिये सब कछू अपने अधिकार में कर लेगौ और बाई के जरिये बू हमारे नास हैबे बारे सरीरे बदल के अपने महिमामय सरीर के अनुसार बदल देगौ। |
NonCommercial-NoDerivatives 4.0 International (CC BY-NC-ND 4.0)