Zakarías 12 - Papiamentu Bible 2013

Herusalèm sitiá i liberá

¹ Mensahe di SEÑOR, su palabranan tokante Israel. SEÑOR, ku a span shelu, basha fundeshi di mundu i duna hende rosea di bida, ta deklará lo siguiente:

² ‘Mi ta hasi di Herusalèm un beker di biña, ku ta zonza e pueblonan rondó di dje. Nan lo sitiá Herusalèm i ataká sobrá siudatnan di Huda tambe.

³ Ora e dia ei yega Mi ta hasi di Herusalèm un piedra pisá pa e pueblonan. Ora nan bai purba his'é, e ta habri nan mannan na herida. Tur pueblo di mundu lo ranka bai kontra dje.’

⁴ SEÑOR ta deklará: ‘Riba e dia ei Mi ta laga tur nan kabainan bruha i Mi ta pone nan ginetenan bira loko. Mi ta tene Huda bon na bista, pero tur kabai di e pueblonan Mi ta laga bira siegu.

⁵ E ora ei tur hefe di tribu di Huda lo bisa den nan mes: “Habitantenan di Herusalèm ta haña nan forsa serka nan Dios, SEÑOR soberano.”

⁶ E dia ei lo Mi asistí e hefenan di tribu di Huda. Nan lo ta manera kandela den un dechi di palu, flambeu bou di un bòshi di trigo. E kandela ta plama rápidamente i destruí tur pueblo rondó di Huda; Herusalèm ta keda para kaminda a konstruyé.’

⁷ Promé SEÑOR lo liberá e teritorio di Huda, pa desendientenan di David i habitantenan di Herusalèm no sinti nan mas ku otro habitantenan di Huda.

⁸ E dia ei SEÑOR lo protegé habitantenan di Herusalèm. Esun di mas suak den nan lo ta mes fuerte ku rei David. Desendientenan di David lo guia nan komo si fuera ta Dios mes ta guia nan, ta Angel di SEÑOR mes ta bai nan dilanti.

⁹ SEÑOR ta bisa: ‘Mi tin intenshon e dia ei di destruí tur pueblo ku sali kontra Herusalèm.

Rou pa esun ku nan a hinka mata

¹⁰ Pero lo Mi yena desendientenan di David i habitantenan di Herusalèm ku spiritu di bondat i di plegaria. Nan lo hisa nan bista na Mi pa motibu di esun ku nan a hinka mata i nan lo tene rou p'e, manera ta tene rou pa un úniko yu; nan lo yor'é amargamente manera ta yora pèrdida di un yu mayó.

¹¹ E dia ei rou den Herusalèm lo ta mes grandi ku esun pa Hadad-Rimon den sabana di Megido.

¹² E pais lo tene rou, e hòmbernan di kada famia apart i nan kasánan apart: famia di David i nan kasánan, famia di Natan i nan kasánan,

¹³ famia di Levi i nan kasánan, famia di Shimi i nan kasánan

¹⁴ i tur otro famia; hòmbernan apart i muhénan apart.