Salmo 92 - Papiamentu Bible 2013

SALMO 92 Esta grandi ta bo obranan, SEÑOR!

Un Salmo. Un kantika pa dia di Sabat.

¹ Ta dushi pa alabá SEÑOR, pa kanta gloria di bo nòmber, o Altísimo;

² pa proklamá bo bondat di mainta i bo fieldat den ora di anochi,

³ tokando e arpa di dies kuèrdè i siter o ku músika suave di lira.

⁴ Bo echonan, SEÑOR, ta enkantá mi, dilant'i obra di bo man mi ta grita:

⁵ ‘Esta grandi ta bo obranan, SEÑOR, bo pensamentunan, esta profundo!’

⁶ Hende bobo no ta komprondé, hende sin sintí no tin idea.

⁷ Maske pekadónan ta bona manera yerba shimaron i malechornan tur ta floresé, esei ta hiba nan porfin na ruina.

⁸ Enkambio Abo, SEÑOR, Bo ta pa semper elevá.

⁹ Pasobra mira, bo enemigunan, SEÑOR, bo enemigunan, ata nan a kaba, tur hasidó di maldat ta plamá.

¹⁰ Bo a hisa mi kara na laria manera un toro su kachu. B'a basha zeta refreskante riba mi,

¹¹ m'a mira mi enemigunan kai, e malbadonan ku a lanta kontra mi, m'a tende mashá kla kon nan a keha.

¹² Un bon hende ta bona manera un palma, e ta krese manera un seder di Libanon.

¹³ Esnan plantá den kas di SEÑOR, ku ta krese den kurá di nos Dios,

¹⁴ ta karga fruta te den nan behes; nan ta keda bèrdè i fresku,

¹⁵ proklamando kon hustu SEÑOR ta, Dios, mi Baranka! Nada malu n' tin den djE!