1 थिस्सलुनिकियों 4 - बृज भासा

परमेस्‍वर कूं खुस करबे बारौ जीबन

¹ हे भईयाओ, अब हमें तुमकूं कछु और बात बतानी हैं। पिरभू ईसू के नाम में हम तुमते पिराथना और निबेदन करतै, कै तुमनें हमते परमेस्‍वर कूं खुस करबे काजै जो सिछा पाई है और निस्चय तुम बा तरैह ते चल रये हैं, और बामें बैसेई जादा ते जादा चलते रहो।

² चौंकि तुम जानतौ कै हमनें तुमकूं जो सिछा दई हती बू पिरभू ईसू के अधिकार ते हती।

³ परमेस्‍वर की जेई इच्‍छा है, कै तुम पबित्र है जाऔ और कुकर्म ते दूर रहो।

⁴ और तुम में ते हर एक कूं अपनी पत्नी के संग पबित्र और आदर भाव के संग जीबन जीनों चहिऐं

⁵ और जा कामें सरीर की इच्‍छा पूरी करवे काजै मत करौ जैसे कै गैर यहुदी जो परमेस्‍वर कूं नांय जानै करतै।

⁶ कोई आदमी अपने भईया की पत्नी पै गलत नजर ना रखें। चौंकि पिरभू ऐसौ करवे बारेन कूं भौत सजा दैवेगौ, जाके बारे में हमनें तुमकूं पहले तेई बता दई है और सावधान कर दिये हते।

⁷ चौंकि परमेस्‍वर ने हमकूं असुद्ध जीबन जीबे काजै नांय, पर हमें सुद्ध जीबन जीबे काजै बुलायौ है।

⁸ जा बजैह ते जो इन सिछान कूं तुच्‍छ जानतै, बू आदमिन कूं नांय पर पबित्र आतमा दैबे बारे परमेस्‍वर कूं तुच्‍छ जानतै।

⁹ हमें जरूरत नांय कै हम तुमें भाई चारे के पिरेम के बारे में लिखें। चौंकि परमेस्‍वर ते तुम सीख चुके हो कै तुमें एक दूसरे ते कैसै पिरेम करनों चहिए।

¹⁰ सच में तुम मकिदुनियां के भईयन के संग पिरेम करतौ, पर हम तुमें समझातें कै तुम पिरेम करबे में और बढ़ते जाऔ।

¹¹ जा बात कौ ध्‍यान रखौ कै तुम एक दूसरे के संग मेल-मिलाप ते रहौ और तुमारौ ध्‍यान तुमारे काम मेंईं लगो रैहबै। तुम दूसरे के कामन में टाँग मत अड़ाऔ पर तुम बैसौई करौ जैसै हमनें तुमते करबे कूं कही हती।

¹² ऐसौ करबे ते अबिसबासी लोग तुमारौ आदर करिंगे और तुम्हें काऊ चीज की कमी नां होगी।

पिरभू कौ फिर आबौ

¹³ हे भईयाओ हम चांहतै कै तुम अपने मरे भये बिसबासी लोगन के दुबारा ते जी उठिवे के सच कूं जानों, जाते कै तुम अबिसबासी लोगन की तरैह ते निरास हैके दुखी मत हो जिनके जोरै कोई आसा नांय।

¹⁴ चौंकि हम भरोसौ करतै कै ईसू मरौ और बू मरे भयेन में ते जी उठौ, बैसेई हमें जा बात पैऊ भरोसौ रखनों है कै जब ईसू आबेगौ तौ परमेस्‍वर ईसू के संग बिननेंऊ भेजैगौ, जो ईसू पै भरोसौ करते भये मर गये।

¹⁵ चौंकि हम पिरभू के सिखाये वचन के अनुसार तुमते जि कहते है। कै पिरभू के आबे तक जो लोग सरीर में जीन्दे रैहबिंगे, बे मरे भयेन में ते जी उठबे बारेन मेंते पैहले सुरग नांय जाबेंगे।

¹⁶ चौंकि पिरभू खुदई सुरग में ते उतरेगौ। बाई समै दहाड़ कौ और पिरधान सुरग दूतन कौ सब्द सुनाई देगौ और परमेस्‍वर की तुरही फूंकी जाबेगी, जो मसीह पै भरोसौ करते भये मर गये है, बे पहलें जी उठिंगे।

¹⁷ जाके बाद हम सब बा समै तक जीन्दे रैहगे, हम सब बिनके संग बादरन पै उठाय लिये जांगे और हबा में पिरभू ते मिलिंगे और जाई रीति ते हम सब पिरभू के संग हमेसा रहेंगे।

¹⁸ जामारैं ऐसी बातन ते एक दूसरे कूं हिम्मत देत रहौ।