फिलेमोन 1 - बृज भासा

नमस्‍कार

¹ मैं पौलुस, ईसू मसीह के सुभ समाचार सुनाबे की बजैह ते बन्दी हूं। मैं और भईया तिमुथियुस जि चिठ्‌ठी, हमारे प्यारे संगी फिलेमोन कूं,

² और बहिन अफफिया, संगी योद्धा अरखिप्पुस और तुमारे घर में इकठ्‌ठी हैबे बारी कलिसिया कूं लिख रौऊं।

³ हमारे पिता परमेस्‍वर और पिरभू ईसू मसीह की ओर ते तुमें किरपा और सान्‍ती मिलती रैहबै।

फिलेमोन कौ पिरेम और भरोसौ

⁴ जब जब मैं पिराथना करूं, मैं तुमें याद करूं, तब हमेसा परमेस्‍वर कौ धन्यबाद दऊं।

⁵ चौंकि पिरभू ईसू और परमेस्‍वर के पबित्र लोगन के प्रति जो तुमारो पिरेम और भरोसौ है वाके बारे में सुन्‍तौ रैहूं।

⁶ मेरी जि पिराथना है कै तुमारौ भरोसौ हर एक भली बात के ग्‍यान में प्रभाबसाली होय, जाते लोग मसीह कूं आदर दैमें।

⁷ मेरे भईयाओ! मोय तुमारे पिरेम ते आनन्द और सान्‍ती मिली है, चौंकि तुमारी दया की बजैह ते परमेस्‍वर के पबित्र लोगन के मन तरो ताजा है गये हैं।

पौलुस की उनेसिमुस के काजै बिनती

⁸ जामारें मोय मसीह में बड़ी हिम्मतै कै तुमें जो बात सहीए बिन्नें करबे की आग्‍या दऊं।

⁹ मेरी तौ उमर है गई है, और ईसू मसीह के सुभ समाचार सुनांयवे की बजैह ते बन्दी हूं, फिरऊ पिरेम की बजैह ते तुमते बिनती कर रौऊ,

¹⁰ मैं अपने बालक उनेसिमुस के काजै बिनती करूं, चौंकि बू मसीह में मेरौ बेटा है। जब मैं जेल में हतो तब मैं वाकौ आतमिक पिता बनों,

¹¹ पैहले उनेसिमुस तुमारे काऊ काम कौ नाओ पर अब बू तुमारे और मेरे काजै भौत काम कौय।

¹² मैं अपने कलेजा के टुकड़ा उनेसिमुस कूं तुमारे जौरें बापस भेज रयौऊं।

¹³ चौंकि मैं सुभ समाचार की बजैह ते जेल में हूं, मैं जाय अपने जौरें रखबौ चाहतो, कै बू तेरे बदले मेरी सेबा कर सकै।

¹⁴ पर फिलेमोन मैनें तेरी मरजी के बिना कछू नांए करबौ चाहौ। मैं तौ चाहूं कै तू मेरी मदद करै, बू काऊ दबाव ते नांय पर बू तेरी खुद की इच्छा ते हैवे।

¹⁵ का पतौए उनेसिमुस थोड़े समै के काजै तोते जाई बजैह ते अलग भयौ के बू सदा के काजै तेरे जौरें रैहबै।

¹⁶ पर बू एक सेबक की नांई नांय, पर एक भईया की तरैह मोय भौत प्यारौ है, बू मनुस्‍य के रूप में और पिरभू के पिछै चलबे बारे के रूप में, मोते जादा तोऊऐ भौत प्यारो होगौ।

¹⁷ अगर तू मोय अपनों संगकौ समझै तौ जैसे तू मोय अपनावे बैसेई तू उनेसिमुस कूं अपनइयो।

¹⁸ अगर बानें तेरौ कछू बुरौ करौ होय या तेरो बापे कछू उधार होय तौ बाऊऐ मेरे नाम पै लिख दियो।

¹⁹ मैं पौलुस, तोय अपने हात ते लिख रयोहूं, के मैं तेरो सब कछू चुकाय दुंगो। पर मैं तोय जि याद कराय रयौऊं के तोपैऊ मेरौ कछू उधारै,पर तू तौ मेरौई ऐ।

²⁰ हे भईया मोय पिरभू में तेरी ओर ते भौत आनन्द मिलौ है, मसीह के कारन तू मेरे जी कूं हरौ भरौ कर दै।

²¹ मैं तेरी आग्‍याकारिता पै भरोसौ करकें लिख रयौऊं और मैं जेऊ जानतूं के मैं जो कछू कहुंगो तू बाते ज्‍यादा करैगौं।

²² एक बार और तू मेरे रैहबे काजै जगह तैयार कर चौंकि मोय आसाये के मैं तुमारी पिराथनन की बजैह ते तुमते मिलूंगौ।

आखरी नमस्‍कार

^23-24 इपफ्रास जो ईसू मसीह के पीछे चलवे की बजैह ते मेरे संग जेल में है, और मेरे संगी मरकुस, अरिस्तर्खुस और देमांस और लूका की ओर ते तुमें नमस्‍कार।

²⁵ हमारे पिरभू ईसू मसीह की किरपा तुम लोगन पै हैती रैहबे। ऐसौई होबे।