Zakarías 4 - Papiamentu Bible 2013

Di sinku vishon: e standart di oro pa pone lampi i e dos palunan di oleifi

¹ E angel ku kada be tabata papia ku mi, a bolbe bini serka mi. El a lanta mi manera sa lanta hende fo'i soño.

² El a puntra mi: ‘Kiko bo ta mira?’ Mi a rospondé: ‘Mi ta mira un standart pa pone lampi, kompletamente di oro. Riba dje tin un baki pa pone zeta i na rant di e baki tin shete lampi, kada lampi tin shete tùit ku por sende.

³ Riba e standart tin dos palu di oleifi tambe, un na banda drechi i e otro na banda robes di e baki.’

⁴ E ora ei mi a puntra e angel ku tabata papia ku mi: ‘Mi shon, kiko tur e kosnan akí ta nifiká?’

⁵ El a rospondé: ‘Bo no sa kiko nan ta nifiká?’ Mi di: ‘Nò, mi shon.’

⁶ E ora ei el a bisa mi: ‘Ta un mensahe di SEÑOR pa Zerubabel; SEÑOR ta bisa: “No ta ku forsa humano ni violensia e ta sosodé, sino pa medio di mi Spiritu. T'esei Ami, SEÑOR soberano, ta bisa.

⁷ No ta importá ken bo ta, seru grandi, ora Zerubabel yega bo ta bira un sabana. Lo e karga e último piedra trese bou di gritu di húbilo: Esta presioso, esta presioso.” ’

⁸ Despues SEÑOR a bisa mi:

⁹ ‘Ta Zerubabel a traha fundeshi di e tèmpel akí; t'e lo kaba e trabou tambe.’ Ora e kos akí sosodé, boso lo realisá ku ta SEÑOR soberano a manda mi.

¹⁰ Pasobra tur hende ku na prinsipio no tabatin konfiansa den e trabou, lo hubilá ora nan mira e chumbu di mèsla den man di Zerubabel. E shete lampinan ta e shete wowonan di SEÑOR, ku tin bista riba henter mundu.

¹¹ E ora ei mi a puntra e angel: ‘Kiko e dos palunan di oleifi na banda drechi i robes di e standart ta nifiká?’

¹² Mi a puntr'é tambe: ‘Ki nifikashon e dos takinan di oleifi tin, banda di e dos pipanan di oro, ku ta basha zeta koló di oro?’

¹³ El a rospondé: ‘Bo no sa nan nifikashon?’ Mi di: ‘Nò, mi shon.’

¹⁴ E ora ei e di: ‘Ta e dos hendenan konsagrá, ku ta den servisio di Señor di henter mundu.’