Salmo 94 - Papiamentu Bible 2013

SALMO 94 SEÑOR ta un hues hustu; E ta kastigá es ku meres'é

¹ Dios di vengansa, SEÑOR, Dios di vengansa, aparesé!

² Lanta, Hues di mundu, duna sobèrbènan nan pago.

³ Te ki dia pekadónan, SEÑOR, te ki dia pekadónan ta sigui tribi grita triunfo,

⁴ papia nan kosnan insolente i blòf, e malechornan ei, tur?

⁵ SEÑOR, nan ta trapa bo pueblo, nan ta maltratá bo herensia.

⁶ Nan ta mata biuda i strañero, wérfano ta muri na nan man

⁷ i nan ta bisa: ‘SEÑOR no ta mira, Dios di Yakob no ta ripará.’

⁸ Paga tinu boso, hende di mas bobo, ki dia boso, hende sin sintí, ta pone boso kabes pareu?

⁹ Akaso Dios lo no tende, E ku a planta orea? Akaso lo E no mira, E ku a forma wowo di hende?

¹⁰ Lo E no duna kastigu, E ku ta suta nashonnan? N' ta E mes ta duna hende su saber?

¹¹ SEÑOR sa kiko hende ta pensa, E sa ku ta bientu esei.

¹² Felis e hende, SEÑOR, ku Bo ta skual, ku Bo ta instruí den bo lei,

¹³ pa despues e por wanta mal dianan, miéntras ta koba un buraku pa malbadonan.

¹⁴ Nò, SEÑOR lo no nenga su pueblo, ni bandoná esnan ku ta di djE.

¹⁵ Lo tin hustisia atrobe den korte i tur hende honrado lo siguié.

¹⁶ Ken ta lanta pa mi kontra pekadónan, ken ta sali pa mi kontra malechornan?

¹⁷ Si SEÑOR no a ousiliá mi, ya lo m'a resultá den silensio.

¹⁸ Ora m'a pensa: ‘Ai, mi pia ta slep’, bo bondat a wanta mi, SEÑOR.

¹⁹ Ora preokupashon a oumentá, bo konsuelo a duna mi alivio.

²⁰ Bo tin lei ku un tribunal di pèrdishon, un ku ta hasi inhustisia legal?

²¹ Nan ta atentá kontra bida di hustunan, ta kondená inosentenan na morto.

²² Ma SEÑOR a resultá mi fòrti, mi Dios, mi baranka, mi refugio.

²³ Lo E paga nan nan inikidat, l'E destruí nan komo pago pa nan malu. SEÑOR nos Dios lo kaba ku nan.