इब्रानियों 2 - बृज भासा

सावधान रैहबे की चेतावनी

¹ जामारैं हमें जो सन्देस मिलौ है, बापै अच्‍छी तरैह ध्‍यान देनों चहिऐ। कऊं ऐसौ ना होय कै हम रस्ता ते भटक जामें।

² अगर सुरग दूतन के द्वारा दिये भये सन्देस कौ इतनों महत्व होतो कै वाके हर एक अपराध और आग्‍या ना मानबे कौ उचित दन्‍ड मिलौ।

³ अगर हम बा महान मुक्‍ती कूं ना मानें तौ हम कैसे बच सकिंगे? जाकी घोसना पैहले पहल पिरभू द्वारा भयी हती, जिन लोगन नें पिरभू कूं सुनों, बिन्‍नें बिनके सन्देस कूं हमारे काजै पक्‍कौ करौ है।

⁴ परमेस्‍वर नें चिन्ह, चमत्‍कार, और तरैह-तरैह के महान कामन और अपनी इच्‍छा के अनुसार पबित्र आतमा के वरदानन द्वारा जा उद्धार कौ सबूत दियौ है।

उद्धारकरता मसीह कौ मानव सरीर

⁵ परमेस्‍वर नें बा आबे बारे संसार कूं, जाकी चरचा हम कर रये हैं, सुरग दूतन के अधीन नां करौ।

⁶ पबित्र सास्त्र में जाके बारे में काऊ नें जि गबाही दई है, “मनुस्‍य का है, जो तू वाकी सुधि लेतै? ‘मनुस्‍य कौ बेटा’ का है, जाके काजै तू चिन्‍तित है?

⁷ तैने बाय सुरग दूतन ते कछूई छोटौ बनांयौ, और बाय महिमा और आदर कौ मुकुट पहनांयौ।

⁸ तैनें सब कछू वाके पामन के नीचे कर दियौ।” जामारैं जब परमेस्‍वर नें सब कछू वाके अधीन कर दियौ, तौ बामें कछू ऐसौ नांय छोड़ौ, जो वाके अधीन ना होय। हकीकत में हम अब तक जि नांय देखैं कै सब कछू वाके अधीन है।

⁹ पर हम जि देखैं कै मौत की यातना सैहबे की बजैह ते ईसू कूं महिमा और आदर कौ मुकुट पहरायौ गयौ है। बू सुरग दूतन ते कछूई छोटौ बनांयौ गयौ हतो, जाते बू परमेस्‍वर की किरपा ते हर एक मनुस्‍य के काजै मर जाबै।

¹⁰ परमेस्‍वर, जाकी बजैह और जाके द्वारा सब कछू हैबै, भौत से बेटान कूं महिमा तक ले जाबों चाहबै। जामारैं जि ठीक है कै बू बिन सबन की मुक्‍ती के बिधाता कूं अर्थात् ईसू कूं दुख भोगबे के द्वारा पूरौ सिद्ध करै।

¹¹ जो पबित्र करै और जो पबित्र करे जामें, बिन सबन कौ पिता एकई है, जामारैं ईसू कूं बिन नें अपनों भईया मानबे में लज्‍जा नां आबै।

¹² बे कहमें, “मैं अपने भईयान के सामईं तेरे नाम कौ बखान करूंगो, मैं सभान में तेरौ गुनगान करूंगो।”

¹³ और बू कैहबै, “मैं बापै पूरौ भरोसौ रखूँगो।” और बू फिर ते कहमें, “मैं य्हां हूं और बे सन्‍तान जो मेरे संग हैं। जिनकूं परमेस्‍वर ने मोय दियौ है।”

¹⁴ चौंकि परिबार के सबरे सदस्यन कौ खून और मांस एकई हैबै, जामारैं बोऊ हमारी तरैही मनुस्‍य बन गयौ, जाते बू अपनी मौत के द्वारा मौत पै अधिकार रखबे बारे सैतान कूं हरा दैय,

¹⁵ और गुलामी में जीबन बिताबे बारे लोगन कूं मौत के भय ते मुक्‍त कर दैबे।

¹⁶ चौंकि बू सुरग दूतन की नांय, पर अब्राहम के वंसजन की सुधि लैबै।

¹⁷ जामारैं जि जरूरी हते कै, बू सब बातन में अपने भईयन के जैसौ बन जाबें, जाते बू परमेस्‍वर के सम्बन्धी बातन में लोगन के दयालू और भरोसे योग्‍य महा पुरोहित के रूप में बिनके पापन की मांफी काजै बलिदान है सकै।

¹⁸ चौंकि जब वाकी परीक्छा लयी गयी और बानें खुद दुःख भोगो है, जामारैं बू परीक्छा में दुःख भोगबे बारेन की सहायता कर सकै।