Zakarías 5 - Papiamentu Bible 2013

Di seis vishon: e ròl di pèrkamènt ku ta bula den laria

¹ Mi a bolbe haña un vishon. E bia akí mi a mira un ròl di pèrkamènt ku tabata bula den laria.

² E angel a puntra mi: ‘Kiko bo ta mira?’ Mi a rospondé: ‘Mi ta mira un ròl di pèrkamènt ku ta bula den laria. E ta dies meter largu i sinku meter hanchu.’

³ E angel a bisa: ‘E ròl akí ta bai bula pasa riba henter e pais; tin un maldishon skibí riba dje. Un banda di e ròl tin skibí, ku tur hende ku hòrta ta haña kastigu i e otro banda, ku tur hende ku hasi huramentu falsu, ta haña kastigu.

⁴ SEÑOR ta bisa: “Mi ta laga e maldishon akí baha riba kas di tur ladron i di tur ku ta hasi huramentu falsu usando mi nòmber. E maldishon ta keda riba nan kas i e ta destruyé kompletamente ku palu ku piedra ku tur.” ’

Di shete vishon: e muhé den barí

⁵ E angel ku kada be tabata papia ku mi, a aparesé i bisa: ‘Wak kiko ta bini aya!’

⁶ Mi a puntra: ‘Kiko esei ta?’ El a rospondé: ‘Loke ta bini aya ta un barí. Den henter pais hende no tin wowo pa otro kos.’

⁷ E barí tabatin un tapadera di chumbu. Ora ku a lanta e tapadera, mi a mira un muhé sintá den e barí.

⁸ E angel a bisa: ‘E muhé akí ta simbolisá bida sin Dios.’ El a pusha e muhé bèk den e barí i bolbe pone e tapadera ariba.

⁹ Ora mi a hisa mi bista, mi a mira dos muhé ta bula bini den bientu; nan tabatin ala manera di óyevar. Nan a hisa e barí bai laria kuné.

¹⁰ Mi a puntra e angel ku tabata papia ku mi: ‘Unda nan ta hiba e barí ei?’

¹¹ El a rospondé mi: ‘Nan ta hib'é pais Shinar. Ei nan ta traha un tèmpel p'e. Ora e tèmpel ta kla nan ta pon'é riba su pedestal den e tèmpel akí.’