Zakarías 2 - Papiamentu Bible 2013

Di tres vishon: E hòmber ku e sinta di midi

¹ Mi a bolbe haña un vishon: mi a mira un hòmber ku un sinta di midi den su man.

² Mi a puntr'é: ‘Unda bo ta bai?’ El a rospondé: ‘Mi ta bai Herusalèm pa midi su largura i hanchura.’

³ E angel ku tabata papia ku mi, a kana bai dilanti pa kontra ku un otro angel ku tabata bini den su direkshon.

⁴ I el a bisa e angel akí: ‘Kore bai lihé serka e yònkuman aya ku e sinta di midi den su man i bis'é ku Herusalèm lo yena ku asina tantu hende i bestia di kria, ku lo no por traha muraya rònt di dje.

⁵ SEÑOR ta bisa: “Mi mes lo ta un muraya di kandela ku ta rondoná e siudat. Mi mes lo biba ku tur mi gloria den e siudat.” ’

SEÑOR ta yama e eksiliadonan pa nan bolbe Herusalèm

⁶ SEÑOR ta bisa: ‘Mi a plama boso den tur direkshon. Pero awor Mi ta bisa: Hasi lihé! Bini! Hui for di e pais den nort!

⁷ Bini, boso tur ku ta biba na Bábel! Bin buska seguridat riba seru di Sion.’

⁸ SEÑOR soberano, ku a manda mi ku su outorisashon serka e pueblonan ku a sakia boso, ta bisa: ‘Ken ku hasi boso daño ta mishi ku mi pret'i wowo.

⁹ Mi ta lanta mi man kontra nan i laga nan mes katibunan sakia nan.’ E ora ei boso lo rekonosé ku ta SEÑOR soberano a manda ami, Zakarías, serka boso.

¹⁰ SEÑOR ta bisa: ‘Grita di alegria, habitantenan di Sion, pasobra Mi ta bin biba serka boso.

¹¹ Ora e dia ei yega, hopi pueblo lo djòin Mi, nan lo bira mi pueblo. I Ami lo biba serka boso.’ E ora ei boso lo rekonosé ku ta SEÑOR soberano a manda ami, Zakarías, serka boso.

¹² Huda lo bolbe bira propiedat di SEÑOR den e pais konsagrá n'E, i Herusalèm lo bolbe bira e lugá ku E ta skohe pa biba.

¹³ Tur loke tin rosea, keda ketu den presensia di SEÑOR! Pasobra E ta bai sali for di su kas sagrado.