Tito 3 - Papiamentu Bible 2013

Un kondukta kristian ehemplar

¹ Rekordá tur hende ku nan mester someté nan na nan gobernantenan i esnan ku tin outoridat. Nan mester ta obedesidu, kla pa hasi tur sorto di bon obra.

² Nan no mester papia malu di niun hende, nan mester ta pasífiko, kariñoso i semper saksenu ku tur hende.

³ Pasobra un tempu nos mes tambe tabata insensato i desobedesidu. Nos tabata engañá i tabata katibu di diferente pashon i plaser. Nos tabata biba ku malisia i envidia; hende tabata odia nos i nos mes tabatin rabia riba otro.

⁴ Pero Dios, nos Salbador, a mustra su bondat i amor pa humanidat,

⁵ i sin ku nos a hasi nada bon, pa puru mizerikòrdia, El a salba nos. El a hasié pa medio di e obra di Spiritu Santu ku ta laga nos nase di nobo i ta renobá nos pa medio di e baño di purifikashon.

⁶ Anto e Spiritu akí El a drama abundantemente riba nos pa medio di nos Salbador Hesu-Kristu.

⁷ Dios a salba nos, pa, despues ku den su bondat El a aseptá nos komo hustu, nos por tin e speransa di tuma parti na e benefisionan di bida eterno.

⁸ Loke mi a papia ei ta konfiabel! P'esei mi ke pa bo keda ripití e kosnan ku mi a bisa bo, ya esnan ku a pone nan fe den Dios por fiha nan atenshon kompletamente riba hasimentu di bon obra. E kosnan akí ta bon i útil pa tur hende.

⁹ Pero evitá kontroversia kèns, diskushon riba lista di antepasado, i pleitu i desakuerdo tokante loke Lei di Moises ta siña. E kosnan ei ta sin balor i sin sentido.

¹⁰ Un hende ku ta kousa divishon bo mester atvertí un bia, si mester un bia mas. Despues di esei bo mester rechas'é.

¹¹ Pasobra bo mes sa ku hende asina no ta sirbi; e ta peka i ta kondená su mes.

Instrukshon final i kumindamentu

¹² Ora mi manda Artemas òf Tígiko serka bo, hasi tur loke ta na bo alkanse pa bo bini serka mi na Nikópolis, pasobra mi a disidí di pasa wenter aya.

¹³ Hasi tur loke bo por pa Zenas, e hurista, i Apolo no falta nada pa nan biahe.

¹⁴ Nos hendenan mester siña dediká nan tempu na hasi bon obra tambe i yuda den kaso di nesesidat, ya nan ta hiba un bida fruktífero.

¹⁵ Tur esnan ku ta huntu ku mi ta manda kumindamentu. Kumindá tur nos amigunan den fe pa nos. Dios duna boso su bondat.