2 कुरिन्थियों 6 - बृज भासा

सेबकाई कौ अनुभव

¹ हम परमेस्‍वर के संग काम में संगी हैबे के नाते, तुम लोगन ते बिनती करतैं के, परमेस्‍वर की जो किरपा तुम पै भयी है, बाय बेकार मत जान देऊ।

² चौंकि परमेस्‍वर नें कही है कै, “मैने सही समै पै तेरी सुन लयी, और उद्धार के दिना सहारौ दैबे आयौ।” देखौ, अब “सही समै” जेईऐ। अब “उद्धार कौ दिनऊ” जेईऐ।

पौलुस की कठनाईंयाँ

³ हम काऊ के काजै रुकावट पैदा नांय करै, जाते हमारे सेबा काम पै कोई अंगूरीआ ना उठाबै।

⁴ पर हम तौ परमेस्‍वर के सेबक के रूप में हम अपने आप कूं हर तरैह ते लोगन में अच्‍छौ साबित करत रैहतें। बड़े धीरज के संग सब कछू सहत भये, परेसानी और मुसीबतन के बीच में, कठनाई के में,

⁵ कोड़े खाबे में, कैद में, दंगन में, असान्‍ती के बीच में मेहनत करत भए, रातों रात पलकऊ नांय झपकाये, भूंखे रैहके

⁶ अपनी पबित्रता ग्‍यान, और धीरज ते, अपने दयालुपन, पबित्र आतमा के वरदान ते और सांचे पिरेम,

⁷ सच्‍चे संन्देस और परमेस्‍वर की सच्‍ची सक्‍ती ते, अपने दोनों हातन में धारमिकता के हथियार लैकें,

⁸ हम आदर और निरादर के बीच में, प्रसंसा और निन्दा के बीच में अपने आपकूं मौजूद रखतै। हमे तौ बहकाबौ बारौ समझौ जाबतुए जबकि हम तौ सच्‍चे हैं।

⁹ हम अनजान समझे जाबते, तौऊ हमे सब जानतें। हम तौ मुरदेन जैसे समझे जामें, पर देखौ, हम तौ जीबित हैं। हम तौ सजा भोगबे बारे जैसे समझे जातै, तबऊ हम मौत कूं नांय सौंपे जाते।

¹⁰ हमे सोक में व्‍याकुल समझौ जातै जबकि हमतौ हमेसा खुस रहतें। हम दीन हीन के रूप में जाने जाबते, जबकि हम तौ भौतन कूं बैभव साली बनांय रये हैं। लोग हमझतें के इन पै कछू नांय, पर हमारे जौरे तौ सब कछू है।

¹¹ हे कुरिन्थयन के लोगो, हमनें तुमते पूरी तरैह ते खुलकै बात करी हैं। तुमारे काजै तौ हमारौ दिल खुलो भयौऐ।

¹² हमारौ पिरेम तुमारे काजै कम नांय भयौ। पर तुमारौ पिरेम हमारे काजै ठन्‍डौ परतौ जा रयौ है।

¹³ तुमें अपनों बालक समझत भये जि कैह रयौऊं जाके बदले में तुम अपनों मन हमारे काजै पूरी तरैह खुलौ रखनौ चहिऐं।

हम परमेस्‍वर के बड़े पिराथना घर हैं

¹⁴ जो अबिसबासी हैं बिनके संग साझेदारी मत करौ। चौंकि भलाई और बुराई कैसे समान है सकतै? उजीतौ और अंधेरौ आपस में सम्बन्ध कैसे है सकतै?

¹⁵ एसेई मसीह कौ सैतान ते कोई तालमेल नांय। एसेईं अबिसबासी कौ बिसबासी के संग कोई नातौ नांय।

¹⁶ परमेस्‍वर के बड़े पिराथना घर को मूरतीन ते का नातौ? चौंकि हम खुद बा जीन्दे परमेस्‍वर के बड़े पिराथना घर है, जैसा परमेस्‍वर ने कही हती, “मैं उनके बीच में रहूंगौ और चलूंगौ फिरूंगौ, मैं उनकौ परमेस्‍वर हुंगो और बे मेरे लोग हुंगे।”

¹⁷ “जामारै पिरभू कैहतै कै, तुम बिनते बाहर आय जाऔ, उनते अपने आप कूं अलग कर लेओ अब कबऊ असुद्ध चीज कूं मत छूऔ। तब मैं तुमकूं अपनांऊंगौ।

¹⁸ और मैं तुमारौ पिता बनुंगो, और तुम मेरी सन्‍तान हुंगे, सर्वसक्‍तीमान पिरभू जि कैहतै।”