Salmo 91 - Papiamentu Bible 2013

SALMO 91 Bou di alanan di Dios mi ta sigur

¹ Abo ku ta biba bou di amparo di Altísimo, ta hospedá den sombra di Dios omnipotente,

² bisa SEÑOR: ‘Mi refugio, mi fòrti, mi Dios, den kende mi ta pone mi konfiansa!’

³ Pasobra E ta libra bo for di kui di monchadó, E ta tene bo leu for di pèster fatal.

⁴ Lo E kubri bo ku su alanan, bou 'i nan bo ta sigur, su fieldat lo ta pa bo un eskudo, un harnas.

⁵ Bo n' tin mester di tene miedu di peliger di anochi, ni di ningun flecha ku por bula den dia;

⁶ ni di pèster ku ta rondia den ora di tiniebla o di plaga mortal ku ta kohe bo mèrdia.

⁷ Ni maske mil hende kai banda di bo i dies mil na bo man drechi: nada lo no kohe bo!

⁸ Solamente habri wowo i mira rònt kon pekadónan ta haña nan kastigu.

⁹ Komo b'a yama SEÑOR ‘Mi Refugio’ i a bai skonde serka Dios Altísimo,

¹⁰ ningun desgrasia lo no yega serka bo, ningun plaga lo no yega na bo tènt.

¹¹ Pasobra El a manda su angelnan warda bo unda ku bo bai.

¹² Nan lo karga bo den nan man, pa bo no dal bo pia kontra piedra.

¹³ Riba leon i kolebra lo bo kana i trapa yu di leon i dragon.

¹⁴ ‘Si e tene na Mi, lo Mi salb'é; lo Mi als'é, si e tin rèspèt pa mi nòmber.

¹⁵ Ora e yama Mi lo Mi kontest'é, den problema Mi ta huntu kuné, lo Mi libr'é i kolm'é ku honor.

¹⁶ Mi ta pon'é disfrutá di un bida largu i lo lag'é kontemplá mi salbashon.’