यूहन्‍ना 13 - बृज भासा

ईसू नें चेलान के पाम धोबो

¹ फसह के तौहार ते पैहले कौ दिना हतो। ईसू जि जानतौ कै, “अब मेरौ बू समै आ गयौ है, जब मोय जा संसार कूं छोड़कै पिता के जौरें जानों है।” जा संसार में जो वाके अपने लोग हते, बिनते जैसौ पिरेम करतौ आयौ हतो बैसौई पिरेम अन्‍त तक बिनते करतौ रयौ।

² सैतान साम कूं खानों खायबे के समै तक सिमौन के बेटा यहूदा इस्करियोती के मन में जि डार चुकौ हतो कै बू ईसू कूं धोखे ते पकड़बा दैबे।

³ ईसू जि जानतौ कै, “परमेस्‍वर पिता ने मेरे हातन में सब कछू दै दयौ है और मैं परमेस्‍वर के जौरें आयौऊं और परमेस्‍वर के जौरेंई जा रयौ हूं।”

⁴ जामारै ईसू नें खानों खायबे पैते उठकै अपनों कुर्ता उतारौ और कमर में अँगौछा बांध लियौ।

⁵ तब बू एक परात में पानी भरकै अपने चेलान के पाँम धोबे लगौ और अपनी कमर में बंधे अँगौछे ते पाँमन नें पौंछबे लगौ।

⁶ फिर जब बू सिमौन पतरस के जौरें पौंहचौ तौ पतरस नें बाते कही, “हे पिरभू, का तू मेरे पाँमन नें धोबेगौ?”

⁷ तब ईसू नें बाते कही, “तू अबई नांय जान्‍त कै मैं का कर रयौऊं, पर तू बाद में जान जाबैगौ।”

⁸ पतरस नें ईसू ते कही, “मैं तोय अपने पाँम कबऊ नांय धोन दूँगो।” ईसू नें बाते कही, “अगर मैं तेरे पाँम नांय धोऊंगो तौ तेरौ मोते कोई सम्बन्ध नांय रैहबेगौ।”

⁹ जापै सिमौन पतरस नें ईसू ते कही, “पिरभू, तब तौ मेरे पाँमन नेंई नांय, बल्कि मेरे हातन नें और मेरे सिरऊऐं धो दै।”

¹⁰ तब ईसू नें बाते कही, “जो नहाय चुकौ है, बाय अपने पाँमन के सिबा और कछू धोबे की जरूरत नांय। चौंकि बू पूरी तरैह ते सुद्ध है। तुम लोग सुद्ध हो, पर सबके सब नांय।”

¹¹ ईसू अपने संग बिसबास घात करकै पकरबायबे बारेऐं जानतो हतो जामारै बानें कही हती कै, “तुम सबके सब सुद्ध नांऔ।”

¹² तब चेलान के पाँम धोबे के बाद ईसू नें अपनों कुर्ता लयौ फिर बैठकै बिनते बोलों, “का तुम समझतौ कै मैंनें तुमारे संग का करौऐं?

¹³ तुम मोय, ‘गुरू’ और ‘पिरभू’ कैहतौ, और तुम ठीकई कैहतौ। चौंकि मैं बेई हूं।

¹⁴ जामारै अगर मैंनें पिरभू और गुरू हैके तुमारे पाँम धोये हैं, तौ तुमऊऐं एक दूसरे के पाँम धोने चहिऐं।

¹⁵ चौंकि मैंनें तुमें नमूना दिखायौ है, कै जैसौ मैंनें तुमारे संग करौ है, बैसौई तुमऊं करै करौ।

¹⁶ मैं तुमते सच कैह रयौऊं, सेबक अपने मालिक ते बड़ौ नांय और ना भेजौ भयौ बाते बड़ोऐ जानें बाय भेजौ है।

¹⁷ तुमतौ सच्‍चाई जानतौ अगर तुम इन बातन पै चलोगे तौ तुम धन्य हो।

¹⁸ “मैं जि तुम सबन के बारे में नांय कैह रयौ, मैं जान्‍तू कै मैंनें किन किन लोगन कूं चुनों है। पर जि जामारै भयौ है कै पबित्र सास्त्र कौ बू वचन पूरौ होबै, ‘जानें मेरी रोटी खायी बुई मेरे बिरोध में है गयौ।’

¹⁹ “अब मैं पैहले तेई तुमें जि जामारै बता रयौऊं, कै जब ऐसौ होबै तब तुम भरोसौ करौ कै बू मैंई हूं।

²⁰ मैं तुमते सच कैह रयौऊं, जो मेरे भेजे भयेऐं अपनाबतै, बू मोय अपनाबतै और जो मोय अपनाबतै, बू बाय अपनाबतै जानें मोकूं भेजौ है।”

धोखा दैबे बारे के बारे में ईसू कौ बोलबौ

²¹ जि कैहबे के बाद ईसू की आतमा भौत व्‍याकुल भयी और जि गबाही दयी, “मैं तुम लोगन ते सच कैह रयौऊं तुम में तेई एक मोय धोखे ते पकड़बा दैबेगौ।”

²² चेला एक दूसरे कूं देखत रहे, बे समझ नांय पा रये हते कै बू कौन के बारे में कैह रयौ है।

²³ ईसू के चेलान मेंते एक चेला, जाय बू पिरेम करतौ, बू वाके बगल में बैठौ भयौ हतो।

²⁴ तब सिमौन पतरस नें बाते इसारौ करकै कही, “पूंछ तौ सई, बू कौ है?”

²⁵ तब बा चेला नें धीरे ते ईसू ते पूंछी, “हे पिरभू, बू कौन है?”

²⁶ ईसू नें कही, “बू बेईऐ, जाय मैं जि रोटी कौ टुकड़ा जा कटोरा में डुबोयकै दुंगो।” बानें रोटी कौ टुकड़ा डुबोयकै सिमौन इस्करियोती के बेटा यहूदा कूं दयौ।

²⁷ यहूदा के टुकड़ा लेतेई सैतान बामें घुस गयौ। तब ईसू नें बाते कही, “तोय जो करनों है, बाय जल्दी कर।”

²⁸ पर मांपै बैठे भयेन में कोई जि नांय समझ पायौ कै ईसू नें बाते जि बात चौं कही।

²⁹ यहूदा के जौरें रुपईयन की थैली रैहती जामारै कछू लोग जि समझ रये हते कै ईसू बाते कह रयौ है कै तौहार काजै जरूरी सामान खरीद लै या जि कैह रयौ है कै गरीबन कूं कछू दै दै।

³⁰ तब यहूदा रोटी कौ टुकड़ा लैके बाई समै बाहर चलौ गयौ। जि रात कौ समै हतो।

³¹ जब यहूदा बाहर चलौ गयौ तब ईसू नें कही, “मुझ, ‘मनुस्‍य के बेटा’ की महिमा पिरकट भयी है और मेरे द्वारा परमेस्‍वर की महिमा पिरकट होगी।

³² अगर मेरे द्वारा परमेस्‍वर की महिमा पिरकट होतै, तौ परमेस्‍वरऊ अपने में मुझ, ‘मनुस्‍य के बेटा’ की महिमा पिरकट करैगौ और बू जल्दी अई महिमा पिरकट करैगौ।

³³ “हे मेरे प्यारे बालकौ! मैं और थोड़े समै तक तुमारे संग हूं। तुम मोय ढ़ूढोगे, और जो मैंनें यहुदियन ते कही हती, अब तुमतेऊ बेई कैह रयौऊं, मैं ज्हाँपै जा रयौऊं, मांपै तुम नांय आ सकत।

³⁴ “मैं तुम लोगन कूं एक नयी आग्‍या दै रयौऊं, तुम एक दूसरे ते पिरेम करौ जैसौ मैंनें तुम लोगन ते पिरेम करौ है, बैसेई तुम एक दूसरे ते पिरेम करौ।

³⁵ अगर तुम एक दूसरे ते पिरेम करौगे तौ बाई ते सब लोग जानिंगे कै तुम मेरेई चेला हो।”

पतरस के इनकार की भविस्‍यबानी

³⁶ सिमौन पतरस नें ईसू ते कही, “हे पिरभू, तू काँपै जा रयौ है?” ईसू नें बाते कही, “मैं जाँपै जा रयौऊं, माँपै तू जा समै मेरे पीछे नांय सकत। पर तू बाद में मेरे पीछे आबेगौ।”

³⁷ पतरस नें बाते पूँछी, “हे पिरभू, मैं जा समै तेरे पीछे चौं नांय आ सकत? मैं तेरे काजै अपने पिरान दै दूँगो।”

³⁸ ईसू नें बाते कही, “का तू मेरे काजै अपनों पिरान दैबेगौ? मैं तोते सच सच कैह रयौऊं मुरगा के बांग दैबे ते पैहले तू मोय तीन बार पैहचानबे ते इनकार करैगौ।”