Yozue 23 - Papiamentu Bible 2013

Yozue ta papia ku e lidernan di pueblo

¹ Ya tabatin hopi tempu ku SEÑOR a perkurá pa di tur banda e enemigunan laga Israel na pas. Yozue tabata basta bieu.

² El a yama henter Israel huntu, esta e kabesnan di famia, e hefenan, e huesnan i e otro lidernan, i bisa nan: ‘Mi ta bieu kaba.

³ Boso mes a mira tur loke SEÑOR, boso Dios, a hasi ku tur e pueblonan akí pa boso motibu. E mes a bringa pa boso.

⁴ Teritorio di e nashonnan ku a sobra i di e nashonnan ku mi a destruí, kuminsando for di Yordan na ost te na Laman Mediteráneo na wèst, mi a parti entre boso komo propiedat dor di tira lòt,

⁵ manera SEÑOR, boso Dios, a primintí. Pasobra E mes lo kore ku nan for di e pais.

⁶ Atené boso firmemente na tur loke tin pará den lei di Moises, sòru pa boso no desviá di ningun manera.

⁷ No buska kontakto ku e nashonnan ku a sobra. No menshoná nòmber di nan diosnan falsu. No hura na nan diosnan, no sirbi nan i no hinka rudia nan dilanti.

⁸ Keda fiel na SEÑOR, boso Dios, manera boso a hasi te dia djawe.

⁹ SEÑOR a kore ku pueblo grandi i poderoso pa boso, i niun hende no por a resistí kontra boso.

¹⁰ Un di boso ya tabata basta pa persiguí mil enemigu, pasobra SEÑOR, boso Dios, mes tabata bringa pa boso, manera El a primintí.

¹¹ Boso úniko preokupashon mester ta: stima SEÑOR, boso Dios.

¹² No bira lomba pa Dios. No djòin e sobrá nashonnan ku a keda biba meimei di boso. No kasa ku nan ni sera amistat ku nan.

¹³ Pasobra si boso hasié tòg, sa sigur ku SEÑOR, boso Dios, no ta sigui kore ku nan pa boso. Nan lo ta un trampa pa boso, manera un zuip riba boso lomba i sumpiña den boso wowo, te dia boso muri bai laga e tera bon akí ku SEÑOR, boso Dios, a duna boso.

¹⁴ Mira, mi no tin hopi dia di bida mas. Boso mester rekonosé ku kurason i alma ku tur loke SEÑOR, boso Dios, a primintí boso, a keda kumplí, sin niun eksepshon. Tur a bira realidat.

¹⁵ Pero meskos ku e promesanan bunita ku SEÑOR, boso Dios, a hasi boso a bira realidat, asina tambe lo E realisá tur su menasanan di kastigu te ora E bari boso kompletamente for di e pais akí.

¹⁶ Si boso kibra e aliansa ku SEÑOR, boso Dios, a sera ku boso i boso bai sirbi otro dios i hinka rudia adorá nan, e ora ei SEÑOR su rabia lo baha riba boso i boso lo disparsé pronto for di den e pais dushi ku El a duna boso!’