Salmo 96 - Papiamentu Bible 2013

SALMO 96 Ban kanta pa SEÑOR, E ta rei di universo

¹ Kanta pa SEÑOR un kanto nobo, kanta pa SEÑOR, mundu henter!

² Kanta pa SEÑOR, alsa su nòmber, proklamá su salbashon tur dia bai.

³ Konta tur pueblo di su gloria, tur nashon di su gran maravianan,

⁴ pasobra grandi ta SEÑOR, mashá famoso, mas temibel ku tur otro dios.

⁵ Tur dios di otro pueblo — falsu! E, SEÑOR, ta Kreador di firmamentu

⁶ Den su presensia tin gloria i mahestat, den su tèmpel poder i splendor.

⁷ Duna SEÑOR famia di pueblonan, duna SEÑOR su gloria i poder.

⁸ Duna su nòmber e gloria debí, subi su plenchinan i trese regalo.

⁹ Ador'É den su realse dibino, tembla p'E, henter mundu.

¹⁰ Bisa pueblonan: ‘SEÑOR ta Rei! Mundu ta duru pará, inmovibel; lo E husga nashonnan ku hustisia.’

¹¹ Laga shelu ta kontentu, tera kanta, laman ronka ku loke tin den dje,

¹² kunuku ku tur su mata hasi fiesta, tur palu di mondi hubilá:

¹³ pa SEÑOR, pasobra E ta bini; E ta bini, sí, pa husga mundu. Lo E husga mundu ku hustisia, imparsialmente lo E husga nashonnan.