लूका 7 - बृज भासा

रोमी अधिकारी कौ भरोसौ

¹ ईसू लोगन कूं परमेस्‍वर के वचन की सिछा दैबे के बाद कफरनहूम में आयौ।

² तब मांपै एक सूबेदार हतो, जाकौ सेबक इतनौ बीमार हतो कै बू मरबे पै हतो। बू सूबेदार को भौत प्यारौ हतो।

³ सूबेदार नें जब ईसू के बारे में सुनी,तब बानें कछू यहुदी नेतन कूं जि बिनती करबे काजै भेजौ कै बू आयकै मेरे सेबक के पिरान बचायले।

⁴ तब यहुदी नेतन नें ईसू के जौरें पौहचकै बाते सच्‍चे मन ते बिनती करत भए कही कै सूबेदार जा लायक है कै तू वाके काजै ऐसौ करै।

⁵ चौंकि बू हमारे लोगन ते पिरेम करतुए और बानें हमारे काजै पिराथना घरऊ बनबायौ है।

⁶ ईसू बिनके संग गयौ और बू वाके घर ते थोड़ी दूर अई हतो तबई बा सूबेदार नें अपने संगीअन कूं ईसू ते जि कैहबे भेजौ कै, “हे पिरभू अपने आप कूं दुख मत देय चौंकि मैं जा लायक नांऊ कै तू मेरे घर में आबै।

⁷ जामारै मैने तेरे जौरें आयबे तक कीऊ नांय सोची। पर तू कह दै तौ मेरौ सेबक ठीक है जाबैगौ।

⁸ मैं खुदऊ एक अधिकारी के नीचे काम करतूं और मेरे नीचेऊ कछू सैनिक काम करतें और मैं बिनते कैहतूं ‘आ’ तौ बे आबतै और मैं कैहतूं ‘जा’ तौ बे जाबतै और जब मैं अपने सेबक ते कैहतूं कै ‘जाय कर’ तौ बू बाय करतुए।”

⁹ ईसू नें जब वाकी बात जि सुनी तौ बाय वाकी बात पै अचम्भौ भयौ और जो आदमिन की भीड़ वाके पीछे चल रई हती, वाकी ओर मुड़क कै कही के मैने ऐसौ भरोसौ तौ इसरायल के लोगन मेंऊ कऊं नांय देखौ।

¹⁰ फिर बा सूबेदार के भेजे भये लोग जब बापिस घर लौटे तौ बिन्‍नें बू दास बिलकुल सही मिलौ।

ईसू नें बिधबा के बेटाऐ जीबित करौ

¹¹ अगले दिन ईसू जब नाइन नाम के नगर कूं जाय रयौ और वाके चेला और एक बड़ी भीड़ वाके पीछे चल रयी हती

¹² जैसेई ईसू नगर के फाटक के जौरें पौंहचौ तौ कछू लोग एक मुरदे कूं अर्थी पै रखकै लै जाय रये हते। बू अपनी बिधबा मा कौ इकलौतो बेटा हतो जामारै वाके संग नगर के भौत ते लोग चल रये हते।

¹³ जब पिरभू ईसू नें देखौ तौ बाय बिधबा पै भौत तरस आयौ और बू बोलौ, “रोबै मत”

¹⁴ तब ईसू नें आगे बढ़कै बा अर्थी कूं छूऔ और जो लोग अर्थी कूं लै जाय रये हते बे रुक गये और ईसू नें बा मुरदे ते कही, “हे जबान मैं तोते कह रयौ हूं खड़ौ है जा”

¹⁵ तबई बू मुरदा जीन्दों हैके खड़ौ है गयौ और बोलबे लगौ ईसू नें वाकूं वाकी मा कूं दै दयौ।

¹⁶ तब सब लोगन पै भय छाय गयौ और बे परमेस्‍वर की बड़ाई करते भये जि कहबे लगे कै हमारे बीच में परमेस्‍वर की ओर ते एक महान बोलने बाला पिरकट भयौ है। और बे जेऊ कहबे लगे की परमेस्‍वर अपने लोगन की मदत करबे काजै आ गयौ है।

¹⁷ और ईसू मसीह कै बारे में जि खबर यहुदिया के जौरें चारौ लंग के इलाकेन में फैल गई।

ईसू और बपतिस्मा दैबे बारौ यूहन्‍ना

¹⁸ इन सब बातन के बारे में यूहन्‍ना के चेलान नें यूहन्‍ना कूं बतायो। तब यूहन्‍ना नें अपने दो चेलान कूं बुलायौ,

¹⁹ और बानें बिनकूं पिरभू ईसू ते जि पूछबे भेजौ कै, “आयबे बारौ मसीह तूइऐ कै हम काऊ और कौ इन्‍तजार करें।”

²⁰ फिर बे लोग जब ईसू के जौरें गये तब बिन्‍नें ईसू ते पूछी, “बपतिस्मा दैबे बारे यूहन्‍ना नें हमें तोते जि पूछबे काजै भेजौए कै ‘तू बुई मसीह है जो आयबे बारौ है कै हम काऊ और कौ इन्‍तजार करें?’”

²¹ बा समै ईसू नें भौत ते बीमारन कूं और दुखिअन कूं ठीक करौ और भौतन कूं दुस्‍ट आतमा ते छुड़ायौ हतो भौतसे अंन्धेन की आँखन कूं रोसनी दयी।

²² और बानें बिनते कही कै, “जाऔ और जो कछू तुमने देखौए और सुनौए बाय यूहन्‍ना कूं बताय देऊ कै अन्धे देखतएं, लंगड़े चल रये हैं और कोढ़ी सुद्ध है रये है। बहरे सुन पाय रये हैं और मुरदे जिलाए जाय रये हैं। और कंगालन कूं सुभ समाचार सुनांयौ जाय रयौ है।

²³ बू आदमी धन्य हैं जाय मोय अपनांयबे में कोई परेसानी नांय।”

²⁴ जब यूहन्‍ना कौ सन्देस लाबे बारे चेला चले गये तब ईसू नें भीड़ में लोगन कूं बपतिस्मा दैबे बारे यूहन्‍ना के बारे में बताबौ सुरू करौ “तुम बेहड़ में का देखबे गये हते? का हबा में हलते भये सरकन्‍डे कूं?

²⁵ तब फिर तुम का देखबे गये हते? का काऊ आदमीए जानें भौत ऊजरे कपड़ा पहने हते? बे लोग जो भौत ऊजरे कपड़ा पैहनतें और जो भोग-बिलास का जीबन जीबतैं, बे तौ राज-भवनन मेंई पाये जातैं।

²⁶ पर तुम बताऔ कै का देखबे गये हते? कै काऊ परमेस्‍वर की ओर ते बातन कूं बतायबे बारे कूं? हाँ, मैं तुम्हें बताबतूं, जो तुमनें देखौए बू परमेस्‍वर की ओर ते बात बतायबे बारे तेऊ महान है।

²⁷ जि बूईए जाके बारे में लिखौ गयौ है, “‘देख मैं तोते पैहलेई अपनों दूत भेज रयौऊं, बू तोते पैहले तेई रस्ता तैयार करैगौ।’”

²⁸ मैं तुमें बताबतूं कै, “औरतन ते पैदा हैबे बारेन में यूहन्‍ना ते बड़ौ कोई नांय। पर फिरऊ परमेस्‍वर के राज में छोटे ते छोटौ आदमी अऊं बाते बड़ौ है।”

²⁹ यूहन्‍ना ते बपतिस्मा पाये भये लोगन नें और चुंगी लैबे बारेन नेऊं ईसू की ये बात सुनिकै मान लयौ कै परमेस्‍वर कौ रस्ता सहिए और सच्‍चौ है।

³⁰ पर फरीसी और सास्त्रन कूं सिखाबे बारेन नें बाते बपतिस्मा नां लियौ और परमेस्‍वर के उद्‍देस्‍य कूं ठुकराय दयौ।

³¹ ईसू नें फिर कही, “तौ फिर मैं जा पीढ़ी के लोगन की बराबरी कौन ते करूं कै बे कैसै हैं?

³² बे लोग बाजार में बैठे बिन बालकन के समान हैं जो एक दूसरे ते कहतें कै, “‘हमनें तुमारे काजै बांसुरी बजायी पर तुम नांय नांचे। हमनें तुमारे काजै सोक-गीत गाये पर तुम नांय रोये।’

³³ चौंकि बपतिस्मा दैबे बारौ यूहन्‍ना आयौ जो ना तौ रोटी खातो और न ही अंगूर कौ रस पीतौ और तुम कैहतौ कै, ‘बामें दुस्‍ट आतमाएं।’

³⁴ फिर मैं, ‘मनुस्‍य कौ बेटा’ खाते पीते भए आयौ, तौ तुम बाते कहतौ, ‘कै देखौ जि तौ पेटू है, पियक्‍कड़ है, जि तौ चुंगी लैबे बाये और पापिन कौ संगी है।’

³⁵ परमेस्‍वर की बुद्धी के पीछे चलबे बारे लोगई परमेस्‍वर की बुद्धी कूं सही साबित करते हैं।”

सिमौन फरीसी

³⁶ तब काऊ फरीसी नें ईसू कूं अपने याँपै भोजन करबे काजै बुलायौ। सो बू फरीसी के घर गयौ और वाके घर में भोजन करबे बैठा।

³⁷ बई नगर में एक पापी औरत हती, जब बाय जि पता लगौ कै ईसू एक फरीसी के घर में भोजन कर रयोए तौ बू संगमरमर की एक सीसी में इत्र लैके आयी।

³⁸ बू वाके पीछे वाके जौरें पामन की ओर खड़ी हती। बू रोय रयी हती अपने आँसुन तै बू वाके पामन कूं भिगो रयी, फिर बानें ईसू के पामन कूं अपने बालन ते पौछ कें वाके पामन कूं चूमने लगी और वाके पामन पै इत्र उड़ेल दयौ।

³⁹ बू फरीसी जानें ईसू कूं अपने घर बुलायौ हतो, जि देखकै मन ही मन सोचौ कै, “अगर जि परमेस्‍वर की ओर ते बाते बतायबे बारौ होतौ तौ बू जान जातौ कै बाकूं छूबे बारी जि औरत कोए? बू जान जातौ जि तौ पापिन है।”

⁴⁰ ईसू नें बाते कही, “सिमौन मोय तोते कछू कहनोंए।” बू बोलौ, “गुरू, कह।”

⁴¹ ईसू नें कही “काऊ साहूकार कौ दो आदमी पै कर्ज हतो। एक पै वाके पाँच सौ चाँदी के सिक्‍का और दूसरे पै पचास हते।

⁴² चौंकि बे कर्ज नांय लौटाय पाये, जा बजैह ते बानें दोनोंन पै दया करी और बिनकौ कर्जा मांफ कर दयौ। अब तू बता दोनोंन में ते बा साहूकार कूं कौन जादा पिरेम करैगौ?”

⁴³ सिमौन नें उत्‍तर दयौ, “मेरौ बिचार है, बू जाकौ बानें जादा कर्ज मांफ करौ।” ईसू नें कही, “हाँ तैनें सही उत्‍तर दयौए।”

⁴⁴ फिर ईसू नें बा औरत की और मुड़क कै बू सिमौन ते बोलौ, “तू जा औरत कूं देख रयोए मैं तेरे घर में आयौ, तब तैने मेरे पांम धोयबे काजै मोय पानीअऊं नांय दयौ, पर जानें तौ मेरे पांम आँसुन ते भिगोये हैं और फिर बानें अपने बारन ते पौंछौए।

⁴⁵ तैने मेरे स्‍वागत में मोय गलेऊ नांय लगायौ पर जब ते मैं भीतर आयौऊं तब ते जि मेरे पामन कूं लगातार चूंम रयी है।

⁴⁶ तैने तौ मेरे सिर पै तेलऊ नां लगाऔ, पर जानें तौ मेरे पामन पै इत्र मलौए।

⁴⁷ जामारै मैं तोते कैहतूं कै, जाकौ जि भौत गहरौ पिरेम जि दिखावते, कै जाके भौत पाप छमा करे गए हैं, पर जाके थोड़े पाप छमा करे गए हैं जानें थोड़ौ पिरेम करौऐ।”

⁴⁸ तब ईसू नें बा औरत ते कही, “तेरे पाप छमा कर दये गये हैं।”

⁴⁹ फिर जो लोग वाके संग भोजन कर रये हते बे मन ही मन सोचबे लगे, “जि को आदमी है जो पापन कीऊ छमा देतुए?”

⁵⁰ तब ईसू नें बा औरत ते कही, “तेरे भरोसे नें तोय बचायौ है। सान्‍ती के संग चली जा।”