1 कुरिन्थियों 1 - बृज भासा

नमस्‍कार

^1-2 परमेस्‍वर की इच्‍छा के अनुसार ईसू मसीह कौ भेजौ भयौ चेला बनबे काजै चुनों गयौ, मैं,पौलुस और बिसबासी भईया सोस्थिनेस, जि चिठ्‌ठी कुरिन्थुस सहर में स्थित परमेस्‍वर की कलिसिया के लोगन कूं लिख रये हैं। जो ईसू मसीह में पबित्र करे गये हैं और जो पबित्र हैबे काजै बुलाये गये है और बिन सब लोगन के काजैऊ लिख रयौऊं जो हर जगैह हमारे पिरभू ईसू मसीह कौ नाम पुकारते रैहते।

³ हमारे परम पिता परमेस्‍वर और पिरभू ईसू मसीह की ओर ते तुम सबन कूं किरपा और सान्‍ती मिलती रैहबै।

पौलुस कौ परमेस्‍वर कूं धन्यबाद

⁴ तुम लोगन कूं मसीह ईसू के द्वारा परमेस्‍वर की किरपा मिली है, वाके काजै मैं परमेस्‍वर कौ हमेसा धन्यबाद देतूं।

⁵ चौंकि मसीह में तुमें हर तरैह ते मतलब, बोलने में और सबरे ग्‍यान ते सम्पन्‍न करौ गयौए।

⁶ मसीह के बारे में हमनें जो गबाही दयीऐ, बू तुमारे बीच में परमेस्‍वर नें सच्‍ची साबित करी है।

⁷ जाई बजैह ते तुमारे जौरे वाके काऊ आतमिक वरदानन की कमी नांय। तुम सब हमारे पिरभू ईसू मसीह के पिरगट हैबे कौ इन्‍तजार करते रहो।

⁸ पिरभू अन्‍त तक तुम लोगन कूं भरोसे में मजबूत बनांये रखैगौ, जाते तुम हमारे पिरभू ईसू मसीह के दिन में निरदोस पाये जाओ।

⁹ परमेस्‍वर भरोसे योग्‍य है, बाई नें तुम लोगन कूं अपने बेटा हमारे पिरभू ईसू मसीह की संगती काजै बुलायौ है।

कुरिन्थुस की कलिसिया में मत-भेद

¹⁰ हे मेरे भईया बहनों, मैं तुमते ईसू मसीह जो हमारौ पिरभू है वाके नाम में तुम सबनते जि बिनती है कै, तुम एकई बात बोलो। तुमारे बीच में मत-भेद ना होबे पर तुमारे बिचार और इच्‍छा एकई होय।

¹¹ चौंकि हे मेरे भईया बहनों, मोय खलोए के घराने के कछू लोगन ते पतौ चलौ कै, तुम में आपस में लड़ाई चल रयी है।

¹² मैं तुमते जि कैह रयौऊं के, तुमते कोई कैहतै कै, “हम पौलुस के चेला हैं।” और कोई कैहतै, “हम अपुल्‍लोस के चेला हैं।” काऊ कौ जि मते कै, “हम पतरस के चेला हैं।” तौ कोई कैहतै के, “हम मसीह के चेला हैं।”

¹³ का मसीह बट गयौए? का मैं,पौलुस तुमारे काजै क्रूस पै चढ़ो हतो? का तुमें पौलुस के नाम ते बपतिस्मा दयौ? नांय ऐसौ नांय।

¹⁴ मैं परमेस्‍वर कौ धन्यबाद करतूं कै, क्रिसपुस और गयुस कूं छोड़कै मैंनें तुम में ते काऊ कूं बपतिस्मा नांय दयौ।

¹⁵ जामारै कोई जि नांय कैह सकत कै, तुम लोगन कूं मेरौ चेला बनाबे काजै बपतिस्मा दयौ गयौए।

¹⁶ हाँ, मैंनें स्तिफनास के परिबार कूं बपतिस्मा दयौ हतो। जाके अलाबा मोय याद नांय कै मैने काऊ और कूं बपतिस्मा दयौ होय।

¹⁷ चौंकि मसीह ने मोय बपतिस्मा दैबे काजै नांय, पर बानें मोय बिना इन्सानी ग्‍यान लगाये सुभ समाचार पिरचार करबे काजै भेजौ हतो। जाते कै मसीह कौ क्रूस पै मरबौ बेकार नांय चलौ जाय।

परमेस्‍वर की सक्‍ती और ग्‍यान कौ सरूप मसीह

¹⁸ बे लोग जो बिनांस के रस्ता पै चलतैं, बे क्रूस की सिछा कूं मूर्खता समझतैं। पर जो उद्धार के रस्ता पै चल रये हैं उनके काजै परमेस्‍वर की सक्‍ती है।

¹⁹ चौंकि पबित्र सास्त्र में लिखीऐ, “मैं ग्‍यानीन के ग्‍यान कूं खतम कर दुंगो और बुद्धिमान लोगन की बुद्धिमानी कूं तुच्‍छ कर दुंगो।”

²⁰ बिद्वानन कांये? सास्त्रन कूं सिखाबे बारे कांये? जा संसार के बाद-बिबाद करबे बारे कांये? का परमेस्‍वर ने जा संसार के ग्‍यान कूं मूर्खता नांय सिद्ध करौए?

²¹ चौंकि परमेस्‍वर ने अपने ग्‍यान के अनुसार कबऊ जि नांय चाहौ कै, संसार के लोग अपने ग्‍यान के बल ते बाय पैहचानें। पर परमेस्‍वर कूं जि अच्‍छौ लगौ कै हमारे दिये गये संदेस के पिरचार के द्वारा भरोसौ करबे बारे बचाये जायें। जा पिरचार कूं संसार के लोग मूर्खता समझतै।

²² यहुदी लोग चमत्‍कार के चिन्‍न मागतें और यूनानी लोग ग्‍यान की खोज में रैहतें।

²³ पर हम तौ क्रूस पै चढ़ाये गये मसीह कौ पिरचार करतै। जि सिछा यहुदिन के भरोसे में बाधा है और गैर यहुदिन काजै मूरखता है।

²⁴ पर परमेस्‍वर के बुलाये भये चाहे, बे यहुदी होंय या यूनानी होंय, दोनोंन के काजै मसीह परमेस्‍वर की सक्‍ती, और परमेस्‍वर कौ ग्‍यान है।

²⁵ चौंकि परमेस्‍वर की मूरखता आदमिन के ग्‍यान ते कऊं जादा ग्‍यानबान है। परमेस्‍वर की कमजोरी आदमी की तागत ते कऊं जादा तागतबर है।

²⁶ हे भईयाओ बहनों, याद करौ जब परमेस्‍वर नें तुमें बुलायौ, बा समै संसार की नजर में तुम में ते भौत कम लोग ग्‍यानी समझे जाते हते और कछुई सक्‍तीसाली हते, कछुई अच्‍छे घराने के हते।

²⁷ पर परमेस्‍वर ने तौ जगत के ऐसे मूरख लोगन कूं चुनों है कै, बे ग्‍यान बानन कूं लज्जित करें और कमजोर लोगन कूं चुनों है कै, बे बलबान लोगन कूं लज्जित करें।

²⁸ और परमेस्‍वर ने जगत में बिनई कूं चुनों है जो नीचे हते जो दुनियां की नजर में तुच्‍छ और जो कछू नांय बिन लोगन कूं चुन लयौऐ। ताकि जो बड़े समझे जातैं बिनें कछू ना समझौ जाबै।

²⁹ जाते कोई आदमी परमेस्‍वर के सामने घमन्‍ड नांय कर पाबै।

³⁰ पर परमेस्‍वर की ओर ते तुम मसीह ईसू में बने भये हो, मसीह जो परमेस्‍वर की ओर ते हमारे काजै ग्‍यान मतलब धारमिकता, पबित्रता और छुटकारौ ठहरौ है।

³¹ जैसौ कै पबित्र सास्त्र में लिखौ है कै, “अगर कोई घमन्‍ड करबौ चाहबै, तौ बू पिरभू पै घमन्‍ड करें।”