इब्रानियों 1 - बृज भासा

परमेस्‍वर अपने बेटा के द्वारा बोलै

¹ पैहले युग में परमेस्‍वर नें अपनी ओर ते बात बताबे बारेन के द्वारा भौत से मौकेन पै भौत तरैह ते हमारे बाप दादान ते बातचीत करीं।

² पर अब इन आखरी दिनान में बानें हमते अपने बेटा के द्वारा बातचीत करीं, जाये बानें सब चीजन कौ बारिस ठहरायौ है और वाके द्वारा बानें सबरे संसार की रचना करी है।

³ बू बेटा परमेस्‍वर की महिमा कौ तेज और वाके सुभाब कौ प्रतिरूप है। बू बेटा अपने सामर्थी सब्दन के द्वारा सबरी सृस्‍टी कूं बनांये रखतै। बानें हमारे पापन कूं दूर करौ है और अब बू ऊपर सुरग में सर्वसक्‍तीमान परमेस्‍वर के दाहिने हात जा बैठौ है।

परमेस्‍वर के बेटा की महानता

⁴ जा तरैह ते वाकी जगैह सुरग दूतन ते ऊंची है, चौंकि जो नाम बाय उत्‍तराधिकार में मिलौ है, बू बिनके नाम तेऊ जादा उत्‍तम है।

⁵ चौंकि परमेस्‍वर नें काऊ सुरग दूत ते कबऊ ऐसैं नां कही, “तू मेरौ बेटा है, आज मैं तेरौ पिता बनों हूं।” और नां काऊ सुरग दूत ते बानें जि कही है कै, “मैं वाकौ पिता बनुंगो, और बू मेरौ बेटा होगौ।”

⁶ और फिर परमेस्‍वर जब अपने पैहलौठे कूं संसार में लाबै, तौ कहबै, “परमेस्‍वर के सब सुरग दूत वाकी अराधना करें।”

⁷ सुरग दूतन के बारे में बताते भये बू जि कहबै, “बानें अपने सब सुरग दूतन कूं हबा बनांयौ, और अपने सेबकन कूं आग की लपट बनांयौ।”

⁸ पर अपने बेटा के बारे में बू कहबै, “हे परमेस्‍वर! तेरौ सिंहासन युगानुयुग तक बनों रहबैगौ, और तेरौ राज्य कौ राजदन्‍ड न्याय कौ अधिकार दन्‍ड है।

⁹ तैने धरम ते पिरेम करकें अधर्म ते बैर करौ है, जामारैं हे परमेस्‍वर, तेरे परमेस्‍वर नें, तुमकूं साथिन के ऊपर उठायकै आनन्द के तेल ते तुमारौ अभिसेक करौ है।”

¹⁰ परमेस्‍वर जि कहबै, “हे पिरभू, जब सृस्‍टी की रचना है रयी, तब तैने धरती की नींव डारी। और आकास तेरे हातन कौ काम हैं।

¹¹ जे नस्‍ट है जांगे पर तू हमेसा रैहबेगौ, जे सब कपड़न की तरैह ते पुराने है जांगे।

¹² और तू चादर की तरैह बिनकूं लपेटेगौ। बे फिर कपड़न के जैसे बदल जाबेंगे। पर तू जैसौ है बैसौई बनों रैहबेगौ, तेरे काल कौ अंत युग-युगन हैबैगौ।”

¹³ परमेस्‍वर ने कोई सुरग दूत ते कबऊ ऐसौ नां कही, “तू मेरे दाहिने बैठ जा, जब तक मैं तेरे दुसमन नें तेरे पामन के नीचे की चौकी नां बना दऊं।”

¹⁴ का सबरे सुरग दूत उद्धार पाबे बारेन की सेबा काजै भेजी गयी सहायक आतमाएं हैं?