Zakarías 6 - Papiamentu Bible 2013

Di ocho vishon: e kuater garoshinan

¹ Mi a bolbe haña un vishon. Mi a mira kuater garoshi ta bini for di meimei di dos seru. E serunan tabata di bròns.

² Dilanti di e promé garoshi tabatin kabai kòrá ta hal'é, kabai pretu tabata hala e di dos garoshi,

³ kabai blanku e di tres garoshi i kabai pintá e di kuater garoshi; tur e kabainan tabata fuerte.

⁴ Mi a puntra e angel ku tur ora tabata papia ku mi: ‘Mi shon, kiko e garoshinan ei ta nifiká?’

⁵ El a rospondé: ‘E garoshinan akí ta e bientunan for di e kuater direkshonnan di bientu. Awor nan ta bai sali for di nan lugá serka Señor di henter mundu.

⁶ E garoshi ku e kabainan pintá ta bai e pais den nort, e kabainan blanku ta sigui su tras i e kabainan pretu ta bai e pais den zùit.’

⁷ Ora ku e kabainan fuerte a sali bai, yen di anhelo pa pasa rònt mundu, e angel a bisa: ‘Bai pasa rònt mundu!’ I nan a hasié.

⁸ E ora ei el a grita mi: ‘Wak, e kabainan ku ta bai e pais den nort, ta bai pa plakia furia di SEÑOR aya.’

Yozue ta haña un korona

⁹ SEÑOR a bisa mi lo siguiente:

¹⁰ ‘Tuma e donashonnan ku Hèldai, Tobias i Yedaías a trese na nòmber di e eksiliadonan. Bai kas di Yosías, yu di Sofonías, awe mes; ei nan a yega.

¹¹ Tuma e oro i plata i traha un korona ku nan. Bo tin ku pone e korona akí riba kabes di gransaserdote Yozue, yu di Yosadak.

¹² E ora ei bo ta bis'é: T'esaki SEÑOR soberano ta bisa: “Ata e hòmber yamá Stèk ku a spreit; e ta spreit for di e suela kaminda e ta pará. Lo e rekonstruí mi tèmpel.

¹³ Lo e rekonstruí mi tèmpel, risibí honor real i reina komo soberano. Lo e ta saserdote i rei, un kombinashon ku ta trese pas.

¹⁴ Pa loke ta toka e korona, e ta keda den tèmpel di Señor komo rekuerdo di Hèldai, Tobias, Yedaías i komo rekuerdo di e kariño di e yu di Sofonías.” ’

¹⁵ For di paisnan leu hende lo bini aki pa yuda traha na rekonstrukshon di tèmpel di SEÑOR. E ora ei boso lo rekonosé ku ta SEÑOR soberano a manda mi. T'esei lo pasa ku boso si boso tende bon di SEÑOR, boso Dios.