इब्रानियों 3 - बृज भासा

ईसू मूसा ते महान है

¹ हे पबित्र भईया बहनों, तुम जो एक सुरगीय बुलावे के सहभागी हैं, जामारैं परमेस्‍वर के भेजे भये और महा पुरोहित ईसू पै अपनों ध्‍यान लगाये रखौ, जापै हम भरोसौ करैं।

² जा तरैह ते परमेस्‍वर के सबरे घराने में मूसा भरोसेमंद हतो, बाई तरैह ते ईसू अऊ, जानें बाय चुनों है बा परमेस्‍वर के प्रति भरोसेमंद हतो।

³ जैसे घर की अपेछा घर कौ बनाबे बारौ जादा आदर के योग्‍य समझौ जाबै, जाई तरैह ते मूसा की अपेछा ईसू जादा आदर के योग्‍य समझौ गयौ है।

⁴ चौंकि हर एक घर कौ कोई ना कोई बनाबे बारौ रहबै, पर परमेस्‍वर तौ हर चीज कौ सिरजनहार है।

⁵ परमेस्‍वर के सबरे घराने में मूसा एक सेबक के समान भरोसेमंद हतो, बू बिन बातन कौ गबाह हतो जो आबे बारे समै में परमेस्‍वर के द्वारा कही जानी हतीं।

⁶ पर परमेस्‍वर के घराने में मसीह तौ एक बेटा के रूप में भरोसौ करबे योग्‍य है और अगर हम अपने साहस और बा आसा में भरोसे कूं बनांये रखैं तौ हम बइके घराने के हैं।

अबिसबास के खिलाफ चेतावनी

⁷ जामारैं पबित्र आतमा कैहबैं, “अगर आज वाकी अबाज सुनों,

⁸ तौ अपने बाप दादान की तरैह ते अपने मन कूं कठोर मत करौ, जैसे बिन्‍नें बगावत के दिनन में करे हते। जब बिनकी बेहड़ में परीक्छा है रयी हती।

⁹ मोय तुमारे बाप दादान नें परखौ हतो, बिन्‍नें मेरे धीरज की परीक्छा लयी और मेरे काम देखे, जिन नें मैं चालीस साल तक करतौ रहौ!

¹⁰ बू जेई बजैह हती जाते मैं बिन लोगन ते खुस नांय हतो, और फिर मैंनें कही हती, ‘इनके मन सदा भटकते रैहमें, बे मेरे रस्ता जानबौ नां चाहते।’

¹¹ तब मैंनें क्रोध में आयकैं सौगन्ध खाकैं कही हती, ‘बे कबऊ मेरे आराम में पिरबेस नां करिंगे।’”

¹² हे भईया बहनों, सावधान रहौ, कऊं तुम लोगन में काऊ के मन में इतनी बुराई और अबिसबास न समा जाबे जो तुमें जीबित परमेस्‍वर तेई दूर भटका देय।

¹³ जब तक बू “आज” बनों रैहबै, तुम लोग रोजीना एक दूसरे कौ धीरज बंधाते रहौ जाते कै तुम में ते कोई पाप के फन्दा में परकै कठोर नां बन जाबै।

¹⁴ अगर हम अंत तक मजबूती के संग अपने सुरू के भरोसे में बने रैहमें तौ हम मसीह के भागीदार बन जामें।

¹⁵ जैसौ कै पबित्र सास्त्र में लिखौ भयौ है, “अगर तुम आज वाकी जि अबाज सुनों, तौ अपने मन कूं कठोर मत करौ, जैसे पैहले तुमारे बाप दादान नें बगावत के दिनन में करे हते।”

¹⁶ जिन लोगन नें अबाज सुनकें बिद्रोह करौ हतो, बे कौन हते? का बे, बेई नांय हते, जिनकूं मूसा नें मिस्र देस ते बचाकै निकारौ हतो?

¹⁷ परमेस्‍वर चालीस साल तक किन लोगन पै क्रोधित रहौ? का बिनई ते नांय जिन्‍नें पाप करौ हतो और जिनकी लास बेहड़ में पड़ी रयीं हतीं?

¹⁸ परमेस्‍वर नें किन लोगन के बारे में सौगन्ध खाकै कही हती कै, “बे मेरे आराम में पिरबेस नां कर पांगे?” का बे बेई नांऐ, जिन्‍नें वाकी आग्‍या कूं नांय मानों हतो?

¹⁹ जा तरैह ते हम देखतै कै बे अपने अबिसबास की बजैह तेई पिरवेस नां कर पांगे।