Salmo 95 - Papiamentu Bible 2013

SALMO 95 Ban alabá SEÑOR i skucha su palabra

¹ Ban kanta ku legria pa SEÑOR, grita saludá nos Baranka, nos Dios ku ta trese salbashon.

² Ban presentá Su dilanti ku alabansa, kanta su gloria ku salmo i músika.

³ Pasobra SEÑOR ta un gran Dios, un Rei grandi riba tur otro dios!

⁴ E tin fondo di tera den su man, kabes di serunan tambe ta di djE.

⁵ Di djE ta laman, t'E a trah'é; i tera firme, ta su man a model'é.

⁶ Ban kai na rudia ador'É, hinka rudia pa SEÑOR, nos Kreador,

⁷ pa motibu ku E ta nos Dios i nos ta e pueblo k'E ta kuida, e karnénan guiá pa su man. Awe boso skucha su bos:

⁸ ‘No sera kurason, manera na Meriba, manera e dia ei na Masa den desierto,

⁹ ora boso grandinan a tenta i provoká Mi, ounke nan a mira mi obranan.

¹⁰ Kuarenta aña largu e pueblo a disgustá Mi. Mi di: “Esta un pueblo solo birá! Nan no kièr konosé mi kamindanan.”

¹¹ P'esei, den mi rabia, Mi a hura pa Mi mes: E lugá di deskanso ku M'a warda pa nan, hamas i nunka nan lo n' drenta den dje.’