Salmo 99 - Papiamentu Bible 2013

SALMO 99 SEÑOR ta e rei di mas santu

¹ SEÑOR ta Rei! — Laga pueblonan tembla. Kerubinnan ta su trono! — Laga tera sakudí.

² SEÑOR ta grandi riba Seru di Sion, E ta altu elevá riba tur nashon.

³ Bo nòmber grandi i mahestuoso sea alabá: ‘Ta santu E ta!’

⁴ Rei den su poder ta stima hustisia, t'Abo a fiha derecho imparsial! B'a trata yunan di Yakob ku hustisia i derecho.

⁵ Alsa SEÑOR nos Dios, kai abou na pia di su trono: ‘Ta santu E ta!’

⁶ Moises i Aaron tabata su saserdote, Samuel un di esnan ku a yama su nòmber: nan a sklama na SEÑOR i El a kontestá nan.

⁷ Fo'i den kolumna di nubia El a papia ku nan i nan a kumpli ku e òrdunan i e lei k'El a pone.

⁸ SEÑOR, nos Dios, Bo a duna nan kontesta; Bo tabata pa nan un Dios di pordon, pero tambe Un ku ta venga nan maldatnan.

⁹ Alsa SEÑOR nos Dios, kai abou dilanti di su seru santu: ‘Santu ta SEÑOR, nos Dios!’