यूहन्‍ना 14 - बृज भासा

ईसू परमेस्‍वर के जौरें जाबे कौ रस्ता है

¹ ईसू नें अपने चेलान ते कही, “तुम मन कूं कच्‍चौ मत करौ। तुम परमेस्‍वर पै भरोसौ करौ और मोपैऊ भरोसौ करौ।

² मेरे पिता के घर में भौत रैहबे काजै जगैह है, अगर ऐसौ ना होतौ तौ मैं तुमते कह देतौ, चौंकि मैं तुमारे रैहबे काजै जगैह तैयार करबे जाय रयौऊं।

³ मैं म्हांपै जायके तुमारे काजै जगैह तैयार करबे के बाद दुबारा तुमें अपने संग अपने पिता कै घर लै जाऊंगौ, जाते ज्हां मैं रहूं म्हांपै तुमऊ रहौ।

⁴ और ज्हांपै मैं जा रयौऊं म्हां कौ रस्ता तुम जानतौ।”

⁵ थोमा नें ईसू ते कही, “हे पिरभू, हम तौ जि नांय जानत कै तू कां जाय रयौए। तौ म्हां कौ रस्ता कैसे जान सकतै?”

⁶ ईसू नें बाते कही कै, “मैं रस्ता, सच्‍चाई और जीबन हूं। बिना मेरे कोई पिता के जौरें नांय पौहच सकत।

⁷ अगर तू मोय जान जातौ तौ परम पिता कूंअंऊ जान जातौ और अब तुम बाय जानतौ और बाय देखऊ चुकेऔ।”

⁸ फिलिपुस नें ईसू ते कही, “हे पिरभू, हमेंऊं परम पिता के दरसन करबा दै, हमारे काजै इतनोंई भौत है।”

⁹ ईसू नें कही, “फिलिपुस मैं इतने समै तक तुम लोगन के संग रयौ, फिरऊ तू मोय नांय जानत? जानें मोय देखौए बानें परम पिता कूं देखौए। फिर तू कैसे कैह रयौ है कै, ‘मोय परम पिता के दरसन करबा दै’?

¹⁰ का तोय भरोसौ नांय कै मैं पिता में हूं और पिता मोमें है? मैं जो सिछा देतूं बू मेरी खुद की सिछा नांय, पर मोमें रैहबे बारौ पिता मेरे द्वारा अपने काम करतै।

¹¹ मोपै भरोसौ करौ और मेरी जा बात पै भरोसौ करौ, कै मैं पिता में हूं और पिता मोमें है, नांय तौ बिन महान कामन की बजैह तेई जा बात पै भरोसौ करौ।

¹² मैं तुमते सच कैह रयौऊं, जो मोपै भरोसौ करतै, बू खुद बिन कामन कूं करैगौ जिनें मैं करतूं। सच में बू इन कामन तेऊ बड़े काम करैगौ, चौंकि मैं पिता के जौरें जा रयौऊं।

¹³ जो कछू तुम मेरे नाम ते मांगौगे, मैं बू सब कछू तुमारे काजै करूंगो, जाते बेटा में पिता की महिमा होबें।

¹⁴ अगर तुम मेरौ नाम लैके मोते जो कछू मांगौगे, बू मैं तुमारे काजै करूंगो।

पबित्र आतमा की प्रतिग्‍या

¹⁵ “अगर तुम मोते पिरेम करौगे, तौ मेरी आग्‍यान कूं मानौंगे।

¹⁶ मैं पिता ते बिनती करूंगो और बू तुमें एक दूसरौ सहायक देबेगौ, जो हमेसा तुमारे संग रैहबेगौ।

¹⁷ बू सच कौ आतमाएं, बाय दुनियां नांय अपनांय सकत, चौंकि बू ना तौ बाय देखतै और ना पैहचानतै। पर तुम बाय पैहचानतौ, चौंकि बू तुमारे संग तुम में रैबेगौ।

¹⁸ “मैं तुम लोगन कूं अनाथ छोड़कै नांय जाऊंगो। मैं तुमारे जौरें आऊंगौ।

¹⁹ थोड़े समै कै बाद जि दुनियां मोय फिर नांय देखेगी, पर तुम मोय देखौगे। चौंकि मैं जीबित रहुंगो और तुमऊं जीन्दे रहौगे।

²⁰ बा दिना तुम जान जाऔगे कै, मैं पिता में हूं और तुम मोमेंऔ और मैं तुम में हूं।

²¹ जो मेरी आग्‍या कूं मानतै और उनपै चलतै बू मोते पिरेम करतै। जो मोते पिरेम करतै, बू मेरे पिता तेऊ पिरेम करैगौ और मैंऊ बाते पिरेम करुंगो, और मैं अपने आपकूं बापै उजागर करुंगो।”

²² दूसरे यहूदा जो यहूदा इस्करियोती नांय हतो, बानें बाते कही, “हे पिरभू ऐसौ चौंऐं कै तू अपने आपकूं हम पै उजागर करबौ चांहतै और जा दुनियां पै नांय?”

²³ तब ईसू नें बाते कही, “अगर कोई मोते पिरेम करैगौ, तौ बू मेरे वचन कौ पालन करैगौ और बाते मेरौ परमेस्‍वर पिता पिरेम करैगौ और हम वाके जौरें आयेंगे और वाके संग रैहबिंगे।

²⁴ जो मोते पिरेम नांय करत बू मेरे वचन पै नांय चलत। जि सिछा जाय तुम सुन रयेऔ, बू मेरी सिछा नांय, जि तौ मोय भेजबे बारे मेरे परमेस्‍वर पिता की है।

²⁵ “अब जब मैं तुमारे संग हूं, जि बात मैंनें तुमते कह दयी है।

²⁶ पर सहायक पबित्र आतमा जाय परमेस्‍वर पिता मेरे नाम ते भेजैगौ, तुमें सब कछू बताय देगौ और जो कछू मैंनें तुमते कही है, बिनें तुमें याद कराबैगौ।

²⁷ मैं तुमारे काजै अपनी सान्‍ती छोड़ रयौऊं, मैं तुमें खुद अपनी सान्‍ती दै रयौऊं। पर मैं तुमें जैसे जगत के लोग देतै बैसे नांय दै रयौ। तुमारौ मन ब्याकुल नांय होय और बाते मत डरपियों।

²⁸ “तुमनें मोय कैहत भये सुनों हतो कै, ‘मैं तौ जाय रयौऊं और तुमारे जौरें फिर आऊंगौ।’ अगर तुमनें मोते पिरेम करौ होतो तौ तुम मोते खुस होते, चौंकि मैं पिता के जौरें जाय रयौऊं और मेरौ पिता मोते महान है।

²⁹ जि सब बात मैंनें हैबे ते पैहलेई तुमें बताय दयी हैं, कै जब जे बात हौंय तौ तुम भरोसौ करौ।

³⁰ “मैं जादा समै तक तुमते बात नांय करुंगो, चौंकि जा जगत कौ राजा सैतान आय रयोए। पर मोपै वाकौ कोई जोर नांय चलत,

³¹ जि बात तौ जामारै है रयी है कै जा जगत के लोगन कूं पतौ चल जाय कै, मैं पिता ते पिरेम करतूं और परमेस्‍वर पिता नें मोय जैसी आग्‍या दयी है, मैं बैसौई काम करतूं। “अब उठो, य्हांते चलें।”