Yeremías 41 - Papiamentu Bible 2013

¹ Den e di shete luna di e aña ei Yishmael, yu di Netanías i ñetu di Elishama, huntu ku dies hòmber a bai serka Guedalías, yu di Ahikam, na Mispa. Yishmael tabata miembro di famia real i den pasado un di e ofisialnan mas importante di rei di Huda. Ora nan tabata komiendo huntu,

² Yishmael i su kompañeronan a bula lanta, saka nan spada i hinka Guedalías mata. Asina nan a asesiná e hòmber ku rei di Babilonia a nombra komo gobernador di e pais.

³ Yishmael a hinka tur e otro hòmbernan, ku tabata serka Guedalías na Mispa, tambe mata, mas e sòldánan babilóniko ku tabata ei.

Yishmael ta mata setenta peregrino di Samaria

⁴ Manisé di e asesinato di Guedalías, promé ku niun hende a haña sa,

⁵ ochenta hòmber for di Sihem, Silo i Samaria a yega ei. Nan a feita nan barba kit'afó, bisti paña kibrá i skèrf nan kurpa komo muestra di rou. Nan a trese hariña i sensia pa bai ofresé den tèmpel.

⁶ Yishmael a sali bai kontra nan ku awa na wowo i el a kombidá nan bisando: ‘Bin un ratu bin bishitá Guedalías!’

⁷ Unabes ku nan tabata den siudat, Yishmael i su kompañeronan a hinka nan mata i tira nan kadaver den un renbak.

⁸ Pero el a skapa bida di dies di nan, pasobra nan a bisa Yishmael: ‘No mata nos! Den kunuku nos a skonde reserva di trigo, sebada, zeta di oleifi i miel.’ Esei a pone ku e no a mata nan huntu ku e otronan.

⁹ E renbak, kaminda Yishmael a tira kadaver di e hòmbernan ku el a asesiná, tabata e mesun renbak grandi ku rei Asa a laga traha tempu e tabata den guera ku rei Basha di Israel. Ta e renbak akí Yishmael a yena ku kadaver.

¹⁰ Despues el a kohe tur e otro hendenan ku tabata na Mispa prezu; tambe e yu muhénan di e rei, en breve tur e hendenan ku Nebuzaradan, komandante di e guardia personal, a konfia Guedalías kuné. Yishmael a sali bai hiba nan tur teritorio di Amon.

Prizoneronan di Yishmael ta haña libertat

¹¹ Ora Yohanan, yu di Karea, i tur su lidernan militar a tende di e asesinato baho ku Yishmael a kometé,

¹² nan a reuní tur nan sòldánan i a persiguié. Nan a alkans'é na e pos grandi na Guibeon.

¹³ Ora ku e hendenan, ku Yishmael a kohe prezu na Mispa, a mira Yohanan i tur su lidernan militar, nan a bira loko di kontentu.

¹⁴ Nan a bira i kore bai kontra nan.

¹⁵ Pero Yishmael mes ku ocho otro hòmber sí a skapa i hui bai Amon.

¹⁶ Yohanan i e otro lidernan militar a tuma enkargo di restu di e poblashon ku Yishmael a saka for di Mispa bai kuné despues di e asesinato di Guedalías: hòmber, muhé i mucha i den e hòmbernan tabatin tambe funshonario di guardia personal di rei i sòldá. El a saka tur for di Guibeon bai kuné.

^17-18 Nan tabatin miedu dje babilonionan, ya ku Yishmael a mata Guedalías, e hòmber ku rei di Babilonia mes a nombra komo gobernador di Huda. P'esei nan a hui bai zùit i a para na e posada di Kimham serka di Betlehèm. Fo'i djei nan ker a sali pa Egipto.