Yozue 12 - Papiamentu Bible 2013

E reinan ku Moises a derotá

¹ Promé e israelitanan a konkistá e teritorio parti ost di riu Yordan, for di e riu Arnon te na seru Hermon i henter e vaye ost di riu Yordan. Ei nan a derotá dos rei.

² Esun tabata rei Sihon di e amoritanan. E tabata biba na Hèshbon. Su teritorio tabata for di Aroer, ku ta keda kantu di riu Arnon, na mitar di vaye di Arnon, te na riu Yabok, ku tabata forma frontera di e amonitanan; esta mitar Guilead.

³ Mas aleu su teritorio tabata kubri e parti ost di vaye di Yordan, for di lago di Kinerèt te na e parti ost di Laman Morto den direkshon di Bet-Haishimot i den direkshon zùit te na pia di seru Pisga.

⁴ E otro tabata rei Og di Bashan. E tabata un di e delaster refaítanan i tabata biba na Ashtarot i Edrei.

⁵ Su teritorio tabata kubri seru Hermon, Salka, henter e region Bashan te na frontera di Gueshur i Maaka. Ademas mitar di Guilead te na teritorio di rei Sihon di Hèshbon.

⁶ Bou di guia di Moises, sirbidó di SEÑOR, e israelitanan a derotá e reinan akí i Moises a duna e tribunan di Ruben, Gad i e mitar tribu di Manase nan teritorio komo propiedat.

E reinan ku Yozue a derotá

⁷ Bou di guia di Yozue e israelitanan a derotá e reinan parti wèst di Yordan den e teritorio for di Baal-Gad den sabana di Libanon te na seru Halak ku ta subi bai Seír. Yozue a parti e teritorio di e reinan akí entre e tribunan di Israel komo propiedat permanente pa kada un di e tribunan.

⁸ E teritorio akí tabata inkluí region di serunan di Huda, sabana di Shefela, vaye di riu Yordan, bahada di serunan, desierto i Neguèb. Aki e hetitanan, e amoritanan, e kanaanitanan, e perizitanan, e hiwitanan i e yebusitanan tabata biba.

^9-24 E israelitanan a derotá e reinan di e siguiente siudatnan: Yériko, Ai ku ta keda pegá ku Betel, Herusalèm, Hebron, Yarmut, Lakish, Eglon, Guèzèr, Debir, Guèdèr, Horma, Arad, Libna, Adulam, Makeda, Betel, Tapuag, Hefèr, Afèk, Lasharon, Madon, Hasor, Shimron-Meron, Akshaf, Tanak, Megido, Kèdèsh, Yokneam, pegá ku Karmel, Dor den region di Dor, Goim, pegá ku Guilgal, i Tirsa. Tur huntu nan tabata 31 rei.