2 थिस्सलुनिकियों 3 - बृज भासाहमारे काजै पिराथना करौ 1 हे भईयाओ, हम आखरी में एक और बात तुमते चाहमें कै तुम हमारे काजै पिराथना करै करौ जाते कै पिरभू कौ वचन एसैई और जगैन पैऊ जल्दी ते फैलै और महिमा पाए, जैसो तुम में फैलौ है, 2 और हम टेड़े और दुस्ट लोगन ते बचे रैहमें। चौंकि हर एक आदमी परमेस्वर पै भरोसौ करबे बारौ नांय। 3 पर पिरभू तौ भरोसे योग्य है। बू तुमें मजबूत करैगौ और सैतान ते बचाबैगौ। 4 हमें पिरभू में तुमारे ऊपर पूरौ भरोसौ है कै हम तुमें जो जो आग्या दैमें बिन्नें तुम मानें और मानते रिंगे। 5 परमेस्वर के पिरेम और मसीह के धीरज की ओर पिरभू तुमारे मन की अगुबाई करै। आलस के बिरुद्ध चेतावनी 6 हे भईयाओ, हम तुमें पिरभू ईसू मसीह के नाम ते जि आग्या दैमें कै, तुम हरेक आलसी भईयन ते अलग रहौ, जो काम काज नांय करैं और बा सिछा के अनुसार नांय चलें जो बिन्नें हमते पाई है। 7 तुम खुदई जानें कै तुमें हमारी जैसै चलनों चहिऐं। चौंकि जब हम तुमारे जौरें हते तबऊ काम धन्धो करते। 8 हमनें काऊ की रोटी सैंत मैंत में नांय खायीं, पर मेहनत और कस्ट ते रात और दिन काम धन्धो करते रये, कै हम तुम में ते काऊ पै बोझ ना बनें। 9 हमें जि अधिकार हतो कै हम तुमते खा सकते, पर हमनें जि जामारैं नांय करौ चौंकि हम तुमारे सामने एक नमूना रखबो चाहते कै तुम हमारी जैसी चाल चलौ। 10 चौंकि जब हम तुमारे जौरें हते, तबऊ हम तुमें जि आग्या दैते हते कै जो कोई काम धन्धो करै, बुई रोटी खाबै। 11 हमारे सुनबे में आयौ है कै, तुम में ते कछू लोग आलसी है। बे कछु काम धन्धो नांय करें पर दूसरेन के काम धन्धेन में बाधा डारें। 12 ऐसे लोगन कूं हम पिरभू ईसू मसीह के नाम में समझामकें आग्या दैमें कै, बे दूसरे के काम धन्धे में दखल नांय दैमें और अपनों कमायकै खानों खामें। 13 पर हे भईयाओ, तुम भलाई करबे में हिम्मत मत हारौ। 14 जा चिठ्ठी के द्वारा हमारी दई गयी आग्या पै अगर कोई ना चलै, तौ बा आदमी पै नजर रखौ ओर बाते कोई बास्तौ मत रखौ, जाते बाय लज्जा आवे। 15 पर बिनके संग दुसमनन जैसौ ब्यौहारऊ मत करौ, पर बाय भईया की तरैह ते समझाओ। चिठ्ठी की आखरी बात 16 अब सान्ती कौ पिरभू खुद तुमें हर समै और हर तरैह ते सान्ती दैबै। पिरभू तुम सबके संग रैहबै। 17 मैं, पौलुस, अपने हात ते जि नमस्कार लिख रयौऊं और मेरी जि लिखाबट सब चिठ्ठीन की पहचान है, कै जि चिठ्ठी मेरी ओर ते भेजी गयी है। 18 हमारे पिरभू ईसू मसीह कौ अनुग्रह तुम सबन पै बनों रैहबें। |
NonCommercial-NoDerivatives 4.0 International (CC BY-NC-ND 4.0)