Yozue 19 - Papiamentu Bible 2013

Teritorio di tribu di Simeon

¹ Di dos lòt a kai riba tribu di Simeon. E propiedat ku e famianan di e tribu akí a haña tabata keda den teritorio di Huda.

² Nan a haña e siguiente siudatnan: Beer-Shèba, Shèba, Molada,

³ Hasar-Shual, Bala, Esèm,

⁴ Eltolad, Betul, Horma,

⁵ Siklag, Bet-Hamarkabot, Hasar-Susa,

⁶ Bet-Lebaot i Sharuhèn, total diestres siudat ku nan pueblonan.

⁷ Tambe En-Rimon, Etèr i Ashan, kuater siudat ku nan pueblonan.

⁸ Tur e pueblonan rondó di e siudatnan akí te ku Baalat-Beer i Rama-Neguèb tabata kontá aden. E teritorio akí e famianan di Simeon a haña.

⁹ Komo e teritorio ku tribu di Huda a haña tabata muchu grandi pa nan, a duna tribu di Simeon un parti di e teritorio komo propiedat.

Teritorio di tribu di Zebulon

¹⁰ Di tres lòt a kai riba e famianan di Zebulon. Frontera di nan teritorio tabata yega te Sarid,

¹¹ sigui bai wèst te Marala, bai Dabeshèt pa kaba na e roi banda di Yokneam.

¹² Den direkshon ost e tabata kore di Sarid bai Kesulot-Tabor, pasa Dabrat, subi bai Yafia.

¹³ Di ei e frontera tabata bai den direkshon ost te Gat-Hahefèr, pasa Ita-Kasin, bai sali na Rimon pa lora bai Nea.

¹⁴ Despues e tabata lora pasa nort di Hanaton, bai kaba den vaye di Yiftag-El.

¹⁵ Nan tabatin en total diesdos siudat ku nan pueblonan, Katat, Nahalal, Shimron, Yidala i Betlehèm kontá aden.

¹⁶ E siudatnan akí ku nan pueblonan tabata forma propiedat di e famianan di Zebulon.

Teritorio di tribu di Isakar

¹⁷ Di kuater lòt a kai riba e famianan di Isakar.

¹⁸ Nan teritorio tabata konsistí di e siudatnan Yizreel, Kesulot,

¹⁹ Shunem, Hafaraim, Sion, Anaharat,

²⁰ Rabit, Kishon, Ebès,

²¹ Rèmèt, En-Ganim, En-Hada i Bet-Pases.

²² E frontera tabata pasa Tabor, Shahasima i Bet-Shèmèsh bai kaba den riu Yordan. Tabata na tur diesseis siudat ku nan pueblonan.

²³ E siudatnan akí ku nan pueblonan tabata forma propiedat di e famianan di Isakar.

Teritorio di tribu di Asher

²⁴ Di sinku lòt a kai riba e famianan di Asher.

²⁵ Nan teritorio tabata konsistí di Hèlkat, Hali, Bètèn, Akshaf,

²⁶ Alamelèk, Amad i Mishal. E frontera tabata sigui bai den direkshon wèst te Karmel i Shihor-Libnat.

²⁷ Djei e tabata lora den direkshon ost bai Bet-Dagon bai topa ku frontera di Zebulon i tabata pasa vaye di Yiftag-El bai nort na Bet-Haemèk i Neiel pa djei sali nort di Kabul,

²⁸ pasa Ebron, Rehob, Hamon i Kana, bai te Gran Sidon.

²⁹ Ei e frontera tabata kita bai Rama, sigui te e siudat fortifiká Tiro, lora bai Hosa pa bin kaba den laman. Ku Hèbèl, Akzib,

³⁰ Uma, Afèk i Rehob kontá aden, nan tabatin en total bintidos siudat ku nan pueblonan.

³¹ E siudatnan akí i nan pueblonan tabata forma propiedat di e famianan di Asher.

Teritorio di tribu di Naftali

³² Di seis lòt a kai riba e famianan di Naftali.

³³ Nan teritorio tabata kore di Helèf, pasa e palu grandi di Saananim, Adami-Hanèkèb i Yabneel bai Lakum i kaba den Yordan.

³⁴ Den direkshon wèst e frontera tabata pasa di Aznot-Tabor bai Hukok. Na zùit e tabata yega te na teritorio di Zebulon i na wèst te na teritorio di Asher. Na ost e tabata yega te Yordan na Yehuda.

³⁵ Nan siudatnan fortifiká tabata: Sidim, Ser, Hamat, Rakat, Kinerèt,

³⁶ Adama, Rama, Hasor,

³⁷ Kèdèsh, Edrei, En-Hasor,

³⁸ Yiron, Migdal-El, Harem, Bet-Anat i Bet-Shèmèsh, total diesnuebe siudat ku nan pueblonan.

³⁹ E siudatnan akí ku nan pueblonan tabata forma propiedat di e famianan di Naftali.

Teritorio di tribu di Dan

⁴⁰ E di shete lòt a kai riba e famianan di Dan.

⁴¹ Nan teritorio tabata konsistí di Sora, Eshtaol, Ir-Shèmèsh,

⁴² Shaalabin, Ayalon, Yitla,

⁴³ Elon, Timna, Ekron,

⁴⁴ Elteké, Guibton, Baalat,

⁴⁵ Yehud, Bene-Barak, Gat-Rimon,

⁴⁶ Me-Hayarkon, Rakon i e region banda di Yafo.

⁴⁷ Komo e teritorio akí tabata muchu chikitu pa tribu di Dan, nan a ataká e siudat Lèshèm i kaptur'é. Nan a mata tur hende i a keda biba aya. Nan a kambia nòmber di Lèshèm hasié Dan na honor di nan antepasado Dan.

⁴⁸ E siudatnan akí ku nan pueblonan tabata forma propiedat di e famianan di Dan.

Teritorio di Yozue

⁴⁹ Ora nan a kaba di parti e pais den teritorio pa kada tribu, Yozue, yu di Nun, tambe a haña un parti komo propiedat.

⁵⁰ Manera SEÑOR a ordená, nan a duna Yozue e siudat Timnat-Sera den e serunan di Efraim, e siudat ku Yozue a pidi. El a rekonstruí e siudat i a bai biba aya.

⁵¹ Esaki tabata e teritorionan ku e saserdote Eleazar, Yozue, i e kabesnan di famia a parti entre e tribunan di Israel. Nan a hasié pa medio di tiramentu di lòt na Silo dilanti di SEÑOR na entrada di e Tènt di Enkuentro. E ora ei nan tabata kla ku partimentu di e pais.