यूहन्‍ना 19 - बृज भासा

ईसू कूं मौत की सजा

¹ तब पिलातुस ने ईसू कूं कोड़े लगबाए।

² सैनिकन ने कांटे की लकड़ियां तौर के उनको एक मुकुट बनांयौ और वाके सिर पै रख दियौ। और बाय साही पोसाक पैहनांयी,

³ और वाके जौरें आयकै कही, “यहुदियन के राजा की जय हो!” और फिर वाके थप्पड़ मारबे लगे।

⁴ पिलातुस एक बार फिर बाहर आयौ बिनते बोलौ, “देखौ मैं जाय फिर बाहर लाय रयौऊं ताकि तुम जान जाओ के मैंनें जामें कोई दोस नांय पायो।”

⁵ जब ईसू साही पोसाक और कांटेन कौ मुकुट पहनकै बाहर आयौ। तब पिलातुस ने बिनते कही, “जि रयो बू आदमी।”

⁶ पिरधान पुरोहितन नें और बडे़ पिराथना घर के पैहरेदारन ने जब बाकूं देखौ तौ बे चिल्‍लाय चिल्‍लायकै कैहबे लगे, “जाय क्रूस पै चढ़ाऔ, क्रूस पै चढ़ाऔ।” पर पिलातुस ने बिनते कही, “तुमईं जाय लै जायकै क्रूस पै चढ़ाऔ। मोय तौ जामें कोई दोस नांय मिलौ।”

⁷ यहुदियन ने कही, “के हमारी व्‍यबस्था तौ जि कैहतै कै जाय तौ मरनौ परैगौ, चौंकि जानें परमेस्‍वर कौ बेटा हैबे कौ दाबा करौऐ।”

⁸ जब पिलातुस ने उनकूं जि कैहत भये सुनौ, तौ बू भौत डर गयौ।

⁹ और फिर पिलातुस नें राज भवन में भीतर जायकै ईसू ते पूछी, “कै तू काँते आयौए?” पर बानें कोई जबाब नांय दयौ।

¹⁰ पिलातुस ने बाते कही, “का तू मोते बात करबौ नांय चाहत? का तू नांय जानत के मैं तोय छोड़बे कौ अधिकार रखतूं और क्रूस पै चढ़ाबे कौऊ अधिकारै?”

¹¹ ईसू नें बाते कही, “तोय तब तक मोपै कोई अधिकार नांय है सकै, जब तक बू तुमें परम पिता के द्वारा नांय दयौ गयौ होतो, जामारै जा आदमी नें मोय तेरे हबाले करोऐ बू मोतेउ जादा पापी है।”

¹² जि सुनिकै पिलातुस बाय छोड़बे को उपाय ढूढबे लगो। पर यहुदी चिल्‍लाये, “अगर तू जाय छोड़तुए तौ केसर कौ मित्र नांय, अगर जो कोई अपने आप कूं राजा हैबे कौ दाबा करतुए तौ बू राजा कैसर कौ बिरोधीए।”

¹³ जब पिलातुस ने जि बात सुनी, तौ बू ईसू कूं बाहर बा जगैह पै लै गयौ जो पत्‍थर को चौंतरा कहौ जाबतो। जो इब्रानी में गब्बता कहौ गयौ। बू न्याय की गद्‍दी पै बैठो।

¹⁴ जि लगभग दुपैरी के समै, फसह के तौहार की तैयारी कौ दिन हतो। पिलातुस ने यहुदिन ते कही कै, “जि रयौ तुमारौ राजा।”

¹⁵ फिर बे चिल्‍लाए जाय लै जाऔ, “जाय लै जाऔ। जाय क्रूस पै चढाय देऊ।” पिलातुस ने कही, “तुम का चाहतो कै तुमारे राजा कूं क्रूस पै चढ़ाऊं?” जा बात पै पिरधान पुरोहितन नें कही, “केसर कूं छोड़कै हमारौ कोई दूसरौ राजा नांय।”

¹⁶ फिर पिलातुस ने ईसू कूं क्रूस पै चढ़ाबे काजै उनकूं सौंप दयौ। जा तरैह ते सिपाइन नें ईसू कूं अपने कब्जा में लै लयौ,

ईसू कौ क्रूस पै चढ़ायबौ

¹⁷ और तब बे ईसू कूं वाकौ क्रूस बापे लादकै बा जगैह पै लै गये जो खोपड़ी की जगैह कही जाबती। जाय इब्रानी में गुलगत्‍ता कैहते हते।

¹⁸ म्हांपै उन्‍नें ईसू कूं और वाके संग दो लोगन कूं क्रूसन पै चढ़ायौ। एक कूं सीदे हात की तरह और एक कूं उल्टे हात की तरफ और बीच में ईसू कूं लटकायौ।

¹⁹ पिलातुस ने जि दोस पत्र लिखकै क्रूस पै लगबाय दयौ कै “ईसू नासरी, यहुदियन कौ राजा।”

²⁰ भौत ते यहुदियन ने बू दोस पत्र पढ़ौ चौंकि जा जगैह पै ईसू कूं क्रूस पै चढ़ायौ गयौ हतो बू नगर के जौरेंई हतो। और बू दोस पत्र इब्रानी और लतिनी और यूनानी भासा में लिखौ हतौ।

²¹ यहुदियन के पिरधान पुरोहितन नें पिलातुस ते जि बिनती करी कै, “ऐसे मत लिखबा कै जि यहुदियन कौ राजा है। पर ऐसे लिखबा कै ‘जि यहुदियन कौ राजा हैबे कौ दाबा करतै।’”

²² पिलातुस ने कही, “मैंनें जो लिख दई सो लिख दई।”

²³ जब सिपाही ईसू कूं क्रूस पै चढ़ाय चुके तब उन्‍नें वाके कपड़न कूं चार हिस्सन में बाट दये, हरेक सिपाई ने एक-एक हिस्सा लै लियौं। उन्‍नें कुर्तऊ उतार लयौ चौंकि बू ऊपर ते नीचे तक पूरौ बिनां सिलाई के बनों भयौ हतो।

²⁴ जामारै उन सबन ने कही, “कै जाय मत फारौ जाके ऊपर परची डारौ कै जाय को लैबेगौ।” जाते पबित्र सास्त्र कौ बू वचन पूरौ होय, “उन्‍नें मेरे कपड़ा आपस में बांट लये और मेरे कपड़न काजै परची डारी।” सिपाइयन ने ऐसौई करौ।

²⁵ ईसू के क्रूस के जौरें वाकी मईया मरियम और मईया की बहन क्‍लोपास की पत्नी मरियम और मरियम मगदलीनी ठाड़ी हतीं।

²⁶ ईसू नें अपनी मा और अपने बा चेला कूं अपने जौरें ठाड़े देखौ जाते बू पिरेम करतौ हतो। तौ बानें अपनी मा ते बा चेला कै माऊं इसारौ करकें कही, “हे माँजी, जि तेरौ बेटाऐ।”

²⁷ और जाके बाद उन चेला ते कही, “कै जि तेरी मईया है” और फिर बू चेला बाई समै बाय अपने घर लै गयौ।

ईसू कौ मरबौ

²⁸ तब ईसू नें जि जान लई कै अब सब कछू पूरौ है चुकौ, फिर जि जामारै कै पबित्र सास्त्र में लिखी भई सब बात पूरी होय और बानें कही, “मैं पियासौऊं।”

²⁹ म्हांपै सिरका ते भरौ भयौ बरतन रखौ हतो। बिन्‍नें एक सोख्ता बामे डुबाय कै सरकन्डा पै रखकें बू ईसू के मौंह पै लगाय दयौ।

³⁰ जब ईसू नें बू सिरका चखौ तौ कही, “पूरौ भयौ” और इतनौ कैहके बानें अपनों सिर झुकायकै अपने पिरान छोड दये।

³¹ जि फसह की तईयारी कौ दिन हतो, और जाके अगले दिन यहुदियन के आराम कौ दिन हतो। यहुदियन ने पिलातुस ते जायकें कही, “कै बू आग्‍या देय के हम उनकी टांग तोड़ दई जाय और उनकी लास क्रूस पैते हटाय दई जाय।” चौंकि यहुदी नेता नांय चाहते कै आराम के दिन में वाकी लास टगी रैहबै।

³² तब सिपाई आये उनमें ते पैहले, पैहले की और फिर दूसरे की टांग तोड़ी। जो ईसू के संग क्रूस पै चढ़ाये गये हते।

³³ जब बे ईसू के जौरें आये तौ उन्‍नें देखौ के बू पैहलेई ते मर गयौ हतो। जा बजे ते वाकी टांग नांय तोड़ी।

³⁴ तबई एक सिपाई ईसू के जौरें आयौ और वाकी पसली के नीचे भालौ छेदौ तौ बामे ते खून और पानी बैह निकरौ।

³⁵ जानें जि देखौए बे जाकी गबाही देतै और उनकी गबाही सच्‍चीऐ। बू जानतुए के बू सही बोल रयौए जाते लोग बापै भरोसौ करें।

³⁶ जि सब कछू जा बजैह ते भयौऐ के पबित्र सास्त्र में लिखी भई सब बात पूरी होय, “वाकी एकऊ हड्‍डी नांय तोरी जाबैगी।”

³⁷ और पबित्र सास्त्र में जेऊ लिखी भयीऐ, “जिन्‍ने वाके भालौ छेदौ बे वाकी ओर ताकिंगे।”

ईसू कौ दफनांयौ जानों

³⁸ जाके बाद अरिमतिया कौ यूसुफ जो ईसू कौ चेला हतो, बू यहुदियन के डरके मारै अपने आपकूं छिपायके रखतो। बानें पिलातुस ते बिनती करी कै बू बाय ईसू की ल्हास की लै जायबे की अनुमती दै दै। पिलातुस ने बाय अनुमती दै दयी। और बू ईसू की ल्हास कूं लै गयौ।

³⁹ निकुदेमुस जो रात कूं ईसू के जौरें रात कूं पैहले मिलबे आयौ हतो बू तीस किलो के लगभग मिलौ भयौ गन्धरस और ऐलबा लैकें आयौ। फिर बे ईसू की ल्हास कूं ले गये।

⁴⁰ और यहुदियन की घाड़बे की रीति के अनुसार खुसबूदार चीजन के संग कफ्फन में लपेट दयौ।

⁴¹ ज्हांपै ईसू कूं क्रूस चढ़ायो गयौ हतो म्हापे एक बगीचा हतो और चट्टान में खुदी भई नई कब्र हती, जामें अबई तक काऊ की लास नांय रखी गयी हती।

⁴² चौंकि बू यहुदियन के आराम दिन की तैयारी कौ सुक्रबार बारौ दिना हतो बू कब्र भौत जौरें हती ईसू कूं बाई में रख दयौ।