Yozue 14 - Papiamentu Bible 2013

Yozue ta repartí Kanaan

¹ Esakinan ta e terenonan ku e israelitanan a haña komo propiedat na Kanaan. Saserdote Eleazar i Yozue, yu di Nun, huntu ku e kabesnan di famia dje tribunan a duna e israelitanan e terenonan ei.

² Dor di tira lòt kada un di e nuebe tribunan i e mitar tribu a haña nan propiedat, manera SEÑOR a ordená tempu di Moises.

³ E otro dos tribunan i e mitar tribu ya Moises a duna e tereno ost di Yordan komo propiedat. Tribu di Levi sí no a haña tereno komo propiedat;

⁴ wèl nan a haña siudat pa nan biba, ku e kunuku rondó di nan pa nan bestianan. E desendientenan di Jozef tabata forma dos tribu: Manase ku Efraim.

⁵ E israelitanan a parti e pais manera SEÑOR a ordená Moises.

Kaleb ta haña Hebron komo propiedat

⁶ Algun hende di tribu di Huda a bai Guilgal serka Yozue. Un di nan, Kaleb, yu di Yefune, di famia di Kenaz, a bisa Yozue: ‘Bo ta kòrda loke SEÑOR a bisa su profeta Moises na Kadesh-Barnea tokante di mi ku bo?

⁷ Mi tabatin kuarenta aña tempu ku sirbidó di SEÑOR, Moises, a manda mi for di Kadesh-Barnea bai eksplorá e pais akí. Ora mi a bini bèk mi a kont'é tur kos segun mi konsenshi.

⁸ Mi kompañeronan a hinka sustu den e israelitanan, pero ami a keda fiel na SEÑOR, mi Dios.

⁹ P'esei Moises a hura mi e tempu ei: “E tera ku bo pia toka lo bira propiedat di bo i bo desendientenan pa semper, pasobra bo a keda fiel na SEÑOR, mi Dios.”

¹⁰ I SEÑOR a tene mi na bida manera El a primintí. Ya ta 45 aña ku SEÑOR a bisa Moises e kos ei. E tempu ei ainda Israel tabata den desierto. Awor akí mi tin 85 aña

¹¹ i mi ta mes duru ku tempu Moises a manda mi bai eksplorá e pais; ketu bai mi ta sinti mi kapas di por bringa òf kumpli ku kualke enkargo meskos ku e tempu ei.

¹² P'esei mi ta pidi bo duna mi e region di e serunan; e region ku SEÑOR a primintí mi e tempu ei. Bo mes a tende e tempu ei ku aya tin anakitanan ta biba den siudat grandi i reforsá; kasi sigur SEÑOR lo ta ku mi i lo mi kore ku nan, manera El a bisa.’

¹³ E ora ei Yozue a bendishoná Kaleb i a dun'é siudat Hebron komo propiedat.

¹⁴ Asina Hebron a keda propiedat di Kaleb i su desendientenan te dia djawe, pasobra Kaleb a keda fiel na SEÑOR, Dios di Israel.

¹⁵ Promé aya Hebron tabata yama Kiriat-Arba. (Arba tabata e anakita di mas famoso.) Awor tabata reina pas den e pais.