मत्‍ती 17 - बृज भासा

ईसू कौ रूपान्‍तरन

¹ छै दिन के बाद ईसू पतरस, याकूब और वाके भईया यूहन्‍ना कूं अपने संग लैके एकान्‍त में ऊंचे पहाड़ पै गयौ।

² और बिनकेई सामने ईसू कौ रूप बदल गयौ और वाकौ मौंह सूरज के नाईं चमकबे लगौ और वाके कपड़ा उजाले की तरैह ते चमकबे लगे।

³ और देखौ बिन्नें बू मूसा और एलियाह के संग बात करते भये दिखाई दियौ।

⁴ जापे पतरस ने ईसू ते कही, “हे पिरभू य्हांपै रैहबौ हमारे काजै कितनौ अच्‍छौ है। अगर तेरी इच्‍छा हौबे तौ हम तेरे काजै, एलियाह और मूसा कै काजै तीन कुटिया बना दैमें।”

⁵ जब बू जि बात कैह रयौ हतो तबई एक चमकते भये बादर ने बिन तीनोंन कूं ढक लियौ और बामें ते अबाज आई, “जि मेरौ प्यारौ बेटा है, जाते मैं भौत खुस हूं। और तुम जाकी बातन्‍नें सुनौ।”

⁶ चेला जि सुनिकें डरप गये और बे मौंह के बल गिर गये।

⁷ तब ईसू ने बिनके जौरै आयकै बिनकूं छूऔ और बिनते कही, “उठौ, डरपौ मत।”

⁸ तब चेलान नें अपनी आँख खोलकें देखौ तौ बिनें ईसू कूं छोड़कै और कोई दिखाई नांय दियौ।

⁹ ईसू नें पहाड़ पैते नीचे उतरते समै बिनकूं जि आग्‍या दई कै, “जब तक मैं, ‘मनुस्‍य कौ बेटा’ मरे भयेन में ते जीबित नांय है जाऊं, तब तलक जो कछु तुमनें देखौ है बू काऊ ते मत कहियों।”

¹⁰ तब चेलान नें बाते पूछी, “सास्त्रन कूं सिखाबे बारे जि चौं कैहतैं कै एलियाह कौ पैहले आयबौ जरूरिए?”

¹¹ और तब ईसू नें बिनते कही “एलियाह जरूर सब कछू सही करबे आबेगौ।

¹² पर मैं तुमते जि कैह रयौऊं, कै एलियाह तौ आ चुकौ है। पर लोग बाय पैहचान नांय पाये, पर लोगन्‍नें वाके संग बैसौई करौ जैसौ बिन्‍नें करबौ चाहौ। जाई तरैह ते मैं, ‘मनुस्‍य कौ बेटा’ बिनके हातन ते दुख उठाऊंगौ।”

¹³ तब बे चेला समझ गये कै जि बपतिस्मा दैबे बारे यूहन्‍ना के बारे में कैह रयौए।

ईसू नें लड़का में ते दुस्‍टआतमा निकारी

¹⁴ जब ईसू बापस भीड़ के जौरै आयौ तब एक आदमी ईसू के जौरै आयौ, और वाके पामन में घुटुनन के बल बैठकै,

¹⁵ बाते ते कही, “हे पिरभू! मेरे बेटा पै दया कर। जाय मिरगी आतै जामारै जाकी हालत भौत खराब है और जि बार बार आग और पानी में गिर जातै।

¹⁶ और मैंनें तेरे चेलान ते कही पर बे जाय ठीक नांय कर पाये।”

¹⁷ तब ईसू ने बिनते कही, “अरे अबिसबासी और हटीले लोगो मैं तुमारे संग कब तक रहूंगौ? और कब तक मैं तुमें सहुंगो? बा लड़का कूं मेरे जौरै लैके आऔ।”

¹⁸ तब ईसू ने बा दुस्‍ट आतमा कूं फटकारौ और बू दुस्‍ट आतमा बामें ते निकर गई और वाकौ बेटा बाई समै सही है गयौ।

¹⁹ तब चेला ईसू कूं एकान्त में लै गये और ईसू ते पूछी, “हम बाय चौं नांय निकार सके?”

²⁰ तब ईसू ने बिनते कही, “तुमारे भरोसे की कमी की बजैह ते। मैं सच कैह रयौ हूं, अगर तुम में राई के दाने कै बराबर भरोसौ होतौ तौ तुम जा पहाड तै कैहते, ‘कै य्हांते चलौ जा’ तौ बू चलौ जाबैगौ। तुमारे काजै कोई काम असम्भब नांय होबेगौ।”

²¹

दूसरी बार ईसू कौ अपनी मौत के बारे में बताबौ

²² जब बे गलील में हते,तब ईसू नें चेलान ते कही, “मैं, ‘मनुस्‍य कौ बेटा’ आदमिन के हातन ते पकरबायौ जाऊंगौ।

²³ और बे मोय मार डारिंगे और मैं तीसरे दिन जी उठूंगौ।” जा बात पै चेला भौत उदास भये।

बड़े पिराथना घर कौ कर

²⁴ जब बे कफरनहूम में आये, तौ पिराथना घर के काजै कर लैबे बारेन में ते दो लोगन नें पतरस के जौरै आयके पूछी, “का तुमारौ गुरू बड़े पिराथना घर कौ कर नांय देतै?”

²⁵ बानें कही, “हाँ देत तौ हतै।” जब पतरस अपने घर में आयौ तौ ईसू नें पतरस के बोलबे ते पैहलेई बाते पूछी, “हे सिमौन तू का समझतै? जा धरती के राजा ब्याज और कर कौन पैते लैतें अपने बेटातें या परायेन ते?”

²⁶ तब पतरस नें कही, “परायेन ते।” जापै ईसू ने कही, “तब तौ बेटा बच गये।

²⁷ फिरऊ हमें बिन लोगन कूं नाराज नांय करनों। तू झील कै किनारे जा और म्हांपै अपनी बन्सी डारिओ और जो मछली पैहले फसै वाके मौंह खोलियो। तौ तोय एक सिक्‍का मिलेगौ, बाय तू अपने और मेरे बदले में कर दै दियो।”