Yozue 16 - Papiamentu Bible 2013

Teritorio di e desendientenan di Jozef

¹ Despues a tira lòt pa e desendientenan di Jozef haña tereno. Frontera di nan teritorio tabata kuminsá na Yordan, serka di Yériko, pasa parti ost di e brònnan di e siudat akí i krusa desierto bai Betel den e serunan.

² Di Betel e tabata sigui bai Lus, pasa den teritorio di e arkitanan bai Atarot,

³ sigui bai wèst, pasa dor di teritorio di e yafletitanan, bai Bet-Horon Abou i Guèzèr, bai kaba den laman.

⁴ Esei tabata e tereno ku e desendientenan di Jozef, esta e tribunan di Manase i di Efraim, a haña komo propiedat.

Teritorio di tribu di Efraim

⁵ E famianan di Efraim a haña e siguiente propiedat: E frontera parti zùit tabata kuminsá ost di Atarot-Adar, bai te Bet-Horon Ariba

⁶ i bai kaba den laman. E frontera ost tabata kuminsá parti nort na Mikmetat, lora den direkshon ost bai Taanat-Silo, pasa ost di Yanoag,

⁷ bai Atarot i Naarata, pa despues e pasa pegá ku Yériko, bai kaba den Yordan.

⁸ E frontera nort tabata kore di Tapuag bai den direkshon wèst banda di roi Kana pa e bai kaba den laman. E tereno ei e famianan di Efraim a haña komo propiedat.

⁹ Ademas nan a haña algun siudat, ku nan pueblonan rondó di nan den teritorio di tribu di Manase.

¹⁰ Pero tribu di Efraim no a kore ku e kanaanitanan ku tabata biba na Guèzèr. Te dia djawe e kanaanitanan ta biba serka nan ounke ku e efraimitanan a pone nan hasi trabou fòrsá.