लूका 22 - बृज भासा

यहूदा इस्करियोती कौ बिसबास घात

¹ अखमीरी रोटी कौ तौहार जो फसह के नाम ते जानों जातै, बू आबे बारौ हतो।

² और यहुदी पिरधान पुरोहित और सास्त्रन कूं सिखाबे बारे ईसूए मारबे कौ उपाय ढ़ूढ रये, पर बिनै लोगन ते डर लगतौ हतो।

ईसू कूं पकरबाबे काजै यहूदा राजी भयौ

³ ईसू के बारह भेजे भये चेलान में ते एक में सैतान घुस गयौ जो यहूदा इस्करियोती कैहलातौ।

⁴ बानें जायकै बड़े पिराथना घर के यहुदी पिरधान पुरोहितन ते और सिपाइन के अधिकारिन ते बात करी कै, बू कैसै ईसूए बिनके हात में पकरबाबें।

⁵ बे भौत खुस भये और जाके बदले में बिन्‍नें बाय पईसा दैबे कौ बादा करौ।

⁶ और यहूदा राजी है गयौ और ऐसौ मौकौ ढ़ूढबे लगौ जब भीड़ भाड़ ना होय तब बू ईसूए बिनके हातन में बिसबास घात करकै पकरबा दैबै।

चेलान के संग ईसू कौ आखरी भोज

⁷ तब बिना खमीर की रोटी कौ तौहार आयौ जामें फसह के काजै मैमना की बली दैवौ जरूरीऔ।

⁸ ईसू नें पतरस और यूहन्‍ना कूं जि कैहके भेजौ जाऔ और हमारे काजै फसह कौ भोजन तईयार करौ जाते हम बाय खा सकैं।

⁹ बिन्‍नें ईसू ते पूंछी, “तू का चाहबें? कै हम काँपै भोजन की तईयारी करै।”

¹⁰ ईसू नें बिनते कही, “देखौ, नगर में घुसतेई तुमें एक आदमी मिलैगौ, जाके हात में मटका होगौ और जा घर में बू घुसै, बा घर में तुम वाके पीछे चले जईयों।

¹¹ और बा घर के मालिक ते कहियों, ‘गुरू नें पूंछी है, कै बैठक की जगैह काँ है, जामें मैं अपने चेलान के संग फसह कौ भोजन खा सकूं?’

¹² और बू तुमें ऊपर कौ सजौ सजायौ कमरा दिखा दैबेगौ मँईपै तईयारी करियों।”

¹³ जाके बाद बू नगर में गये और जैसौ ईसू नें बतायौ बिन्‍नें माँपै बेसोई पायौ और बिन्‍नें फसह के भोजन की तईयारी कर लयी।

पिरभू भोज

¹⁴ जब बू समै आयौ तौ ईसू अपने भेजे भये चेलान के संग भोजन करबे बैठौ।

¹⁵ और बानें चेलान ते कही मेरी बड़ी इच्‍छा हती कै दुख भोगबे तै पैहले मैं जि फसह कौ भोजन तुमारे संग खांऊ,

¹⁶ चौंकि में तुमते कैह रयौ हूं कै जब तक परमेस्‍वर के राज में जा भोजन कौ मतलब पूरौ ना है जाबेगौ, तब तक मैं जाय दुबारा ना खाऊंगौ।

¹⁷ तब ईसू नें प्यालौ लैके धन्यबाद की पिराथना करी और कही, “लेओ और जायें आपस में बांट लेओ।

¹⁸ चौंकि मैं तुमते कैह रयौऊं कै जब तक परमेस्‍वर कौ राज ना आबेगौ तब तक मैं अंगूर कौ रस नांय पीऊंगो।”

¹⁹ फिर ईसू नें रोटी लयी और धन्यबाद करिकै तोड़ी और बिनकूं जि कैहते भये दयी कै, “जि मेरौ सरीर है जो तुमारे काजै दयौ जा रयौ है, मेरी याद में ऐसेई करै करियों।”

²⁰ और जाई तरैह ते ईसू नें भोजन के बाद चेलान कूं प्यालौ दयौ और कही, “जि प्यालौ मेरे बा खून के रूप में है, जो तुमारे काजै बहायौ जातै जि परमेस्‍वर कि नई बाचा है।

²¹ “पर देखौ, मेरे संग बिसबास घात करबे बारौ मेरे संग जा मेज पै भोजन कर रयौ है।

²² चौंकि मुझ, ‘मनुस्‍य के बेटा’ कौ तौ मरनों पक्‍कौ है जैसौ कै निस्चित करौ गयौ है। पर धिक्‍कार है बा आदमी कूं जो मोय बिसबास घात करकै पकरबाबैगौ।”

²³ चेला आपस में एक दूसरे पूंछबे लगे, “कै हम में ते कौ है जो जि काम करैगौ?”

सबनते बड़ौ कौन?

²⁴ और चेलान में जि बाद बिबादऊ भयौ कै “हम में ते कौन बड़ौ है?”

²⁵ ईसू नें बिनते कही, “गैर यहुदियन के राजा बिनपै प्रभुता रखैं और जो बिनके सरदार हैं, बेऊ बिनपै अधिकार कौ प्रयोग करतै ‘बे खुद कूं लोगन का उपकारक’ कहलबाबों चाहबें।

²⁶ पर तुम ऐसे नांय हत बल्कि जो तुम में बड़ौ है बू छोटे कि तरैह ते और जो पिरधानें बू सेबक जैसे बनियों।

²⁷ चौंकि बड़ौ कौ है, जो मेज पै बैठकै भोजन कर रयौ है, या बू जो परोस रयौ है? का बुई नांय जो भोजन पै बैठौ है? पर मैं तौ तुमकूं भोजन परोसबे बारौ सेबक जैसौ हूं।

²⁸ “तुम बेई है जो समस्‍याओं के समै में लगातार मेरे संग रहे।

²⁹ और मैं तुमें बैसेई राज दै रयौ हूं जैसे मेरे पिता नें जाये मोय दयौ हतो,

³⁰ ताकि तुम मेरे राज में मेरी मेज पै खाऔ पीऔ और राजगद्‍दी पै बैठकै इसरायल के बारह गोतन कौ न्याय करौ।”

पतरस के पहचानबे की बात ईसू नें पैहलेई बताई

³¹ ईसू नें पतरस कही, “सिमौन, हे सिमौन देख जैसे एक किसान नाज कूं फटककै भूसे ते अलग करतै, बैसेई तुम सबन की परीछा लैबे की सैतान नें आग्‍या लै लयी है।

³² पर मैंनें तेरे काजै पिराथना करी है कै तेरौ भरोसौ ना डगमगाबें और जब तू बापस आबें तौ अपने भईयन कूं सम्भाल लैबें।”

³³ तब पतरस नें ईसू ते कही, “हे पिरभू, मैं तेरे संग जेल जायबे और मरबे कूअऊं तईयार हूं।”

³⁴ तब ईसू नें पतरस ते कही, “कै मैं तोते कह रयौ हूं आज सबेरे मुरगा के बांग दैबे तै पैहले तू मोय तीन बार पहचानबे ते मनें कर दैबेगौ कै ‘मैं बाय नांय जानूं।’”

दुख भोगबे काजै तईयार रैहबौ

³⁵ तब ईसू नें चेलान ते कही, “जब मैंनें बटुआ, थैला और जूतियों के बगैर भेजौ हतो तौ का तुमें काऊ चीज की कमी भयी?” बिन्‍नें कही, “काऊ चीज की कमी नांय भयी।”

³⁶ ईसू नें बिनते कही, “पर अब, जाके जौरें बटुआ होबे, बू बाय लै लैबे और थैलऊ लै लेऔ और जाके जौरें तलबार ना होबै, बू अपनी लोईऐ बेचकै एक तलबार खरीद लेऔ।

³⁷ चौंकि मैं तुमते कैह रयौ हूं, जो लिखौ भयौ है कै, ‘मैं अपराधिन के संग गिनों जाऊंगो,’ वाकौ मोमें पूरौ हैवौ जरूरी है, चौंकि मेरे बारे में लिखी बातें पूरी हैबै पै है।”

³⁸ चेलान नें कही, “देख पिरभू हमारे जौरें दो तलबार हैं।” तब ईसू नें कही, “बस भौत हैं।”

जैतून के पहाड़ पै ईसू की पिराथना

³⁹ जाके बाद ईसू मांपै ते बाहर निकरकै रोजाना की तरैह ते जैतून पहाड़ पै चलौ गयौ। और चेलाऊ वाके पीछे-पीछे गये।

⁴⁰ ईसू नें पहाड़ पै पौहचकै चेलान ते कही, “पिराथना करौ जाते तुमें परीछा में ना पड़नों परै।”

⁴¹ तब बू काऊ डेला कूं जितनी दूर तक फेंकौ जा सकतौ लगभग बिनते उतनी दूर चलौ गयौ। और घोंटू के बल बैठकै पिराथना करबे लगौ।

⁴² “हे पिता, यदि तू चाहबें तौ मेरे सामने ते जा दुख भरे प्यालेऐ हटा लै, तौऊं मेरी नांय तेरी इच्‍छा पूरी होबें।”

⁴³ तबई माँपै एक सुरग दूत पिरकट भयौ जो बायें सामर्थ देतौ।

⁴⁴ और ईसू बड़ी बैचेनी के संग औरऊ मन की बेदना ते पिराथना करबे लगौ वाकौ पसीना मानों खून की बड़ी बड़ी बूंदन की नाईं धरती पै गिर रयौ हतो।

⁴⁵ और जब बू पिराथना करकै अपने चेलान के जौरें आयौ तौ बिनै उदासी केमारै थके भये सोतौ भयौ पायौ।

⁴⁶ तब ईसू नें बिनते कही, “चौं सो रये हौ? उठौ, पिराथना करौ कै तुमें परीछा में नांय पड़नों परै।”

ईसू कौ पकरबायौ जानों

⁴⁷ बू जि कह ही रयौ हतो कै एक भीड़ आयी और बारह भेजे भये चेलान में ते एक चेला जाकौ नाम यहूदा हतो बू बिनके आगे-आगे आ रयौ हतो। बू ईसूए नमस्‍कार करबे काजै वाके जौरें आयौ और बाकूं चूमों।

⁴⁸ ईसू नें बाते कही “हे यहूदा, का तू मुझ, ‘मनुस्‍य के बेटाए’ बिसबास घात करकै पकरबाबे काजै चूम रयौ है?”

⁴⁹ जब वाके चेलान नें देखी कै का हैबे बारौ है, तब बिन्‍नें कही, “हे पिरभू का हम तलबार चलाबें?”

⁵⁰ और बिनमें ते एक नें यहुदी महा पुरोहित के दास कौ सूधौ कान काट दियौ।

⁵¹ जापै ईसू नें कही, “अब बस करौ” और वाकौ कान छूकै बू सही कर दियौ।

⁵² फिर ईसू नें यहुदी पिरधान पुरोहितन और बड़े पिराथना घर के अधिकारिन और बुजुर्ग यहुदी नेतन ते कही, जो बायें पकरबे काजै आये “का तुम मोकूं डाकू समझकै तलबार और लठ्‌ठन नें लैके आये हौ?

⁵³ जब मैं बड़े पिराथना घर में रोजाना तुमारे संग हतो, जब तौ तुमनें मैं पकरौ नांओ पर जि समै तुमारौ है और जापै अंधेरे कौ अधिकार है।”

पतरस नें ईसू कूं नकारौ

⁵⁴ फिर बे ईसूए पकरकै यहुदी महा पुरोहित के घर लै गये और पतरस बिनते दूरई दूर रैहकै बिनके पीछे-पीछे आयौ।

⁵⁵ जब पेहरेदार आंगन में आग जरायकै ताप रये हते और पतरसऊ बिनके बीच में बैठकै तापबे लगौ।

⁵⁶ तब एक दासी आँच के उजीते में पतरस कूं बड़े गौर ते देखकै कैहबे लगी, “जि बुई है जो ईसू के संग हतो।”

⁵⁷ और पतरस नें बाते जि कैहकै मनें कर दई कै, “हे नारी मैं बाय नांय जानूं।”

⁵⁸ कछू देर बाद काऊ आदमी नें बाय देखकै कही, “तू अऊ तौ बिनमें तेई है।” पतरस नें कही, “अरे भले मान्स, मैं बिनमें ते नांऊ।”

⁵⁹ फिर एक घन्‍टा बाद एक और आदमी जोर दैकै कैहबे लगौ, “जेऊ तौ वाके संग हतो। चौंकि जि गलील कौ रैहबे बारौ है।”

⁶⁰ पर पतरस नें कही, “अरे भले मान्स, मोय नांय पतौ कै तू का कैह रयौ है। बू जि कैही रयौ हतो कै तबई मुरगा नें बांग दई।”

⁶¹ तब पिरभू नें मुड़कै पतरस की ओर देखी और पतरस कूं बू बात याद आयी जो पिरभू नें बाते कही हती, “कै आज मुरगा के बांग दैबे ते पैहले तू तीन बार मोय पैहचानबे ते मनें करैगौ।”

⁶² और पतरस बाहर निकरकै फूट-फूट के रोबे लगौ।

सिपाइयन नें ईसू कौ मजाक उड़ायौ

⁶³ जि आदमिन नें ईसू पकर रखौ हतो बे वाकौ मजाक बनाकै बाय पीटबे लगे।

⁶⁴ और वाकी आँखन पै पट्टी बांधकै बाते पूँछबे लगे कै, “भविस्‍यबानी करकै बता तोय किन्‍नें पीटौ है?”

⁶⁵ और बिन्‍नें भौत सी निन्दा की बात वाके बिरोध में कही।

यहुदी महापंचायत के सामने ईसू

⁶⁶ जब दिन निकरौ तौ यहुदी बुजुर्ग नेता और यहुदी पिरधान पुरोहित और सास्त्रन कूं सिखाबे बारे इकठ्‌ठे भये और ईसूए यहूदी महापंचायत में लै जायकै पूंछी,

⁶⁷ “यदि तू मसीह है तौ हमकूं बता दै।” ईसू नें बिनते कही, “अगर में तुमनें बताय दऊं तौ तुम मेरौ भरोसौ नांय करिंगे।

⁶⁸ और अगर मैं तुमते पूछुंगो, तौ तुम जबाब नांय दिंगे।

⁶⁹ पर अब ते मैं, ‘मनुस्‍य कौ बेटा’ सर्वसक्‍तिमान परमेस्‍वर के सीदे हात की ओर बैठुंगौ।”

⁷⁰ जापै सबनें कही, “तौ का तू परमेस्‍वर कौ बेटा है?” ईसू नें बिनते कही, “तुम खुदई तौ कैह रये हो। चौंकि मैं हतूं।”

⁷¹ तब बिन्‍नें कही, “अब हमें और गबाही की का जरूरतै, चौंकि हमनें खुदई वाके मौंह ते सुन लयी है।”