गलातियों 6 - बृज भासा

एक दूसरे के बोझ कूं बांट लेऔ

¹ हे भईयाओ, यदि कोई आदमी काऊ पाप में पकड़ौ जावें, तौ तुम जो आतमिक हो, बाय बड़ी नरमाई ते सम्हारौ जाते बू फिर ते अच्‍छे रस्ता पै आ जाये और खुदऊ हुसियार रहो, कऊं ऐसौ ना होय तुमऊं काऊ परीछा में ना पड़ जाऔ।

² जा तरैह ते एक दूसरे की दुख के समै में सहायता करौ, जाके द्वारा तुम मसीह की व्‍यबस्थाऐ पूरी करौगे।

³ यदि कोई आदमी ना कछू होते भये अपने आप कूं सब कछू समझबे कौ दाबा कर रयौ है, तौ बू अपने आपकूं धोकौ दे रयौ है।

⁴ पर हर एक आदमी अपने काम कूं अच्‍छी तरैह ते जाँच लैवे तबई वाके जौरे गर्व करवे काजै कछू होगौ, पर एक दूसरे ते अपनी तुलना नांय करै।

⁵ चौंकि हरेक आदमीएं अपनौई बोझ उठानों चाहिऐ।

⁶ जो तुमें परमेस्‍वर के वचन की सिछा देतै, बिनके संग हर एक अच्‍छी चीज कूं बांट लैओ।

⁷ धोके में मत रहियों, परमेस्‍वर ऐ हसी में नांय उड़ायौ जाय सकै। चौंकि जो आदमी जैसो बोवेगौ बैसौई काटेगौ।

⁸ जो सरीर की बुरी इच्‍छा के द्वारा बोवेगौ बू सरीर की बुरी इच्‍छा के द्वारा ही बिनास की कटनी काटेगौ। जो पबित्र आतमा के द्वारा बोवेगौ बू कबऊ नांय खतम हैबे बारे जीबन की कटनी काटेगौ।

⁹ हमें भलाई करत-करत निरास नांय होनौं, चौंकि हम मजबूत बने रहेंगे तो, सही समै पर अनन्‍त जीबन की कटनी काटिंगे

¹⁰ जाई मारे जहां पै मौकौ मिले सबके सब भलाई करो, और खास करके बिन लोगन के संग जो पिरभू में भरोसौ करबे बारे हैं।

अखीरी चेताबनियाँ

¹¹ देखौ अब मैं तुमें कैसे बड़े-बड़े अछरन में अपने हातन ते तुमें लिख रयौ हूं।

¹² जो लोग सारीरिक दिखाबा चांहते बुई तुमारौ खतना करबाबे पै तुले भये हैं। और बू ऐसौ जामारै करतें, कै बिनें मसीह के क्रूस के पिरचार करवे कि बजैह ते सतायौ नां जाबै।

¹³ चौंकि जिनकौ खतना है चुकौए और जो खतना करबाबो चाहतै, बे खुद तौ व्‍यबस्थाऐ नांय मानतई, पर बू तुमारौ खतना जई बजैह ते करायबौ चाहते कै बे तुमारी सारीरिक दसा पै घमन्ड करै कै बिन्‍नें तुमारो खतना करबायोए।

¹⁴ मैं तौ केवल पिरभू ईसू मसीह के क्रूस पैई घमन्‍ड करतूं, मैं काऊ और बात पै घमन्‍ड नांय करत चौंकि जाके द्वारा मेरी नजर में सबरौ संसार क्रूस पै चढ़ायौ जाय चुकौ और मैऊं संसार की दृस्टि में चढ़ चुकौ हूं।

¹⁵ चौंकि न तौ खतना को न बिना खतना को कोई महत्व है, पर महत्व जा बात कोए कै हम पूरी तरह तै नई सृस्‍टी है।

¹⁶ चौंकि जितने जा रीति पै चलिगें बिनपे और परमेस्‍वर के इसरायल सब बिसबासी लोगन पै सान्‍ती और दया होती रैहबेगी।

¹⁷ आगे कूं कोई मोय दुख नांय देय मैं ईसू मसीह के घाबन्‍नें अपने सरीर में संग लिये फिर रयौऊं।

¹⁸ सो हे भईयाओ, हमारे पिरभू ईसू मसीह की किरपा और आतमा हमेसा तुमारे संग बनी रहबे। ऐसौई होबे।