प्रेरितन के काम 14 - बृज भासा

इकुनियुम में पौलुस और बरनबास

¹ पौलुस और बरनबास इकुनियुम मेंऊं यहुदी पिराथना घरन में गये। मापै बिन्‍नें जा तरीका ते बखान करौ कै, यहुदी और यूनानिन में ते भौत ते लोगन की एक बड़ी भीड़ ने भरोसौ करौ।

² पर भरोसौ न करबे बारे यहुदिन ने गैर यहुदिन कूं भरोसौ करबे बारे भईयन के प्रति भड़कायकै उनके मन में बैर पैदा कर दयौ।

³ जामारै पौलुस और बरनबास मापै भौत दिना तक टिके रहे और बे पिरभू के बारे में बिना डरे पिरचार करते रहे और पिरभू उनके द्वारा भौत ते अदभुत काम करबाबतु रयो और अपनी दया ते अपनों वचन मापै उनमे बैठ गयौ।

⁴ और मांपै नगर के लोगन में फूट पर गयी। कछू लोग भेजे भये चेलान में मिल गये, और कछू लोग यहुदिन में मिल गये।

⁵ तब गैर यहुदी लोग और यहुदी लोग अपने नेतन के संग मिलकै बनरबास और पौलुस के संग बुरौ बौहर करबे और पथराब करबे की चाल चली।

⁶ जब पौलुस और बरनबास कूं जा बात कौ पतौ परौ तौ बे लुकाउनिया के लुस्त्रा और दिरबे के आस-पास के छेत्रन में चले गये,

⁷ और मापैऊं बे सुभ समाचार सुनाबे लगे।

लुस्त्रा और दिरबै में पौलुस

⁸ लुस्त्रा में एक जनम कौ लंगड़ो आदमी हतौ। बू अपने जीबन में कबऊ नांय चल पायौ।

⁹ जा आदमी नें पौलुस कूं जि बोलत भये सुनौ हतो कै पौलुस अपनी निगाह ते बाकूं बडे़ गौर ते देखौ कै, बामें चंगो हैबे कौ भरोसौ हतुए।

¹⁰ और पौलुस नें बाते कही कै, “अपने पामन पै सीधौ ठाड़ौ है जा और चल फिर।” और बू उछलके ठाड़ौ है गयौ चलबे फिरबे लगौ।

¹¹ पौलुस ने जो कछू मापै करौ हतो बाय देखकें लोग लुकाउनिया भासा में कैहबे लगे कै, “हमारे बीच में आदमिन कै भेस में देबता आय गये है।”

¹² बे बरनबास कूं ज्‍यूस और पौलुस कूं हिमिस कैहबे लगे। पौलुस कूं जामारै हिरमेस कहौ गयौ चौंकि बू मुख्‍य बोलबे बारौ हतो,

¹³ नगर के बाहर ज्‍यूस कौ बड़े पिराथना घर हतो। बा बड़े पिराथना घर कौ पुजारी माला पहनकै साँड़न के संग नगर के द्वार पै पौहचौ। बे भीड़ के संग पौलुस और बरनबास के काजै भेंट दैबौ चांहते हते।

¹⁴ जब भेजे भये चेला पौलुस और बरनबास ने जि सुनी तौ, अपने कपड़ा फार डारे और भीड़ में जि कैहत भये घुस गये,

¹⁵ “हे भईयाओ, तुम जि का कर रयैऔ? हमऊं तौ तुम जैसे आदमी हैं। हम तौ तुमें ज्हांपै सुभ समाचार सुनांयबे आये हैं, जाते तुम इन बेकार की बातन नें छोड़कै जीबित परमेस्‍वर के माऊं लौटौ, जाने आकास, धरती, समुन्दर और इनमें जो कछु है, बू सब कछू बनांयौऐ।

¹⁶ “परमेस्‍वर नें पिछले समै में सब जातीन कूं अपनी अपनी रस्ता पै चलने दियौ।

¹⁷ पर तुमें बानें खुद गबाही के बिना नांय छोड़ौ, चौंकि बानें तुमारे संग भलाई करीऐ, बानें तुमारे काजै आकास ते मेह बरसायौ और अपनी रितु पै फसल दयी। बैई हम सबन कूं भोजन देतै और हमारे मन कूं खूसी ते भर देय।”

¹⁸ इतने समझायबे के बादऊ बिनके लिए बड़ी मुस्‍किल हती के बा भीड़ कूं बली चढ़ाबे ते रोक सकैं।

¹⁹ जाके बाद अन्ताकिया और इकुनियुम ते आये भये कछु यहुदियन ने भीड़ कूं अपनी ओर मिला लयौ और पौलुस पै पथराब करौ और बाय मरौ समझकै नगर के बाहर घसीटकै लै गये।

²⁰ पर जब वाके चेला वाके चारों ओर इकठ्‌ठे भये, तौ बू उठकै नगर में आय गयौ। दूसरे दिनां बू बरनबास के संग दिरबे नगर कूं चलौ गयौ।

सीरीया के अन्ताकिया नगर में लौटबौ

^21-22 बा नगर में उन्‍नें सुभ समाचार सुनायकै भौत ते चेला बनांये और उनकी आतमा भरोसे में मजबूत करबे काजै उन्‍नें तैयार करौ और कही, “हमे बड़ी ताड़ना सैहकें परमेस्‍वर के राज जानोंऐ।” तब बे लुस्त्रा और इकुनियुम में जाकर पिसदिया जिले के जौरे अन्ताकिया में लौट आये।

²³ और पौलुस और बनरबास नें म्हांकी कलीसियन में अगुवन कूं चुनों और उपबास और पिराथना करबे के बाद बिनें कूं पिरभू कूं सौंप दयौ, जापै उन्‍नें भरोसौ करौ हतो।

²⁴ जाके बाद पिसदिया जिले होत भये बे पंफूलिया जिले में आय गये।

²⁵ और जब बे सारे पिरगा नगर में सुभ समाचार सुनांय चुके, तौ अत्‍तालिया नगर चले गये।

²⁶ मांते बे जहाज ते सीरीया के अन्ताकिया आये, मापै जा काम कूं करबे गये बा काम के काजै परमेस्‍वर ते किरपा मांगी हती और अब बू काम पूरौ करौ हतो।

²⁷ जब बे मापै पौहचे तब उन्‍नें कलिसिया के लोगन कूं इकठ्‌ठौ करौ और उनकूं बू सब कछू जो परमेस्‍वर ने उनके संग करौ हतो, बू सबरौ हाल कै सुनांयौ कै परमेस्‍वर ने गैर यहुदिन के काजैऊ भरोसौ करबे के द्वार खोल दये है।

²⁸ फिर पौलुस और बनरबास भौत दिनन तक अन्ताकिया में चेलान के संग रुके रये।