मरकुस 3 - बृज भासा

ईसू नें आराम के दिना में सूखे हात बारे रोगी कूं ठीक करौ

¹ ईसू फिर पिराथना घर में गयौ। मांपै एक आदमी हतो जाकौ हात सूख गयौ हतो।

² कछू लोग जा बात की ताक में हते कै ईसू आराम के दिना में बा आदमीए ठीक करै और बे बापै दोस लगामें।

³ ईसू नें सूखे हात बारे आदमी ते कही, “बीच में खड़ौ है जा।”

⁴ ईसू नें बिनते पूछी, “व्‍यबस्था में आराम के दिना में भलौ करबौ अच्‍छौ है या बुरौ करबौ, जान बचाबौ या मारबौ” पर बे चुप रहये।

⁵ ईसू नें बिनके मन की कठोरता ते दुखी हैके बिनकूं गुस्सा ते चारौ लगं देखौ, और बा आदमी ते कही, “अपनों हात आगे बढ़ा” बानें अपनों हात बढ़ायौ, और वाकौ हात पैहले जैसो ठीक है गयौ।

⁶ तबई फरीसी मांपै ते चले गये और हेरोदियन के गुट संग मिलकै ईसू के बिरोध में सलाह करबे लगे, कै जाय का तरैह ते नांस करौ जाय।

ईसू के पीछे एक बड़ी भीड़ आयी

⁷ ईसू अपने चेलान के संग गलील झील की ओर चलौ गयौ, और गलील, और यहुदिया ते एक बड़ी भीड़ वाके पीछे है लई।

⁸ येरूसलेम, इदूमिया और यरदन नदी के पार ते और सूर और सैदा के आस-पास ते भौत से लोगन की भीड़ जि सुनिकै ईसू के जौरें आई कै बू कैसे अचम्भे के काम कर रैहैं।

⁹ भीड़ की बजैह ते ईसू नें अपने चेलान ते कही, “मेरे काजै एक नाव तैयार रखौ, जाते भीड़ मोय दाब नांय लै।”

¹⁰ चौंकि ईसू नें भौत से लोगन कूं ठीक करौ हतो, जामारै जितने लोग बीमार हते, बाये छूबे के काजै बापै गिरे पड़ रये हते।

¹¹ जो दुस्‍ट आतमांन के वस में हते बू ईसूए देखतेई वाके अगारी गिर पड़तीं, और चिल्लायकें कहतीं कै “तू परमेस्‍वर कौ बेटा है।”

¹² और ईसू नें दुस्‍ट आतमांन कूं भौत चितायौ, कै मोय पिरगट मत करौ कै मैं कोऊं।

ईसू कौ बारह चेलान नें चुनबो

¹³ जाके बाद ईसू एक पहाड़ पै चढ़ गयौ, और जिनैं बू चाहतो, बिनकूं अपने जौरें बुलायौ और बे ईसू के जौरें आये,

¹⁴ तब ईसू नें बिनमें ते बारह लोगन कूं चुनों और बे ईसू के भेजे भये चेला कहे गये, बे ईसू के संग-संग रये और बानें बिनैं भेजौ, कै बे सुभ समाचार कौ पिरचार करैं।

¹⁵ और बे दुस्‍ट आतमान नेंऊं निकारबे कौ अधिकार रखैं।

¹⁶ ईसू नें जिन बारह चेलान कूं चुनों हतो, बे जि हैं, सिमौन जाकौ नाम ईसू नें पतरस रखौ,

¹⁷ और जबदी को बेटा याकूब, और याकूब को भईया यूहन्‍ना, (जिनकौ नाम ईसू नें बुअनरगिस रखौ, जाकौ मतलब है “गर्जन के बेटा”)

¹⁸ अन्द्रियास, फिलिपुस, बरतुलमै, मत्‍ती, थोमा, हलफई कौ बेटा याकूब, तद्‍दी, और देस भक्‍त सिमौन,

¹⁹ और यहूदा इस्करियोती, जानें बिसबास घात करकै ईसूए पकरबायौ।

ईसू की सक्‍ती सैतानी नांय

²⁰ एक बार दुबारा ते ईसू घर के भीतर आयौ, एक बार फिर इतनी भीड़ इकठ्‌ठी है गई कै ईसू और वाके चेला रोटियां नांय खा सके।

²¹ जब वाके घर बारेन नें जि सुनी तौ बे बाय पकड़कै अपने घर लै जाबे काजै आये, चौंकि कछू लोग कैहते हते, कै ईसू कौ चित्‍त अब ठिकाने पै नांय रयौ।

²² सास्त्रन कूं सिखाबे बारे कछू लोग येरूसलेम ते आये हते, बू जि कैहते कै, “जामें सैतान है,” बे जेऊ कैहते कै “बू दुस्‍ट आतमांन के मुखिया बालजबुल की सहायता ते दुस्‍ट आतमांन कूं निकारतै है।”

²³ ईसू नें बिनैं जौरें बुलायौ और बिनते दृस्टान्तन में कहवे लगौ, “दुस्‍ट आतमांन कौ राजा सैतान कायकूँ अपनी दुस्‍ट आतमांन नैं निकारैगौ?”

²⁴ और यदि काऊ राज्य में फूट पड़ जाबै, तौ बू राज्य कैसे एकता में रह सकेगौ?

²⁵ और जब काऊ घर परिबार में फूट पड़ जाबै, तौ बू घर परिबार कैसे एकता में रह सकैगौ।

²⁶ और अगर सैतान अपनों ही बिरोधी हैकें अपने में फूट डारै, तौ वाकौ राज कैसे बनों रह सकै? वाकौ तौ अन्त ही है जाबैगौ।

²⁷ कोई आदमी काऊ बलबान के घर में घुसकें वाकौ माल लूट नांय सकै, जब तक के बू पैहले बा बलबान कूं बांध नांय लै, और तब वाके घर कूं लूट लैबैगौ।

²⁸ मैं तुमते सच कह रयौऊं कै, आदमिन के सबरे पाप और परमेस्‍वर के बिरोध में करी गई बुराई तौ मांफ करी जा सकै हैं।

²⁹ पर जो कोई परमेस्‍वर ते मिले भये पबित्र आतमा के बिरोध में बुरौ कैहते, बू कबऊ मांफ नांय करौ जाबैगौ। बू अनन्‍त पाप कौ भागी होगौ।

³⁰ ईसू नें जि जाके मारे कही हती, कै सास्त्रन कूं सिखाबे बारेन में ते कछू लोग कह रये हते, कै जि दुस्‍ट आतमा के वस में है।

ईसू के माँ, भईया और बहनें को हैं

³¹ तब ईसू की माँ और वाके भईया मांपै आये, और घर के बाहर खड़े हैके बाय बुलबायौ।

³² लोग ईसू के चारौ लंग कूं बैठे भये हते, और बिन्‍नें बाते कही, “देख तेरी माँ तेरे भईया और तेरी बहन बाहर तोय बुला रये हैं।”

³³ ईसू नें बिनैं जबाब दियौ, “मेरी माँ और मेरे भईया को हैं?”

³⁴ और जो वाके चारौ लंग कूं बैठे हते, बिनकी ओर देखिकै कही, “देखौ, मेरी माँ, भईया और बहन जेई हैं।”

³⁵ चौंकि जो कोई परमेस्‍वर की इच्छा पै चलै, बेई मेरौ भईया, बहन, और मेरी माँ है।